ມີເດຍລາວແຂວງຫຼວງນ້ຳທາ ຂ່າວ: ສົມພອນ ຂຸນດາວົງ ວັນທີ 10 ສິງຫາ 2021 ນີ້ ຢູ່ທີ່ລັດວິສາກະກິດນໍ້າປະປາສາຂາແຂວງຫຼວງນໍ້າ ໄດ້ຈັດພິທີມອບຮັບຢາຂ້າເຊື້ອນໍ້າປະປາ ຈໍານວນ 10ໂຕນ, ມຸນຄ່າ 50 ພັນຢວນ ໂດຍໄດ້ຮັບການຊ່ວຍເຫຼືອລ້າຈາກ ເມືອງ ຫຼ້າ ສ ປ ຈີນ ມາມອບໃຫ້ລັດວິສາຫະກິດນໍ້າປະປາສາຂາແຂວງຫຼວງນໍ້າທາ, ໂດຍການເປັນປະທານຂອງທ່ານ ໄຊສະໜອນ ວົງສໍາພັນ ອໍານວຍການລັດວິສາຫະກິດນໍ້າປະປາ ສາຂາແຂວງຫຼວງນໍ້າທາ, ທ່ານ ໝ່າເຈິງຈູນ ຫົວໜ້າຫ້ອງການ ການຕ່າງປະເທດ ເມືອງ ຫຼ້າ ສປ ຈີນ ພ້ອມດ້ວຍຄະນະ, ໂດຍການເຂົ້າຮ່ວມຂອງ ທ່ານ ສີພອນ ກອງຈໍາປາ ກຳມະການພັກແຂວງ ຫົວໜ້າພະແນກ ການຕາງປະເທດ ແຂວງຫຼວງນໍ້າທາ ຕະຫຼອດຮອດພະນັກງານວິຊາການລັດວິສາຫະກິດນໍ້າປະປາ ແຂວງຫຼວງນໍ້າທາເຂົ້າຮ່ວມ.

ການມອບຢາຂ້າເຊື້ອໃນຄັ້ງນີ້ເພື່ອເຮັດໃຫ້ລັດວິສາຫະກິດນໍ້າປະປາແຂວງ ຫຼວງນໍ້າທາ ນໍາໄປໃຊ້ເຂົ້າໃນວຽກງານບໍາບັດ ແລະ ປັບປຸງຄຸນນະພາບນໍ້າໃຫ້ສະອາດ, ມີຄຸນນະພາບສູງຄຶດັ່ງທີ່ພວກເຮົາຮູ້ນໍາກັນແລ້ວວ່າໃນຊ່ວງທີ່ມີການແຜ່ລະບາດຂອງພະຍາດໂຄວິດ-19. ເວົ້າລວມ-ເວົ້າສະເພາະກໍ່ເພື່ອເປັນການສະໜອງນໍ້າສະອາດໃຫ້ພໍ່ແມ່ປະຊາຊົນໄດ້ຊົມໃຊ້ພາຍໃນເທດສະ ບານແຂວງ, ເທດສະບານເມືອງໃນແຂວງຫຼວງນໍ້າທາ. ໂອກາດດັ່ງກ່າວກໍ່ໄດ້ມີການເຊັນມອບ-ຮັບເຄື່ອງຊ່ວຍເຫຼືອ ຮວ່ມກັນລະຫວ່າງ ທ່ານ ສີພອນ ກອງຈໍາປາ ກໍາມະການພັກແຂວງ ຫົວໜ້າພະແນກການຕ່າງປະເທດແຂວງ, ທ່ານ ໄຊສະໝອນ ວົງສໍາພັນ ອໍານວຍການລັດວິສາຫະກິດນໍ້າປະປາສາຂາແຂວງຫຼວງນໍ້າທາ ແລະ ທ່ານ ໝ່າເຈິງຈູນ ຫົວໜ້າຫ້ອງການຕ່າງປະເທດ ເມືອງຫຼ້າ ສ ປ ຈີນ ໂດຍມີພະນັກງານວິຊາການທັງສອງຝ່າຍເຂົ້າຮ່ວມເປັນສັກຂິພິຍານ.

ທ່ານ ໄຊສະໜອນ ວົງສໍາພັນ ອໍານວຍການລັດວິສາຫະກິດນໍ້າປະປາສາຂາ ແຂວງຫຼວງນໍ້າທາ ໄດ້ກ່າວ ຂອບໃຈມາຍັງອົງການປົກຄອງເມືອງ ຫຼ້າ ກໍ່ຄືຫ້ອງການຕ່າງປະເທດ ເມືອງຫຼ້າ ສປຈີນ ທີ່ໄດ້ເຫັນຄວາມສໍາຄັນໃນຄັ້ງນີ້ ແລະຈະໄດ້ນຳຢາຂ້າເຊື້ອນີ້ເຂົ້າໃນການຜະລິດນ້ຳປະປາສາຂາແຂວງຫຼວງນ້ຳທາເພື່ອໃຫ້ນ້ຳມີຄວາມສະອາດປາສະຈາກເຊື້ອໂລກຕ່າງໆທີ່ມາກັບນ້ຳ ແລະ ກໍ່ຫວັງຢາງຍິ່ງວ່າໃນໂອກາດໜ້າຈະໄດ້ຮັບການຊ່ວຍເຫຼຶອຈາກຄະນະພັກ ແລະປະຊາຊົນເມືອງຫຼ້າຕື່ມອີກ.