ໃນວັນທີ 12 ສິງຫາ ນີ້ ທີ່ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໄດ້ຈັດກອງປະຊຸມລະນຶກວັນສື່ມວນຊົນ ແລະ ການພິມຈຳໜ່າຍ ຄົບຮອບ 71 ປີ ໂດຍການເຂົ້າຮ່ວມຂອງ ທ່ານ ນາງ ສວນສະຫວັນ ວິຍະເກດ ກໍາມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ມີພາກສ່ວນກ່ຽວຂ້ອງເຂົ້າຮ່ວມຢ່າງພ້ອມພຽງ.

ໃນໂອກາດນີ້ ທ່ານ ສົມສະຫວາດ ພົງສາ ຫົວໜ້າກົມສື່ມວນຊົນ ກະຊວງ ຖວທ ລາຍງານການເຄື່ອນໄຫວຂອງສື່ມວນຊົນ ວ່າ: ໃນໜຶ່ງປີຜ່ານມາ ພວກເຮົາໄດ້ປະຕິບັດໜ້າທີ່ວຽກງານຢ່າງຕັ້ງໜ້າ ສຸມທຸກສະຕິປັນຍາ ແລະ ເຫື່ອແຮງຂອງຕົນເຂົ້າໃນວຽກງານການໂຄສະນາເຜີຍແຜ່ຜົນສໍາເລັດທີ່ພົ້ນເດັ່ນໃນວຽກງານການປົກປັກຮັກສາ ແລະ ສ້າງສາພັດທະນາປະເທດຊາດ, ປະກອບສ່ວນໂຄສະນາ ແນວທາງນະໂຍບາຍຕ່າງໆ ຂອງພັກ ແລະ ລັດ, ເຊີດຊູຈິດໃຈຊາດ ແລະ ຄວາມສາມັກຄີປອງດອງ, ປຸກລະດົມນໍ້າໃຈຮັກຊາດ, ຮັກລະບອບ ໃໝ່,  ແລະ ຕ້ານປະກົດການຫຍໍ້ທໍ້ຕ່າງໆ ແລະ ຄວາມເປັນເຈົ້າຕົນເອງ, ສ້າງຄວາມເຂັ້ມແຂງດ້ວຍຕົນເອງ ພາຍໃຕ້ການນໍາພາ-ຊີ້ນໍາຂອງພັກເວົ້າລວມ, ເວົ້າສະເພາະແມ່ນຄະນະພັກ, ຄະນະນໍາກະຊວງ ຖວທ,

ອັນພົ້ນເດັ່ນທີ່ສຸດ, ໃນໄລຍະທີ່ມີການລະບາດຂອງພະຍາດໂຄວິດ-19 ເຊິ່ງສະພາບກໍມີຄວາມຫຍຸ້ງຍາກ ແລະ ສິ່ງທ້າທາຍ ເປັນຕົ້ນດ້ານເສດຖະກິດ, ທ່າມກາງຄວາມສ່ຽງຈາການຕິດເຊື້ອພະຍາດໂຄວິດ-19 ແຕ່ສື່ມວນຊົນເຮົາ ຍັງເຄື່ອນໄຫວເຮັັດໜ້າທີ່ປະກອບສ່ວນໂຄສະນາໃຫ້ແກ່ວຽກງານປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ດັ່ງກ່າວ ຢ່າງກວ້າງຂວາງ, ເລິກເຊິ່ງ ແລະ ທັນສະພາບການ.

ທ່ານ ນາງ ສວນສະຫວັນ ວິຍະເກດ ກໍາມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ໄດ້ໃຫ້ກຽດໂອ້ລົມ ວ່າ: ຕະຫຼອດ​ໄລ​ຍະ 71 ປີແຫ່ງການສ້າງຕັ້ງສື່ມວນຊົນ ແລະ ການພິມຈຳໜ່າຍ ກໍ່ຄື 46 ປີແຫ່ງການປົກປັກຮັກສາ ແລະ ພັດທະນາປະເທດຊາດ ເຖິງແມ່ນວ່າ ການເຄື່ອນໄຫວຽກງານຂອງສື່ມວນຊົນ ແລະ ການພິມຈຳໜ່າຍ ໄດ້ປະສົບກັບອຸປະສັກ ແລະ ສິ່ງທ້າທາຍທົດສອບ ທັງພາຍໃນ ແລະ ພາຍນອກຢ່າງໜັກໜ່ວງນາໆປະການກໍ່ຕາມ, ແຕ່ດ້ວຍຄວາມຕັດສິນໃຈ, ຄວາມເສຍສະຫຼະ, ຄວາມຮັບຜິດຊອບການເມືອງຂອງພະນັກງານ, ສະມາຊິກພັກ ນັກຮົບສື່ມວນຊົນ ພວກທ່ານຍັງສາມາດຍາດໄດ້ຜົນງານອັນໃຫຍ່ຫຼວງຫຼາຍດ້ານມາໃຫ້ກັບປະເທດຊາດ ແລະ ປະຊາຊົນລາວບັນດາເຜົ່າຕະຫຼອດໄລຍະທີ່ຜ່ານມາ.ສົມກັບຄຳເວົ້າທີ່ວ່າ: ສື່ມວນຊົນ ແລະ ການພິມຈຳໜ່າຍ ແມ່ນອາວຸດທີ່ແຫຼມຄົມ ທີ່ມີຜົນງານຢ່າງຫຼວງຫຼາຍ ແລະ ນຳເອົາຜົນປະໂຫຍດໃຫຍ່ຫຼວງທີ່ສຸດໃຫ້ແກ່ປະເທດຊາດຂອງພວກເຮົາ.

ຂ້າພະເຈົ້າ ຕີລາຄາສູງ ທີ່ເຫັນວ່າ ຕະຫຼອດໄລຍະ 71 ປີຜ່ານມາ ສື່ມວນຊົນ ແລະ ການພິມຈຳໜ່າຍ ທຸກອົງການ ທັງຢູ່ສູນກາງ ແລະ ທ້ອງຖິ່ນ ໄດ້ເຕີບໃຫຍ່ເຂັ້ມແຂງ ໄດ້ປະກອບສ່ວນຢ່າງສຳຄັນໃຫຍ່ຫຼວງ ເຂົ້າໃນພາລະກິດແຫ່ງການຕໍ່ສູ້ກູ້ຊາດໃນເມື່ອກ່ອນ ກໍຄືພາລະກິດແຫ່ງການປົກປັກຮັກສາ ແລະ ພັດທະນາປະເທດຊາດໃນໄລຍະໃໝ່. ໃນໂອກາດວັນປະຫວັດສາດອັນມີຄວາມໝາຍສຳຄັນນີ້, ຂ້າພະເຈົ້າຕາງໜ້າຄະນະນຳ, ຄະນະພັກກະຊວງກໍຄືໃນນາມສ່ວນຕົວ ຂໍສະແດງຄວາມຍ້ອງຍໍຊົມເຊີຍນັກຮົບສື່ມວນຊົນ ແລະ ການພິມຈໍາໜ່າຍທີ່ໄດ້ຜ່ານຜ່າອຸປະສັກຄວາມຫຍຸ້ງຍາກຕ່າງໆນາໆ ທັງສະຫຼະເຫື່ອ​ແຮງ, ກຳ​ລັງ​ວັງ​ຊາ ແລະ​ ສະ​ຕິ​ປັນ​ຍາໃຫ້ແກ່ພາລະກິດທີ່ມີກຽດສະຫງ່າຂອງພັກນີ້ ຢ່າງສຸດອົກສຸດໃຈ.