ກອງປະຊຸມໃຫຍ່ ຄັ້ງທີ II ຂອງສະຫະພັນແມ່ຍິງ ໜ່ວຍພະແນກເຕັກໂນໂລຊີ ແລະ ການສື່ສານ ໄດ້ຈັດຂຶ້ນຢ່າງເປັນທາງການ ໃນຕອນບ່າຍຂອງວັນທີ 5 ສິງຫານີ້ ທີ່ຫ້ອງະຊຸມພະແນກດັ່ງກ່າວ ພາຍໃຕ້ການເປັນປະທານຂອງ ທ່ານ ນາງ ປິ່ນຄຳ ອຸ່ນລະຄອນ ຫົວໜ້າສະຫະພັນແມ່ຍິງ ໜ່ວຍພະແນກ ເຕັກໂນໂລຊີ ແລະ ການສື່ສານແຂວງ ເປັນກຽດເຂົ້າຮ່ວມມີ ທ່ານ ປອ ນາງ ວຽງມະລີ ຮອງປະທານສະຫະພັນແມ່ຍິງແຂວງ, ທ່ານ ສົມບຸນ ມະນີ ເລຂາຄະນະພັກຮາກຖາານ, ຫົວໜ້າພະແນກ ເຕັກໂນໂລຊີ ແລະ ການສື່ສານ ແຂວງອຸດົມໄຊ, ມີແຂກເຊີນຈາກອົງການຈັດຕັ້ງມະຫາຊົນອ້ອມຂ້າງ ພ້ອມດ້ວຍສະມາຊິກແມ່ຍິງ ເຂົ້າຮ່ວມ.
ກອງປະຊຸມໄດ້ສະຫຼຸບຕີລາຄາກ່ຽວການຈັດຕັ້ງະຕິບັດວຽກງານການເຄື່ອນໄຫວໃນໄລຍະ 5 ປີຜ່ານມາ ແລະ ທິດທາງແຜນການ 5 ປີຕໍ່ໜ້າ ໂດຍຍົກໃຫ້ເຫັນຜົນງານທີ່ພົ້ນເດັ່ນຫຼາຍດ້ານ ເຊິ່ງຕະຫຼອດໄລຍະຜ່ານມາ ຄະນະໜ່ວຍສະຫະພັນແມ່ຍິງ ໄດ້ຖືເອົາວຽກງານສຶກສາອົບຮົມການເມືອງ-ແນວຄິດ ໃຫ້ແກ່ພະນັກງານລັດຖະກອນ ແລະສະມາຊິກສະຫະພັນແມ່ຍິງທີ່ຢູ່ໃນຄວາມຮັບຜິດຊອບ ດ້ວຍຫຼາຍຮູບການເຮັດໃຫ້ສະມາຊິກສະຫະພັນແມ່ຍິງມີຄວາມຮັບຮູ້ ແລະ ເຂົ້າໃຈຕໍ່ແນວທາງນະໂຍບາຍຂອງພັກ, ມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດ, ມີຄວາມຮັບຜິດຊອບຕໍ່ໜ້າທີ່ການເມືອງທີ່ໄດ້ຮັບການມອບໝາຍ ແລະ ມີການເຄື່ອນໄຫວດຳລົງຊີວິດທີ່ຖືກຕ້ອງຕາມລະບຽບກົດໝາຍ ເຮັດໃຫ້ຄອບຄົວ ແລະ ການຈັດຕັ້ງມີຄວາມສະຫງົບໂດຍພື້ນຖານ, ຕິດພັນກັບການຈັດຕັ້ງປະຕິບັດວຽກງານວິຊາສະເພາະໄດ້ມີຜົນສຳເລັດຕາມແຜນການ, ສະມາຊິກແມ່ຍິງໄດ້ສ້າງຄວາມເຂັ້ມແຂງດ້ວຍຕົນເອງ ໂດຍການສ້າງຕັ້ງກອງທຶນສາມັກຄີ, ເອື້ອຍນ້ອງສະມາຊິກສະຫະພັນແມ່ຍິງໄດ້ໃຊ້ເວລາຫວ່າງນອກໂມງລັດຖະການ, ວັນເສົາ-ອາທິດ ເພື່ອເປັນການສ້າງເສດຖະກິດແກ້ໄຂຊີວິດການເປັນຢູ່ຂອງຄອບຄົວ ເຊັ່ນ: ປູກຝັງ-ລ້ຽງສັດ, ການບໍລິການ ແລະ ອື່ນໆ ໄດ້ເຮັດໃຫ້ຊີວິດການເປັນຢູ່ຂອງຄອບຄົວດີຂຶ້ນເທື່ອລະກ້າວ.
ຕໍ່ກັບຜົນງານທີ່ຍາດມາໄດ້ນັ້ນ ກອງປະຊຸມໄດ້ມອບໃບຍ້ອງຍໍໃຫ້ແກ່ສະມາຊິກແມ່ຍິງທີ່ມີຜົນງານໃນການຈັດຕັ້ງປະຕິບັດວຽກງານໄລຍະຜ່ານມາ ແລະປ່ອນບັດຄັດເລືອກເອົາ ຄະນະໜ່ວຍຊຸດໃໝ່ຈຳນວນ 3 ສະຫາຍ ກອງປະຊຸມຄັ້ງປະຖົມມະລຶກຂອງໜ່ວຍເຫັນດີເປັນເອກະພາບເລືອກເອົາ ສະຫາຍ ນາງ ຄຳ ຄູນປະເສີດ ເປັນຫົວໜ້າໜ່ວຍ, ເລືອກເອົາ ສະຫາຍ ນາງ ສົມຈິດ ທຳມະລັດ ເປັນຮອງ ແລະ ສະຫາຍ ນາງ ພູທອນ ວົງສັກ ເປັນຄະນະ ກອງປະຊຸມໄດ້ເລືອກເອົາ 2 ສະຫາຍເຮັດວຽກງານກວດກາ ຂອງສະຫະພັນແມ່ຍິງໜ່ວຍຕື່ມອີກ.


ຕອນທ້າຍກອງປະຊຸມຍັງໄດ້ຮັບຟັງການໂອ້ລົມຂອງ ສະຫາຍ ປອ ນາງ ວຽງມະລີ ສຸລິໄຊ ເຊິ່ງສະຫາຍໄດ້ຍ້ອງຍໍ, ຊົມເຊີຍ ຕໍ່ຜົນງານທີ່ທາງຄະນະສະຫະພັນແມ່ຍິງຊຸດເກົ່າຍາດມາໄດ້ໄລຍະຜ່ານມາ ພ້ອມທັງໄດ້ຮຽກຮ້ອງມາຍັງຄະນະໜ່ວຍຊຸດໃໝ່ ພ້ອມດ້ວຍສະມາຊິກ ຈົ່ງເຊີດຊູຄວາມຮັບຜິດຊອບສູງ ໃນການນຳເອົາມະຕິກອງປະຊຸມໃຫຍ່ຄັ້ງນີ້ ໄປຈັດຕັ້ງປະຕິບັດໃຫ້ປະກົດຜົນເປັນຈິງ.

ພາບ-ຂ່າວ: ແສງອາທິດ