ມີເດຍລາວແຂວງເຊກອງ ຕາມການລາຍງານຂອງທ່ານ ໄລສວນ ມິດສຸວັນ ເລຂາພັກເມືອງ, ເຈົ້າເມືອງດາກຈຶງຕໍ່ນັກຂ່າວເມື່ອບໍ່ດົນນີ້ວ່າ: ໃນ 6 ເດືອນຕົ້ນປີ 2021 ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມພາຍໃນເມືອງ ແມ່ນພົບບັນຫາທ້າທາຍຫຼາຍປະການເປັນຕົ້ນແມ່ນສະພາບການລະບາດຂອງພະຍາດໂຄວິດ-19 ເຊິ່ງເຮັດໃຫ້ບາງຂະແໜງການບໍສາມາດປະຕິບັດໄດ້ຕາມແຜນການ. ແຕ່ພາຍໃຕ້ການນໍາພາ-ຊີ້ນໍາຂອງຄະນະພັກ-ອົງການປົກຄອງເມືອງ ດ້ານເສດຖະກິດຂະຫຍາຍຕົວ 4% ເທົ່າກັບ 57,14% ຂອງແຜນການປີ, ລວມຍອດຜະລິດຕະພັນພາຍໃນ (GDP) ບັນລຸ 377,2 ຕື້ກີບ, ສະເລ່ຍ 14 ລ້ານກີບຕໍ່ຄົນຕໍ່ປີ, ໃນນັ້ນຂະແໜງກະສິກໍາ-ປ່າໄມ້ກວມເອົາ 39,38%; ຂະແໜງ ອຸດສາຫະກໍາ 23,33% ແລະການບໍລິການກວມເອົາ 37,29%. ສ່ວນດ້ານງົບປະມານສາມາດເກັບລາຍຮັບໄດ້ 578 ລ້ານກີບເທົ່າກັບ 20% ຂອງແຜນປີ.

ພ້ອມນີ້ ເມືອງ​ໄດ້​ສຸມ​ໃສ່​ຊຸກຍູ້​ ແລະສົ່ງເສີມ​ວຽກການຜະລິດ​ເປັນ​ສິນຄ້າ​ຕາມ​ທ່າແຮງ​ບົ່ມ​ຊ້ອນ ໂດຍ​ເນັ້ນ​ໃສ່​ຂະແໜງ​ກະສິກໍາ ເພື່ອ​ການ​ປູກຝັງ ແລະລ້ຽງສັດ ​ເພື່ອເປັນສິນຄ້າສົ່ງ​ອອກ ຊຶ່ງໃນໄລຍະຜ່ານມາຂະແໜງ​ດັ່ງກ່າວ​ ແມ່ນ​ໄດ້​​ສ້າງ​ວຽກງານເຮັດງານທໍາ ແລະສ້າງລາຍໄດ້ໃຫ້ປະຊາຊົນ, ​ເຮັດ​ໃຫ້ປະຊາຊົນມີຊີວິດການເປັນຢູ່ທີ່ດີຂຶ້ນ, ​ເສດຖະກິດ​ຂອງ​ເມືອງກໍ​ມີ​ການຂະຫຍາຍຕົວ​ ຊຶ່ງ​​ສະແດງອອກ​ໃຫ້​ເຫັນ​ໃນ​ 6 ເດືອນຜ່ານມາ ການສົ່ງອອກສິນຄ້າບັນລຸໄດ້ 6,6 ຕື້ກວ່າກີບທຽບໃສ່ແຜນການປີປະຕິບັດໄດ້ 78%.
ສ່ວນແຜນການພັດທະນາໃນ 6 ເດືອນທ້າຍປີ ທ່ານເຈົ້າເມືອງດາກຈຶງລະບຸວ່າ: ຄະນະພັກ-ຄະນະນໍາຂອງເມືອງ ຕ້ອງເອົາໃຈໃສ່ນໍາພາ-ຊີ້ນໍາຊຸກຍູ້ສົ່ງເສີມການຜະລິດເປັນສິນຄ້າຂອງປະຊາຊົນໃຫ້ເປັນຂະບວນການກວ້າງຂວາງ, ພ້ອມທັງສ້າງເງື່ອນໄຂ, ສ້າງສິ່ງອໍານວຍຄວາມສະດວກ, ພັດທະນາພື້ນຖານໂຄງລ່າງ, ດຶງດູດການລົງທຶນເຂົ້າໃນການພັດທະນາຂົງເຂດວຽກງານຕ່າງໆພາຍໃນເມືອງ ເພື່ອເປັນທ່າແຮງໃນການພັດທະນາເສດຖະກິດໃຫ້ນັບມື້ຂະຫຍາຍຕົວເພີ່ມຂຶ້ນເປັນກ້າວໆ.