ມີເດຍລາວແຂວງຜົ້ງສາລີ
(ສພຂ.ຜລ) ວັນທີ 6 ສິງຫາ 2021 ທີ່ຫ້ອງປະຊຸມຫ້ອງວ່າການແຂວງ ໄດ້ຈັດກອງປະຊຸມປືກສາຫາລືການກະກຽມ ແລະ ສະເຫຼີມສະຫຼອງວັນລັດຖະທໍາມະນູນແຫ່ງຊາດ ຄົບຮອບ 30 ປີ (15 ສິງຫາ 1991- 15 ສິງຫາ 2021) ໂດຍການປະທານຂອງທ່ານ ຄໍາເຫຼັກ ໃຈອີສານ ກໍາມະການຄະນະປະຈໍາພັກແຂວງ, ຮອງເຈົ້າແຂວງ, ຮອງຫົວໜ້າຄະນະຮັບຜິດຊອບຂັ້ນແຂວງ, ມີບັນດາທ່ານ ຄະນະຮັບຜິດຊອບຂັ້ນແຂວງ ການກະກຽມ ແລະ ສະເຫຼີມສະຫຼອງວັນລັດຖະທໍາມະນູນແຫ່ງຊາດ ຄົບຮອບ 30 ປີ, ເຂົ້າຮ່ວມ ຈໍານວນ 9 ທ່ານ, ຍິງ 3 ທ່ານ.

ທັງນີ້ກໍເພື່ອປືກສາຫາລື ກ່ຽວກັບວິທີການ, ຂັ້ນຕອນການກະກຽມຄວາມພ້ອມໃຫ້ແກ່ການ ຈັດຕັ້ງສະເຫຼີມສະຫຼອງວັນລັດຖະທໍາມະນູນແຫ່ງຊາດ ຄົບຮອບ 30 ປີ ຢູ່ແຂວງຜົ້ງສາລີ ໃຫ້ມີບັນຍາກາດຟົດຟື້ນ ທັງດ້ານເນື້ອໃນ, ຮູບການ ແລະ ພິທີການ; ເພື່ອຮັບປະກັນໃຫ້ແກ່ການຈັດຕັ້ງປະຕິບັດ ມະຕິຂອງກົມການເມືອງສູນກາງພັກ ແລະ ຄໍາສັ່ງແນະນໍາ ຂອງຄະນະເລຂາທິການສູນກາງພັກ ໃນການສະເຫຼີມສະຫຼອງ ວັນລັດຖະທໍາມະນູນແຫ່ງຊາດ ຄົບຮອບ 30 ປີ ຢູ່ແຂວງຜົ້ງສາລີ ໃຫ້ແທດເໝາະກັບສະພາບຄວາມເປັນຈິງໃນປະຈຸບັນ, ມີຄວາມເປັນເອກະພາບສູງ ໃນການສະເຫຼີມສະຫຼອງ ແລະ ກາຍເປັນປາງບຸນໃຫຍ່ຂອງປະຊາຊົນລາວບັນດາເຜົ່າໃນທົ່ວແຂວງຜົ້ງສາລີ.

ໃນທີ່ປະຊຸມໄດ້ຮັບຟັງທ່ານ ຄໍາເຫຼັກ ໃຈອີສານ ຜ່ານມະຕິຕົກລົງຂອງຄະນະປະຈໍາພັກແຂວງ ສະບັບເລກທີ 3018/ຄພຂ.ຜລ ລົງວັນທີ 4 ສິງຫາ 2021 ວ່າດ້ວຍການແຕ່ງຕັ້ງຄະນະຮັບຜິດຊອບຂັ້ນແຂວງ ສະເຫຼີມສະຫຼອງວັນລັດຖະທໍາມະນູນແຫ່ງຊາດ ຄົບຮອບ 30 ປີ. ຈາກນັ້ນ, ຄະນະຮັບຜິດຊອບຂັ້ນແຂວງ ກໍໄດ້ປະກອບຄໍາເຫັນ ເພື່ອຄວາມເປັນເອກະພາບໃນການ ຈັດຕັ້ງສະເຫຼີມສະຫຼອງວັນລັດຖະທໍາມະນູນແຫ່ງຊາດ ຄົບຮອບ 30 ປີ ຢູ່ແຂວງຜົ້ງສາລີ ໃຫ້ມີຜົນສໍາເລັດຕາມລະດັບຄາດໝາຍທີ່ກໍານົດ.
ສະພາປະຊາຊົນແຂວງຜົ້ງສາລີ (ນາງ ສຸກສົມພອນ ແກ້ວແສງພະຈັນ)