ມີເດຍລາວແຂວງສາລະວັນ ພິທີໂຮມຊຸມນຸນມິດຕິງສະເຫຼີມສະຫຼອງ ວັນລັດຖະທໍາມະນູນ ແຫ່ງ ສປປ ລາວ ຄົບຮອບ 30 ປີ ( 15 ສິງຫາ 1991 – 15 ສິງຫາ 2021 ) ທີ່ໄດ້ຈັດຂຶ້ນທີ່ຫໍປະຊຸມສະພາແຫ່ງ ຊາດ. ພະນັກງານນໍາພາ-ຄຸ້ມຄອງ, ສະມາຊິກພັກ ແລະ ພະນັກງານລັດຖະກອນ ພະແນກຖະແຫຼງຂ່າວ, ວັດທະ ນະທຳ ແລະ ທ່ອງທ່ຽວແຂວງສາລະວັນ ເຂົ້າຮ່ວມງານດັ່ງກ່າວ ຜ່ານການຖ່າຍທອດສົດຈາກໂທລະພາບແຫ່ງຊາດ.

ໃນໂອກາດທີ່ມີຄວາມໝາຍຄວາມສຳຄັນນີ້, ພະນະ ທ່ານ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດ ແຫ່ງ ສປປ ລາວ ກໍ່ໄດ້ກ່າວສູນທອດພົດ ກ່ຽວກັບວັນລັດຖະທຳມະນູນ ແຫ່ງ ສປປ ລາວ ເປັນເຫດການບ້ານເມືອງທີ່ມີຄວາມຫມາຍປະຫວັດສາດສໍາຄັນອີກວັນຫນຶ່ງ ຂອງຊາດລາວເຮົາ, ທັງເປັນໂອກາດ ທີ່ພວກເຮົາ ຈະໄດ້ຫວນຄືນ ປະຫວັດສາດອັນຍາວນານຂອງຊາດເຮົາອີກຄັ້ງຫນຶ່ງ ເຖິງຄວາມເປັນມາຂອງຊາດລາວເຮົາ ແລະ ທົບທວນຄືນຂະບວນວິວັດ ແຫ່ງການຕໍ່ສູ້ອັນຍາວນານ ຂອງບັນພະລຸດລາວເຮົາ, ຈົນກ້າວມາເຖິງຈຸດສູງທາງປະຫວັດສາດ ຂອງຊາດເຮົາ ຄືການໄດ້ ມາເຊິ່ງລັດຖະທໍາມະນູນສະບັບທໍາອິດ ຂອງລະບອບໃຫມ່ ທີ່ໄດ້ຊື່ວ່າ : ລັດຖະທໍາມະນູນແຫ່ງ ສາທາລະນະລັດ ປະຊາທິປະ ໄຕ ປະຊາຊົນລາວ ຂຶ້ນຢ່າງສະຫງ່າຜ່າເຜີຍ, ການທີ່ຖືວ່າ ລັດຖະທໍາມະນູນສະບັບປະຖົມມະລຶກ ຂອງລັດເຮົາ ທີ່ສະພາປະຊາຊົນສູງສຸດ ມີມະຕິຕົກລົງຮັບຮອງເອົາ ໃນວັນທີ 14 ເມສາ 1991 ແລະ ປະທານປະເທດ ໄດ້ອອກລັດຖະດໍາລັດປະກາດໃຊ້ ໃນວັນທີ 15 ສິງຫາ 1991, ນີ້ ຖືໄດ້ວ່າ ສາທາລະນະລັດ ປະຊາທິປະໄຕ ປະຊາຊົນລາວ ເປັນລັດທີ່ປົກຄອງດ້ວຍ ກົດຫມາຍຢ່າງເປັນຮູບປະທໍາຢ່າງແທ້ຈິງ ໃນຜືນແຜ່ນດິນແຫ່ງນີ້, ລັດຖະທໍາມະນູນ ທີ່ຖືໄດ້ວ່າ ເປັນກົດຫມາຍແມ່ ຫຼື ອາດເວົ້າໄດ້ວ່າ ເປັນແມ່ ແຫ່ງກົດຫມາຍສະບັບນີ້, ແມ່ນໄດ້ມາຈາກຫມາກຜົນຂອງການຕໍ່ສູ້ອັນຍືດເຍື້ອຍາວນານ, ເຕັມໄປດ້ວຍຄວາມ ເສຍສະຫຼະ ຂອງບັນພະບູລຸດເຮົາ ໂດຍສະເພາະພາຍຫຼັງມີພັກປະຕິວັດນໍາພາ ທີ່ນໍາໂດຍ ປະທານ ໄກສອນ ພົມວິຫານ ທີ່ເຄົາລົບຮັກ ແລະ ບັນດາສະຫາຍ ການນໍາລຸ້ນ ກໍ່ຕັ້ງທີ່ໄດ້ເດັດດ່ຽວຫນຽວແຫນ້ນ, ນໍາພາປະຊາຊົນຕໍ່ສູ້ ເພື່ອໃຫ້ໄດ້ມາເຊິ່ງ ເອກະລາດແຫ່ງຊາດ, ອໍານາດອະທິປະໄຕ, ເສລີພາບ ແລະ ຜືນແຜ່ນດິນອັນຄົບຖ້ວນ, ກ້າວໄປສູ່ການສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນຢ່າງສະຫງ່າອົງອາດ ແລະ ຈາກນັ້ນ ໄດ້ໃຊ້ເວລາປະມານ 16 ປີ ຈຶ່ງສາມາດ ປະກາດໃຊ້ລັດຖະທໍາມະນູນ ສະບັບທໍາອິດຂອງຊາດ.

