ມີເດຍລາວແຂວງຈຳປາສັກ ຂ່າວ: ທັດຊະນະ ໃນວັນທີ 9 ສິງຫາ 2021 ນີ້, ທີ່ຫ້ອງວ່າການແຂວງຈຳປາສັກ. ທ່ານ ໂສມ ບຸດຕະກຸນ ຮອງເຈົ້າແຂວງຈຳປາສັກ, ຜູ້ຊີ້ນຳ ວຽກງານວັດທະນະທຳ-ສັງຄົມ ໄດ້ຕ້ອນຮັບ ແລະພົບປະ ທ່ານ ນາງ ຂັນທະລີ ສີຣິພົງພັນ ຮອງລັດຖະມົນຕີ ກະຊວງສຶກສາທິການ ແລະກິລາ ໃນໂອກາດມາເຄື່ອນໄຫວວຽກງານ ຢູ່ ແຂວງຈຳປາສັກ.

ໂອກາດນີ້, ທ່ານ ໂສມ ບຸດຕະກຸນ ໄດ້ກ່າວຕ້ອນຮັບ ທ່ານຮອງລັດຖະມົນຕີ ໃນການມາເຄື່ອນໄຫວວຽກງານ ຢູ່ ແຂວງຈຳປາສັກ ເທື່ອນີ້, ແລະ ແຂວງຈຳປາສັກ ຜ່ານມາແມ່ນໄດ້ສູ້ຊົນ ຊຸກຍູ້ໃນການການເຄື່ອນໄຫວວຽກງານການສຶກສາ, ປະຕິບັດ ຕາມຫລັກການພື້ນຖານ ແລະ ນະໂຍບາຍຂອງລັດ ກໍ່ຄື ກະຊວງສຶກສາທິການ ແລະກິລາ ກ່ຽວກັບວຽກງານສຶກສາ ໂດຍກຳນົດເອົາການສຶກສາເປັນວຽກງານໃຈກາງ ຂອງການພັດທະນາ ຊັບພະຍາກອນມະນຸດ. ພ້ອມນີ້, ກໍໄດ້ລາຍງານໃຫ້ທ່ານຮອງລັດຖະມົນຕີ ຮູ້ ນະໂຍບາຍຂອງແຂວງ ກ່ຽວກັບ ການນຳໃຊ້ ສະຖານທີ່ ໃນສະຖາບັນການສຶກສາ ໃນການຄວບຄຸມການລະບາດຂອງພະຍາດໂຄວິດ-19 ຢູ່ແຂວງຈຳປາສັກ ນຳອີກ.

ໂອກາດດັ່ງກ່າວ, ທ່ານ ນາງ ຂັນທະລີ ສີຣິພົງພັນ ຮອງລັດຖະມົນຕີ, ໄດ້ສະແດງຄວາມຂອບໃຈ, ພ້ອມທັງໄດ້ຝາກຝັງວຽກງານສຶກສາ ແລະກິລາ. ພ້ອມນັ້ນ ກໍໄດ້ ຕີລາຄາສູງ ຕໍ່ ຄະນະນຳແຂວງຈຳປາສັກ ໃນການ ຊີ້ນຳ ນຳພາ ໂດຍສະເພາະ ໃນການ ຊຸກຍູ້ ການເຄື່ອນໄຫວວຽກງານການສຶກສາ ແລະກິລາ, ສອດຄ່ອງ ກັບແຜນພັດທະນາເສດຖະກິດ-ສັງຄົມ ແລະແຜນພັດທະນາ ຊັບພະຍາກອນມະນຸດ ຢູ່ ແຂວງຈຳປາສັກ. ແລະຊົມເຊີຍ ໃນການ ເປັນດ່ານໜ້າປ້ອງກັນ, ຄວບຄຸມ ແລະແກ້ໄຂການລະບາດພະຍາດໂຄວິດ-19.