ມີເດຍລາວແຂວງສາລະວັນ ວັນທີ 5 ສິງຫາ 2021 ຫ້ອງວ່າການແຂວງສາລະວັນ ໄດ້ຈັດກອງປະຊຸມການ ສ້າງແຜນກຳນົດ ພະນັກງານນຳພາ – ຄຸ້ມຄອງ, ຢູ່ຫ້ອງປະຊຸມຊັ້ນ 3 ຂອງຫ້ອງວ່າການ ໂດຍການເປັນປະທານ ຂອງ ທ່ານ ຈັນເພັງ ສາຍທຳມະວົງ ກຳມະການພັກແຂວງ ຫົວໜ້າຫ້ອງວ່າການ ແຂວງສາລະວັນ, ມີພະນັກງານຫລັກແຫລ່ງ, ພະນັກງານ – ລັດຖະກອນ ພ້ອມດ້ວຍແຂກຖືກເຊີນທີ່ກ່ຽວຂ້ອງເຂົ້າຮ່ວມ.

ທ່ານ ຈັນເພັງ ສາຍທຳມະວົງ ກໍ່ໄດ້ໃຫ້ຮູ້ເຖິງຈຸດປະສົງຂອງການເປີດກອງປະຊຸມຄັ້ງນີ້ວ່າ: ການສ້າງແຜນກຳນົດພະນັກງານນຳພາ – ຄຸ້ມຄອງ ແມ່ນເປັນວຽກໜື່ງທີ່ມີຄວາມສຳຄັນ ແລະ ຕ້ອງໄດ້ຈັດຕັ້ງປະຕິບັດ ພາຍຫລັງທີ່ກອງປະຊຸມໃຫຍ່ຂອງພັກແຕ່ລະຂັ້ນສຳເລັດ, ຮັບປະກັນການຫັນວຽກພະນັກງານດຳເນີນຕາມລະບຽບແບບແຜນ ເພື່ອຕອບສະໜອງໜ້າທີ່ການເມືອງຂອງ ພັກ – ລັດ ໃນສະເພາະໜ້າ ແລະ ຍາວນານ, ເປັນການຫັນຍຸດທະຍາດກ່ຽວກັບວຽກງານພະນັກງານເປັນອັນລະອຽດ ສ້າງໂຄງການສັງລວມພື້ນຖານໃຫ້ແກ່ການສ້າງແຜນ, ກໍ່ສ້າງ-ບໍາລຸງ, ຄາດຄະເນສັບຊ້ອນ ແລະ ຈັດວາງພະນັກງານເຂົ້າໃນຕຳແໜ່ງນຳພາ-ຄຸ້ມຄອງ ແຕ່ລະຂັ້ນແຕ່ລະຂະແໜງການ, ແນໃສ່ຮັບປະກັນລັກສະນະປ່ຽນແທນຕໍ່ເນື່ອງ ເພື່ອກະກຽມບຸກຄະລາກອນໃນລັກສະນະເປີດກວ້າງ ໃຫ້ມີແຫຼ່ງເລືອກເຟັ້ນ ພະນັກງານ ນຳພາ – ຄຸ້ມຄອງ ຕອບສະໜອງທາງດ້ານຈຳນວນ, ຄຸນນະພາບ, ໂຄງປະກອບບຸກຄະລະກອນໃຫ້ຄົບຊຸດຕາມຄວາມຮຽກຮ້ອງຕ້ອງການຂອງຕຳແໜ່ງນຳພາ – ຄຸ້ມຄອງແຕ່ລະຂັ້ນ.

ນອກຈາກນັ້ນໃນພິທີຜູ້ເຂົ້າຮ່ວມ ກໍ່ໄດ້ຮັບຟັງການ ຜ່ານຂໍ້ຕົກລົງ ສະບັບເລກທີ 15/ຫວຂ.ສວ, ວ່າດ້ວຍ: ການແຕ່ງຕັ້ງຄະນະຜິດຜິດຊອບກອງປະຊຸມຂື້ນແຜນກໍານົດພະນັກງານນໍາພາ-ຄຸ້ມຄອງ, ມະຕິຂອງກົມການເມືອງສູນການພັກ ສະບັບເລກທີ 030/ກມສພ, ວ່າດ້ວຍ: ມາດຕະຖານຂອງພະນັກງານນຳພາຄຸ້ມຄອງ, ມະຕິຂອງກົມການເມືອງສູນກາງພັກ ສະບັບເລກທີ 032/ກມສພ, ວ່າດ້ວຍ: ວຽກງານສ້າງແຜນກຳນົດພະນັກງານນໍາພາ – ຄຸ້ມຄອງ ແລະ ມາດຖານເງື່ອນໄຂ ຂອງພະນັກງານນຳພາຄຸ້ມຄອງ ພ້ອມທັງໄດ້ຮ່ວມກັນທາບທາມ ແລະ ປ່ອນບັດຮອບທີ 1, ຮອບທີ 2 ແລະ ຮອບທີ 3, ກອງປະຊຸມແມ່ນຈະດໍາເນີນໄປເປັນເວລາ 2 ວັນ ຈຶ່ງສໍາເລັດ.

ໂດຍ: ກິນດາວັນ ອ້ວນນາຄູ