ກ່ອນອື່ນ, ກໍ່ໄດ້ຮັບຟັງການກ່າວບົດປາໃສຂອງ ທ່ານ ປອ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ໃນງານດັ່ງກ່າວ, ທ່ານກໍໄດ້ເວົ້າເຖິງໄລຍະ 5 ປີຕໍ່ໜ້ານີ້ (2021-2026), ສະພາແຫ່ງຊາດ ຊຸດທີ IX ຈະໄດ້ສືບທອດມູນເຊື້ອອັນດີງາມຂອງສະພາແຫ່ງຊາດ ຊຸດຜ່ານມາ, ສູ້ຊົນສ້າງການຫັນປ່ຽນຢ່າງແຂງແຮງ, ເລິງເຊິ່ງ ແລະ ຮອບດ້ານ ໃນດ້ານການຈັດຕັ້ງ ແລະ ການເຄື່ອນໄຫວປະຕິບັດພາລະບົດບາດ ທີ່ສຳຄັນຂອງຕົນ, ເປັນຕົ້ນແມ່ນຮ່ວມກັບສະພາປະຊາຊົນຂັ້ນແຂວງ ຕັ້ງໜ້າຕິດຕາມ, ກວດກາ, ຊຸກຍູ້ ການຈັດຕັ້ງປະຕິບັດລັດຖະທໍາມະນູນ, ກົດໝາຍ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX, ບັນດາມະຕິ ຂອງສະພາແຫ່ງຊາດ, ສະພາປະຊາຊົນແຂວງ, ນະຄອນ ຫຼວງວຽງຈັນ…ພິເສດ ແມ່ນການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກ ດ້ານເສດຖະກິດ-ການເງິນ ແລະ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ.

ພິທີດັ່ງກ່າວໄດ້ຈັດຂຶ້ນໃນວັນທີ 13 ສິງຫາ 2021, ນໍາພາໂດຍ ທ່ານ ບຸນກອງ ເກດທອງຄໍາ ຮອງເລຂາຄະນະພັກຮາກຖານ ຮອງຫົວໜ້າພະແນກ ຖວທ ແຂວງ, ມີບັນດາທ່ານຄະນະພັກຮາກຖານ, ຄະນະພະແນກ, ຫົວໜ້າ-ຮອງຫ້ອງການ, ຫົວໜ້າ-ຮອງຂະແຫນງ, ພະນັກງານສະຊິກພັກ ແລະ ພະນັກງານລັດຖະກອນ ເຂົ້າຮ່ວມ.

ໂດຍ: ກິນດາວັນ ອ້ວນນາຄູ