ມີເດຍລາວແຂວງເຊກອງ ຂ່າວ-ພາບ: ແດນວົງວິຈິດ
ກຸ່ມສະຫະກອນ 52 ຄົນຂອງເມືອງທ່າແຕງ ແຂວງເຊກອງໄດ້ຮຽນຮູ້ເຕັກນິກການປູກມັນຕົ້ນໃນວັນທີ 6 ສິງຫາ 2021 ນີ້ ທີ່ບ້ານ ກົກພຸງເໜືອ ໂດຍມີ ທ່ານ ເສີມສີ ສຸລິຕະ ຮອງຫົວໜ້າພະແນກກະສິກໍາ ແລະ ປ່າໄມ້ແຂວງ ,ທ່ານ ສຸກັນ ຈັນສີປະເສີດ ຫົວໜ້າຫ້ອງການກະສິກໍາ ແລະ ປ່າໄມ້ເມືອງ,ມີທ່ານ ບຸນປັນ ແສນທະວີສຸກ ຜູ້ປະສານງານໂຄງການຄີຣນ (CLEAN)ອົງການວິນລ໋ອກ (WINROCK)ພ້ອມດ້ວຍຊາວກະສິກອນເຂົ້າຮ່ວມ.

ສະຫະກອນການຜະລິດໄດ້ຮຽນຮູ້ທິດສະດີ ແລະ ພຶດຕິກໍາຕົວຈິງກ່ຽວກັບການປ້ອງກັນພຶດແບບປະສົມປະສານສຳລັບມັນຕົ້ນໂດຍສະເພາະຮຽນຮູ້ຫຼັກການຂອງການປ້ອງກັນພຶດແບບປະສົມປະສານ,ລັກສະນະທົ່ວໄປຂອງແມງໄມ້ສັດຕູພຶດ-ບັນຫາສັດຕູພຶດທີ່ເຂົ້າທຳລາຍຂອງເພ້ຍແປ້ງສີບົວ,ໄຮແດງ,ບົ້ງເຂົາ,ແມງມີ່ຂາວ,ພະຍາດໃບດ່າງ,ພະຍາດຮາກເນົ່າ,ພະຍາດຝອຍຂົນໄກ,ພະຍາດໃບຈຸດ,ແນະນຳການຫຼຸດຜ່ອນຄວາມສ່ຽງການນຳໃຊ້ສານເຄີມີກຳຈັດແມງໄມ້ສັດຕູຜຶດ ແລະ ອົງປະກອບອື່ນໆທີ່ເຮັດໃຫ້ຜົນຜະລິກມັນຕົ້ນຫຼຸກລົງ, ຜ່ານການປະເມີນກ່ຽວກັບການຄົ້ນຄວ້າແລະ ການແລກປ່ຽນບົດຮຽນສາມາດຢັ້ງຢືນຄວາມຮັບຮູ້ທາງດ້ານທິດສະດີແລະພາກປະຕິບັດຕົວຈິງຂອງນັກສໍາມະນາກອນໄດ້ 80 ກວ່າສ່ວນຮ້ອຍຈາກຜົນສຳເລັດໃນການເຝິກອົບຮົມໄລຍະ 3 ວັນຜ່ານມາ.

ໂອກາດນີ້ ທ່ານ ເສີມສີ ສຸລິຕະ ຮອງຫົວໜ້າພະແນກກະສິກໍາແລະ ປ່າໄມ້ແຂວງເຊກອງ ໄດ້ຍ້ອງຍໍຊົມເຊີຍ ແລະ ຮຽກຮ້ອງໃຫ້ນັກສໍາມະນາກອນພາຍຫຼັງໄດ້ຮຽນພາກທິດສະດີ ແລະ ພາກປະຕິບັດຕົວຈິງແລ້ວ,ເອົາບົດຮຽນອັນຫລໍ້າຄ່າໃນຝຶກອົບຮົມຄັ້ງນີ້ໄປນໍາໃຊ້ເຂົ້າໃນວຽກງານການຜະລິດມັນຕົ້ນຢູ່ພາຍໃນບ້ານຂອງຕົນໃຫ້ໄດ້ຮັບທັງປະລິມານ ແລະຄຸນນະພາບສູງ,ສາມາດຕອບສະໜອງຕາມຄວາມຮຽກຮ້ອງຕ້ອງການຂອງສັງຄົມ ແລະ ທ້ອງຕະຫຼາດ ແນໃສ່ເຮັດໃຫ້ສະຫະກອນມີຄວາມຮູ້,ຄວາມສາມາດໃນການຜະລິດສິນຄ້າໃຫ້ໄດ້ສູງຂຶ້ນ.