ມີເດຍລາວແຂວງເຊກອງ ຂ່າວ-ພາບ: ແດນວົງວິຈິດ
2 ຄອບຄົວທີ່ທຸກຍາກຂາດເຂີນຢູ່ບ້ານທົ່ງຫວາຍເມືອງທ່າແຕງ ແຂວງເຊກອງໄດ້ຮັບເຄື່ອງຊ່ວຍເຫຼືອປະເພດເຄື່ອງອຸປະໂພກ ແລະ ເຄື່ອງບໍລິໂພກໃນຂະນະທີ່ອົງການຈັດຕັ້ງພັກ-ລັດໄດ້ນໍາເອົາເຄື່ອງດັ່ງກ່າວໄປມອບໃຫ້ໃນວັນທີ 13 ສິງຫາ 2021 ນີ້.ລະຫ່ວາງ ທ່ານ ແສງສຸບັນ ໄຊສະຫັວນ ຮອງເຈົ້າເມືອງທ່າແຕງເປັນຜູ້ກ່າວມອບ ແລະ 2 ຄອບຄົວທີ່ທຸກຍາກເປັນຜູ້ກ່າວຮັບ ຊຶ່ງມີອົງການປົກຄອງບ້ານ ແລະ ພາກສ່ວນກ່ຽວຂ້ອງເຂົ້າຮ່ວມ.

ທ່ານ ສີສັກດາ ແສງນາລີວົງຫົວໜ້າ ຫ້ອງການແຮງງານ ແລະ ສະຫວັດດີການສັງຄົມ ເມືອງທ່າແຕງກ່າວວ່າ: ເຄື່ອງທີ່ນໍາມາມອບໃນຄັ້ງນີ້ປະກອບມີ:ຖ້ວຍ,ຊາມ,ຊຸດແຕ່ງກິນ,ເຄື່ອງນຸ່ງຮົ່ມ,ເຂົ້້າສານ,ເກືອ,ນ້ຳຕານ,ໂອຕັກນ້ຳ,ໂດຍເຄື່ອງດັ່ງກ່າວ ແມ່ນໄດ້ມາຈາກຄະນະກໍາມະການຄວບຄຸມໄພພິບັດຂັ້ນແຂວງໂດຍມີຄວາມຈໍາເປັນນໍາໄປມອບຕໍ່ໃຫ້ 2 ຄອບຄົວ ທີ່ທຸກຍາກຂາດເຂີນ ເພື່ອເປັນການແບ່ງເບົາບັນເທົາທຸກໃນເບື້ອງຕົ້ນ.

ສ່ວນ ທ່ານ ນຸຍໄຊ ອາກິງແກ້ວ ເລຂາພັກບ້ານທົ່ງຫວາຍ ຕາງໜ້າໃຫ້ຄອບຄົວທີ່ທຸກຍາກໄດ້ສະແດງຄວາມຮູ້ບຸນຄຸນ ແລະ ຂອບອົກຂອບໃຈ ມາຍັງຄະນະນໍາທຸກຂັ້ນ ທີ່ມີຄວາມເປັນຫ່ວງເປັນໄຍ. ພ້ອມໃຫ້ຄໍາໝັ້ນສັນຍາວ່າ ຈະເອົາເຄື່ອງດັ່ງກ່າວ ນໍາໄປໃຊ້ໃຫ້ຖືກເປົ້າໝາຍ ແລະ ເກີດປະໂຫຍດສູງສຸດ.

ໂອກາດນີ້ທ່ານ ແສງສຸບັນ ໄຊສະຫວັນຮອງເຈົ້າເມືອງທ່າແຕງໄດ້ສະແດງຄວາມເປັນຫ່ວງເປັນໄຍຕໍ່ຄອບຄົວດັ່ງກ່າວ,ພ້ອມຮຽກຮ້ອງໃຫ້ທຸກພາກສ່ວນ ແລະ ປະຊາຊົນພາຍໃນບ້ານ ຈົ່ງມີຄວາມສາມັກຄີ,ປຸກລະດົມຊ່ວຍເຫຼືອເຊິ່ງກັນ ແລະ ກັນ ເພື່ອເຮັດໃຫ້ຊີວິດການເປັນຢູ່ຂອງ ຄອບຄົວທີ່ທຸກຍາກຄ່ອຍດີຂຶ້ນເທື່ອລະກ້າວ.