ມີເດຍລາວແຂວງສາລະວັນ ໂດຍ:ກິນດາວັນ ອ້ວນນາຄູໃນວັນທີ 6 ສິງຫາ 2021 ນີ້, ທີ່ຫ້ອງວ່າການແຂວງສາລະວັນ, ກຸ່ມພັກພະນັກງານ – ອົງການຈັດຕັ້ງມະຫາຊົນ ນໍາໂດຍ ທ່ານ ນາງ ບຸນທະວີ ດວງລາສີ ຮອງເລຂາພັກແຂວງ, ທ່ານ ນາງ ວາດສະໜາ ໂພໄຊຍະວົງ ປະທານສະຫະພັນແມ່ຍິງແຂວງ ພ້ອມດ້ວຍຄະນະ, ໄດ້ມອບເຂົ້າຕົ້ມ ແລະ ນໍ້າດື່ມ ໃຫ້ແຂວງສາລະວັນ, ລວມມູນຄ່າ 3,510,000 ກີບ, ໂດຍໃຫ້ກຽດຮັບຂອງ ທ່ານ ປອ ໂພໄຊ ໄຊຍະສອນ ເຈົ້າແຂວງສາລະວັນ, ໂດຍຊ້ອງໜ້າຂອງ ທ່ານ ສົມໃຈ ອຸ່ນຈິດ ຮອງເຈົ້າແຂວງສາລະວັນ ພ້ອມຄະນະ ແລະ ພະນັກງານການນຳທັງສອງຝ່າຍເຂົ້າຮ່ວມເປັນສັກຂີພິຍານ.

ເຄື່ອງທີ່ກຸ່ມພັກພະນັກງານ – ອົງການຈັດຕັ້ງມະຫາຊົນແຂວງນຳມາມອບໃຫ້ແຂວງສາລະວັນ ໃນຄັ້ງນີ້ປະກອບມີ: ເຂົ້າຕົ້ມ ແລະ ນໍ້າດື່ມ, ລວມມູນຄ່າ 3.510.000 ກີບ, ໃນໂອກາດດຽວກັນນີ້ທ່ານເຈົ້າແຂວງ ໃນນາມຕ່າງໜ້າໃຫ້ການນຳຂອງແຂວງກໍ່ໄດ້ສະແດງຄວາມຍ້ອງຍໍຊົມເຊີຍຕໍ່ການນຳຂອງກຸ່ມພັກພະນັກງານ – ອົງການຈັດຕັ້ງມະຫາຊົນແຂວງ ທີ່ຍາມໃດກໍ່ໄດ້ສະແດງຄວາມເປັນຫ່ວງເປັນໄຍ ຕໍ່ຄວາມສຸກທຸກຂອງປະຊາຊົນບັນດາເຜົ່າຂອງແຂວງ ແລະ ໄດ້ເສຍສະຫລະເຮື່ອແຮງ,ທຶນຮອນຈຳນວນໜື່ງ ປະກອບສ່ວນເຂົ້າໃນການຊ່ວຍເຫລືອເຄື່ອງບໍລິໂພກໃນຄັ້ງນີ້.

ຈາກນັ້ນທ່ານຮອງເລຂາພັກແຂວງ ພ້ອມຄະນະກໍ່ໄດ້ນໍາເອົາເຄື່ອງຈໍານວນດັ່ງກ່າວ ນໍາໄປມອບໃຫ້ສູນຈໍາກັດບໍລິເວນຂອງເມືອງສາລະວັນ ຈຳນວນ 4 ສູນຄື: ສູນຈຳກັດບໍລິເວນ ໂຮງຮຽນ ມ/ສ ອົງແກ້ວ, ມີຈໍານວນຜູ້ກັກບໍລິເວນ 287 ຄົນ, ຍີງ 156 ຄົນ, ສູນຈໍາກັດບໍລິເວນ ໂຮງຮຽນທິດສະດີການເມືອງ – ການປົກຄອງ, ມີຈໍານວນຜູ້ກັກບໍລິເວນ 157 ຄົນ, ຍີງ 74 ຄົນ, ສູນຈໍາກັດບໍລິເວນໂຮງຮຽນ ມ/ສ ສາລະວັນ,ມີຈໍານວນຜູ້ກັກບໍລິເວນ 328 ຄົນ, ຍີງ 156 ຄົນ, ແລະ ສູນຈໍາກັດບໍລິເວນ ໂຮງຮຽນ ມ/ສ ບ້ານນາຂ້ອຍສາວ, ມີຈໍານວນຜູ້ກັກບໍລິເວນ 153 ຄົນ, ຍີງ 72 ຄົນ.