ມີເດຍລາວແຂວງສາລະວັນ ໂດຍ: ທິດລານີ ໂຄດໂຍທາ. ວັນທີ 13 ສິງຫາ 2021ຢູ່ທີ່ຫ້ອງຮັບຮອງຫ້ອງວ່າການແຂວງສາລະວັນ, ທ່ານຫງວຽນ ເຕິນ ຖັນປະທານບໍລິສັດຫງວຽນ ເຕິນ ຖັນ ຂາເຂົ້າ-ຂາອອກ ຈຳກັດຜູ້ດຽວໄດ້ມອບເງິນສົດ 15 ລ້ານກີບ ໃຫ້ອົງການປົກຄອງແຂວງສາລະວັນ ເພື່ອນຊ່ວຍເຫຼືອ ແລະ ນຳໃຊ້ເຂົ້າໃນວຽກງານປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດຂອງພະຍາດໂຄວິດ-19, ຮັບໂດຍ ທ່ານ ນາງ ບຸນທະວີ ດວງລາສີຮອງເລຂາພັກແຂວງ ພ້ອມຄະນະ.

ໂອກາດດຽວກັນນັ້ນທ່ານ ນາງ ບຸນທະວີ ດວງລາສີກໍ່ໄດ້ສະແດງຄວາມຂອບໃຈມາຍັງປະທານບໍລິສັດຫງວຽນ ເຕິນ ຖັນ ຂາເຂົ້າ-ຂາອອກ ພ້ອມດ້ວຍຄະນະ ທີ່ໄດ້ເປັນເຈົ້າການໃຫ້ການປະກອບສ່ວນຊ່ວຍເຫຼືອແຂວງສາລະວັນ, ພ້ອມທັງຮຽກຮ້ອງມາຍັງພາກລັດ-ເອກະຊົນ, ນັກທຸລະກິດ ແລະພໍ່ແມ່ປະຊາຊົນ ຜູ້ທີ່ມີເງື່ອນໄຂ ຈົ່ງພ້ອມກັນປະກອບສ່ວນຊ່ວຍເຫຼືອເຊີ່ງກັນ ແລະ ກັນ ເປັນຕົ້ນ: ເຄື່ອງອຸປະໂພກ-ບໍລິໂພກ, ວັດຖຸ, ປັດໃຈ ແລະອື່ນໆ ເພື່ອຕອບສະໜອງໃຫ້ແກ່ວຽກງານປ້ອງກັນ,ຄວບຄຸມ ແລະແກ້ໄຂການແຜ່ລະບາດພະຍາດໂຄວິດ-19.