ມີເດຍລາວແຂວງສາລະວັນ ໂດຍ: ກິນດາວັນ ອ້ວນນາຄູ ເພື່ອເປັນການປັບປຸງກົງຈັກການຈັດຕັ້ງພາຍໃນໂຮງໝໍແຂວງສາລະວັນ ແລະ ສັບຊ້ອນພະນັກງານນຳພາ-ຄຸ້ມຄອງ ໃຫ້ຄົບຖ້ວນຕາມມາດຖານ, ເງື່ອນໄຂ ແລະ ຖືກຕ້ອງສອດຄ່ອງກັບໜ້າທີ່ວຽກງານໃນໄລຍະໃໝ່, ໂດຍປະຕິບັດຕາມຂໍ້ຕົກລົງຂອງທ່ານເຈົ້າແຂວງໆສາລະວັນ ເລກທີ 534/ຈຂ.ສວ, ລົງວັນທີ 20 ກໍລະກົດ 2021 ວ່າດ້ວຍ: ການແຕ່ງຕັ້ງ ທ່ານ ນາງ ນວນສະຫວັນ ສຸວັນນະລາດ ແລະ ທ່ານ ຄຳບວນ ຄຳມະນີວົງ ເປັນຮອງອຳນວຍການໂຮງໝໍແຂວງສາລະວັນ.

ທ່ານ ໄຊ ຊາພັກດີ ຫົວໜ້າຂະແໜງຈັດຕັ້ງພະແນກ ສາທາລະນະສຸກແຂວງ ໄດ້ຂຶ້ນຜ່ານຂໍ້ຕົກລົງຂອງທ່ານ ເຈົ້າແຂວງສາລະວັນ ວ່າດ້ວຍ: ການແຕ່ງຕັ້ງຮອງອໍານວຍການໂຮງໝໍແຂວງສາລະວັນ ແລະ ຂໍ້ຕົກລົງຂອງຫົວໜ້າພະແນກສາທາລະນະສຸກແຂວງເລກທີ 509/ພສຂ.ສວ, ລົງວັນທີ 6 ສິງຫາ 2021,ວ່າດ້ວຍການຕົກລົງແຕ່ງຕັ້ງ ພປຕ ລັດສະໝີ ມະນີວົງ ເປັນຮັກສາການຫົວໜ້າຫ້ອງການບໍລິຫານ ໂຮງໝໍແຂວງ, ທ່ານ ດຣ ບັນດານສຸກ ໄຊປັນຍາ ເປັນຫົວໜ້າໜ່ວຍງານວາງຢາສະຫຼົບ-ຟື້ນຟູຊີບ, ທ່ານ ດຣ ນາງ ກ່ອງໃສ ທໍາມະວົງສາ ເປັນຮອງຫົວໜ້າໜ່ວຍງານວາງຢາສະຫຼົບ-ຟື້ນຟູຊີບ, ທ່ານ ດຣ ແກ້ວອຸດອນ ບຸບຜາຖາ ເປັນຫົວໜ້າໜ່ວຍງານປິ່ນປົວພາຍນອກ, ເຊີ່ງເປັນການສັບຊ້ອນໜ້າທີ່ໃໝ່ຂອງພະນັກງານນຳພາ-ຄຸ້ມຄອງ ພາຍໃນໂຮງໝໍແຂວງສາລະວັນ ໃຫ້ຄົບຖ້ວນຕາມມາດຖານ, ເງື່ອນໄຂ ແລະ ແທດເໝາະກັບສະພາບຄວາມເປັນຈິງ ໃນການຈັດຕັ້ງປະຕິບັດໜ້າທີ່ວຽກງານໃນໄລຍະໃໝ່.

ພິທີດັ່ງກ່າວໄດ້ຈັດຂຶ້ນໃນວັນທີ 6 ສິງຫາ 2021, ຢູ່ໂຮງໝໍແຂວງສາລະວັນ, ໂດຍພາຍໃຕ້ການເປັນປະທານຂອງ ທ່ານ ດຣ ອາຄົມ ລໍ່າວິຈິດ ກໍາມະການພັກແຂວງ ຫົວໜ້າພະແນກສາທາລະນະສຸກແຂວງ, ທ່ານ ດຣ ວັນທອງ ບຸນວິໄລ ອໍານວຍການໂຮງໝໍແຂວງ, ມີບັນດາຄະນະອໍານວຍການໂຮງໝໍ, ຫົວໜ້າ-ຮອງຫ້ອງການ, ຫົວໜ້າຈັດຕັ້ງພະແນກສາທາລະນະສຸກແຂວງ, ຫົວໜ້າ-ຮອງໜ່ວຍງານ ແລະ ພະນັກງານຫຼັກແຫຼ່ງພາຍໃນໂຮງໝໍເຂົ້າຮ່ວມ.