ມີເດຍລາວແຂວງຄຳມ່ວນ ພິທີດັ່ງກ່າວໄດ້ຈັດຂຶ້ນໃນວັນທີ 11 ສິງຫາ 2021 ຢູ່ທີ່ດ່ານສາກົນນໍ້າພາວ ເມືອງຄຳເກີດ ແຂວງບໍລິຄຳໄຊ ກອງບັນຊາການຕຳຫຼວດແຂວງຮ່າຕິ່ງ ສສ ຫວຽດນາມ ເຊິ່ງນຳໂດຍ ທ່ານ ພັອ ຫງວຽນ ຫິ່ວ ທຽນ ຮອງຫົວໜ້າກອງບັນຊາການ ຕຳຫຼວດ ແຂວງ ຮ່າຕິ່ງ ພ້ອມຄະນະໄດ້ນຳເອົາ #ເຄື່ອງຊ່ວຍເຫຼືອປະເພດອຸປະກອນການແພດມາມອບໃຫ້ກອງບັນຊາການ ປກສ ແຂວງຄຳມ່ວນ ແລະ ກອງບັນຊາການ ປກສ ແຂວງ ບໍລິຄຳໄຊ ເພື່ອປະກອບສ່ວນຊ່ວຍເຫຼືອ ເຂົ້າໃນວຽກງານຕ້ານ ແລະ ສະກັດກັ້ນ ໂລກລະບາດ COVID19. ສະເພາະ ເຄື່ອງທີ່ນຳມາມອບໃຫ້ກອງບັນຊາການ ປກສ ແຂວງຄຳມ່ວນ ໃນຄັ້ງນີ້ ປະກອບມີ : ຜ້າອັດປາກ, ຊຸດຄຸມການແພດ, ເຈວລ້າງມື, ເຄື່ອງວັດແທກອຸນຫະພູມ, ຜົງຢາຂ້າເຊື້ອ, ຈັກຜົ່ນຢາຂ້າເຊື້ອລວມມູນຄ່າທັງໝົດ 180 ລ້ານດົ່ງ ໂດຍການກ່າວມອບຂອງທ່ານ ພັອ. ຫງວຽນ ຫິ່ວ ທຽນ ຮອງກອງບັນຊາການ ປກສ ແຂວງ ແລະ ກ່າວຮັບໂດຍ ທ່ານ ພັທ ທິບພະຈັນ ໂພໄຊ ຫົວໜ້າກອງບັນຊາການ ປກສ ແຂວງຄຳມ່ວນ, ມີບັນດາພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ພັອ. ຫງວຽນ ຫິ່ວ ທຽນ ຮອງຫົວໜ້າກອງບັນຊາການ ຕຳຫຼວດ ແຂວງ ຮ່າຕິ່ງ ໄດ້ມີຄຳເຫັນວ່າ: ພາຍໃຕ້ສາຍພົວພັນມິດຕະພາບທີ່ເປັນມູນເຊື້ອອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງຫວຽດນາມ-ລາວ, ພັກ-ລັດ ແລະ ປະຊາຊົນຫວຽດນາມ ພ້ອມທີ່ຈະໃຫ້ການຊ່ວຍເຫລືອພັກ-ລັດ ແລະ ປະຊາຊົນລາວ ເວົ້າສະເພາະ ປະຊາຊົນຊາວແຂວງຄຳມ່ວນ ໃນທຸກເວລາ ເພື່ອຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ -19 ບໍ່ໃຫ້ຂະຫຍາຍເປັນບໍລິເວນກວ້າງ ພ້ອມທັງເຊື່ອຫມັ້ນຢ່າງໜັກແໜ້ນວ່າ ຫວຽດນາມ-ລາວຈະຄຽງບ່າຄຽງໄລ່ກັນ, ຈັບມືກັນຜ່ານຜ່າວິກິດການຄັ້ງນີ້ໄປໄດ້ໂດຍໄວ.

ໂອກາດດຽວກັນນີ້ ທ່ານ ພັທ ທິບພະຈັນ ໂພໄຊ ຫົວໜ້າກອງບັນຊາການ ປກສ ແຂວງຄຳມ່ວນ ໄດ້ຕາງຫນ້າໃຫ້ ກຳ ລັງປ້ອງກັນຄວາມສະຫງົບ ແຂວງຄຳມ່ວນ ໄດ້ຕີລາຄາສູງ ແລະ ສະແດງຄວາມຂອບໃຈ ຕໍ່ການຊ່ວຍເຫລືອອັນລ້ຳຄ່າຂອງພັກ-ລັດ ແລະ ປະຊາຊົນແຂວງຮ່າຕິ່ງ ທີ່ຍາມໃດກໍ່ເປັນຫ່ວງເປັນໄຍ ຕໍ່ພັກ-ລັດ ແລະ ປະຊາຊົນລາວມາໂດຍຕະຫລອດ ພ້ອມທັງໃຫ້ຄຳຫມັ້ນສັນຍາວ່າຈະນຳເອົາເຄື່ອງຊ່ວຍເຫລືອ ໃນຄັ້ງນີ້ໄປນຳໃຊ້ເຂົ້າໃນວຽກງານປ້ອງກັນ, ຄວບຄຸມ ແລະ ສະກັດກັ້ນພະຍາດໂຄວິດ -19 ໃຫ້ເກີດຜົນປະໂຫຍດສູງສຸດ.