ມີເດຍລາວແຂວງເຊກອງ ຂ່າວ: ຄຳເພົ້າ ຮຸ່ງໄຊຍະວົງ ໃນວັນທີ 6 ສິງຫາ 2021 ທີ່ຜ່ານມານີ້ ຢູ່ທີ່ຫ້ອງປະຊຸມຊັ້ນ 2 ຕຶກອົງການຈັດຕັ້ງມະຫາຊົນ ໄດ້ຈັດພິທີ ມອບ – ຮັບໜ້າທີ່ ລະຫວ່າງຜູ້ຮັກສາການ ແລະ ຫົວໜ້າຫ້ອງວ່າການ ຂື້ນຢ່າງເປັນທາງການ ໂດຍການເປັນປະທານຂອງທ່ານ ອໍບົວລາ ອ່ອນມະໄລວົງ ເຈົ້າເມືອງ-ເມືອງກະລຶມ , ເຂົ້າຮ່ວມໃນພິທີມີບັນດາທ່ານຄະນະປະຈຳພັກເມືອງ , ກຳມະການພັກເມືອງ, ຫົວໜ້າ – ຮອງຫົວໜ້າຫ້ອງການອ້ອມຂ້າງເມືອງເຂົ້າຮ່ວມ.

ໃນພິທີ ທ່ານ ແອັດສະປາຍ ຈໍສະກຸນວົງ ຜູ້ຮັກສາການຫົວໜ້າຫ້ອງວ່າການ ໄດ້ຂຶ້ນຜ່ານບົດບັນທືກການ ມອບ – ຮັບ ໜ້າທີ່ວຽກງານ ລະຫວ່າງ ຜູ້ສັກສາການ ແລະ ຫົວໜ້າຫ້ອງວ່າການ ເຊິ່ງມີເນື້ອໃນສະແດງເຖິງຜົນສຳເລັດວຽກງານໃນແຕ່ລະດ້ານ, ຈຸກອ່ອນ, ຂໍ້ຄົງຄ້າງ ແລະ ບົດຮຽນທີ່ສາມາດຖອດຖອນໄດ້. ຈາກນັ້ນ, ກໍໄດ້ມີພິທີ ເຊັນ ມອບ – ຮັບ ໜ້າທີ່ລະຫວ່າງ ຜູ້ຮັກສາການ ແລະ ຫົວໜ້າຫ້ອງວ່າການເມືອງ ຢ່າງເປັນທາງການ. ໂດຍມີບັນຄະນະພັກ – ການນຳເມືອງທຸກຂັ້ນ ພາກສ່ວນກ່ຽວຂ້ອງເຂົ້າຮ່ວມເປັນສັກຂີພະຍານ.
ໂອກາດນີ້ ທ່ານ ສຸດສັກສິດ ຍິດແສນຫວັງ ກຳມະການພັກເມືອງ, ຫົວໜ້າຫ້ອງວ່າການເມືອງກະລຶມ ກໍຂຶ້ນກ່າວຮັບໜ້າທີ່ ພ້ອມທັງປະຕິຍານຕົນວ່າ ຈະສືບຕໍ່ຈັດຕັ້ງປະຕິບັດໜ້າທີ່ວຽກງານທີ່ຕົນຮັບຜິດຊອບ ກໍຄືວຽກງານຂັ້ນເທິງໄດ້ມອບໝາຍໃຫ້ດ້ວຍຄວາມຮັບຜິດຊອບສູງ, ຈະສືບຕໍ່ຊີ້ນຳ-ນຳພາ ວຽກງານທີ່ຍັງຄ້າງຄາໃຫ້ມີຜົນສຳເລັດສູງ, ຮຽກຮ້ອງມາຍັງທຸກພາກສ່ວນ ຈົ່ງເປັນເຈົ້າການນຳກັນ ໃນການຈັດປະຕິບັດໜ້າທີ່ວຽກງານຕ່າງໆ ທີ່ຂັ້ນເທິງມອບໝາຍໃຫ້ ເພື່ອສ້າງສາພັດທະນາເມືອງກະລຶມໃຫ້ມີຄວາມເປັນລະບຽບຮຽບຮ້ອຍ, ຮຸ່ງເຮືອງ, ສີວິໄລ ແລະ ຍຸຕິທຳ.