ມີເດຍລາວແຂວງໄຊສົມບູນ ຂ່າວ: ພຸດທະສອນ ເວດສະວົງ
ພິທີເປີດຊຸດຝຶກອົບຮົມວຽກງານຄຸ້ມຄອງເສດຖະກິດ-ແຜນການ ວຽກງານແຜນການ ແລະ ສົ່ງເສີມການລົງທຶນ ຢູ່ແຂວງໄຊສົມບູນ ໄດ້ຈັດຂຶ້ນໃນວັນທີ 9 ສິງຫາ ນີ້ ທີ່ຫ້ອງປະຊຸມພະແນກແຜນການ ແລະ ການລົງທຶນ ແຂວງ ໂດຍການເຂົ້າຮ່ວມ ຂອງທ່ານ ພູພັດ ສິງທາ ວົງໄຊ ຮອງຫົວໜ້າພະແນກແຜນການ ແລະ ການລົງທຶນ ແຂວງ, ມີທ່ານ ບິດ ບົວລິວັນ ຫົວໜ້າສູນຝຶກອົບຮົມເສດຖະກິດ-ແຜນການ ກະຊວງແຜນການ ແລະ ການລົງທຶນ ພ້ອມດ້ວຍທິມງານຈາກສູນກາງ, ສຳມະນາກອນຈາກພະແນກການອ້ອມຂ້າງແຂວງ ຕະຫລອດຮອດ ຫ້ອງການແຜນການ ແລະ ການລົງທຶນ ທັງ 5 ເມືອງ ທົວແຂວງ ເຂົ້າຣ່ວມ.

ການຝຶກອົບຮົມໃນຄັ້ງນີ້ ສຳມະນາກອນຈະໄດ້ຮຽນຮູ້ກ່ຽວກັບການສ້າງແຜນພັດທະນາເສດຖະກິດ-ສັງຄົມແບບ ມີສ່ວນຮ່ວມຂັ້ນບ້ານ, ການສ້າງແຜນພັດທະນາເສດຖະກິດ-ສັງຄົມ 5 ປີ ຂັ້ນເມືອງ, ແລະ ວຽກງານສົ່ງເສີມການລົງທຶນ ເປັນຕົ້ນ ກົດໝາຍສົ່ງເສີມການລົງທຶນ-ກົນໄກປະຕູດຽວ,ວຽກຄົ້ນຄົ້ວວິໃຈໂຄງການ, ການລົງທຶນພາກລັດ ແລະ ເອກະຊົນ ແລະ ການຕິດຕາມການລົງທຶນພາກເອກະຊົົົົົນ.

ທັງນີ້ ກໍເພື່ອເປັນການຍົກລະດັບຄວາມຮູ້, ຄວາມສາມາດທາງດ້ານວິຊາການໃຫ້ແກ່ຂະແໜງແຜນການ ແລະ ການລົງທຶນ ທົ່ວແຂວງໄຊສົມບູນ ໄດ້ຮັບຮູ້ ແລະ ເຂົ້າໃຈ ກ່ຽວກັບການສ້າງແຜນພັດທະນາເສດຖະກິດ-ສັງຄົມ ເພື່ອຮັບໃຊ້ໃຫ້ແກ່ການພັດທະນາເສດຖະກິດ-ສັງຄົມແຕ່ລະໄລຍະ ແລະໃຫ້ມີຄວາມເປັນເອກະພາບກັນ ໃນການຈັດຕັ້ງປະຕິບັດຕົວຈິງໃຫ້ໄດ້ຮັບຜົນດີ ແລະ ເພື່ອຕອບສະໜອງກັບຄວາມຮຽກຮ້ອງຕ້ອງການໃຫ້ແກ່ປະຊາຊົນຢ່າງແທ້ຈິງ ເພາະວ່າການສ້າງແຜນພັດທະນາເສດຖະ ກິດ-ສັງຄົມ ມັນມີຄວາມໝາຍຄວາມສຳຄັນຫລາຍ ໃນການຈັດຕັ້ງຜັນຂະຫຍາຍແນວທາງນະໂຍບາຍຂອງພັກ ແລະ ການຈັດຕັ້ງຄຸ້ມຄອງເສດຖະກິດ-ສັງຄົມ ຊຶ່ງສຳມະນາກອນຈະໄດ້ຮຽນຮູ້ທາງດ້ານທິດສະດີ ແລະ ແບ່ງກຸ່ມຄົ້ນຄວ້າເຮັດຕົວຈິງໄປພ້ອມໆກັນ ໂດຍມີຄູຝຶກທີ່ມາຈາກກົມແຜນການ ກະຊວງແຜນການ ແລະ ການລົງທຶນ ເປັນຜູ້ສິດສອນ ແລະ ຖ່າຍທອດຄວາມຮູ້ໃຫ້ ຊຸດຝຶກອົບຮົມໃນຄັ້ງນີ້ ຈະໄດ້ດຳເນີນເປັນເວລາ 5 ວັນ ຈຶ່ງຈະສຳເລັດ.