ມີເດຍລາວແຂວງບໍ່ແກ້ວ ພາບ-ຂ່າວ: ວັນນະເດດ ວິໄລຄຸນ. ວັນທີ 16 ສິງຫາ 2021 ນີ້, ຢູ່ທີ່ໂຮງຮຽນປະຖົມສົມບູນປາກທາ ເມືອງປາກທາ ແຂວງບໍ່ແກ້ວ, ໄດ້ມີພິທີ ຝຶກອົບຮົມການນຳໃຊ້ຄອມພິວເຕີຂັ້ນພື້ນຖານ ໃຫ້ແກ່ຜູ້ບໍລິຫານການສຶກສາຂັ້ນ ໂຮງຮຽນປະຖົມສົມບູນ ທົ່ວເມືອງປາກທາ, ໂດຍການເປັນປະທານຂອງ ທ່ານ ທອງວັນ ພົມມະຫານ ຫົວໜ້າຫ້ອງການສຶກສາທິການ ແລະ ກິລາເມືອງປາກທາ, ມີບັນດາຄູຝືກຂັ້ນແຂວງ, ຄະນະຮັບຜິດຊອບ ຕະຫຼອດຮອດສຳມະນາກອນເຂົ້າຮ່ວມ.

ທ່ານ ທອງວັນ ພົມມະຫານ ຫົວໜ້າຫ້ອງການສຶກສາທິການ ແລະ ກິລາເມືອງ ປະທານພິທີໄດ້ກ່າວເປີດຝຶກອົບຮົມ ແລະ ຮຽກຮ້ອງມາຍັງຄູຝຶກ, ສຳມະນາກອນ ຈົ່ງເອົາໃຈໃສ່ໃນການປະຕິບັດໂມງເວລາ, ເອົາໃຈໃສ່ໃນການສົນທະນາແລກປ່ຽນບົດ ແລະ ຮຽນຮູ້ນຳນັກວິທະຍາກອນ ກໍ່ຄືຄູຝືກ ເພື່ອນຳເອົາບົດຮຽນໃນຄັ້ງນີ້ ໄປໜູນໃຊ້ເຂົ້າໃນໜ້າທີ່ວຽກງານຂອງຜູ້ບໍລິຫານການສຶກສາຂັ້ນໂຮງຮຽນຂອງຕົນ ແລະ ຫັນເປັນອັນທັນສະໄໜ ຕໍ່ໜ້າທີ່ວຽກງານຂອງຜູ້ບໍລິຫານການສຶກສາເທື່ອລະກ້າວ ແລະ ພ້ອມກັນຈັດຕັ້ງປະຕິບັດການຝຶກອົບຮົມໃນຄັ້ງນີ້ໃຫ້ໄດ້ຮັບຜົນດີ ຊຸດຝຶກອົບຮົມໃນຄັ້ງນີ້ດໍາເນີນເປັນເວລາ 5 ວັນ ຈຶ່ງສໍາເລັດ.

ການຝຶກອົບຮົມໃນຄັ້ງນີ້, ເພື່ອໃຫ້ຜູ້ບໍລິຫານການສຶກສາພາຍໃນໂຮງຮຽນສາມາດນຳໃຊ້ຄອມພິວເຕີຂັ້ນພື້ນຖານ ເຂົ້າໃນໜ້າທີ່ວຽກງານທາງດ້ານການບໍລິຫານຄຸ້ມຄອງໂຮງຮຽນ ແລະ ວິຊາສະເພາະຂອງຕົນ, ສະດວກໃນການຮັບ-ສົ່ງ, ຈັດມ້ຽນບັນດາເອກະສານຕ່າງໆ ໃຫ້ມີຄວາມວ່ອງໄວທວງທັນກັບເວລາທີ່ໄດ້ກຳນົດໄວ້, ເຮັດໃຫ້ຜູ້ບໍລິຫານການສຶກສາ, ຄູ-ອາຈານສາມາດສ້າງສື່ການຮຽນ-ການສອນທາງດ້ານເອເລັກໂຕຼນິກໄດ້ ແລະ ແກ້ໄຂບັນຫາຕ່າງໆຂອງຄອມພິວເຕີ, ການຕິດຕັ້ງໂປແກຼມທີ່ຈຳເປັນ ແລະ ວິທີການບຳລຸງຮັກສາຄອມພິວເຕີໃຫ້ໃຊ້ງານໄດ້ຍາວນານ ແລະ ເປັນປົກກະຕິ.