ມີເດຍລາວແຂວງຫຼວງພະບາງ ຂ່າວ: ເພັດສາຄອນ ສິມມະວົງ ວັນທີ 13 ສິງຫາ 2021 ເມືອງນໍ້າບາກ ແຂວງຫຼວງພະບາງ ໄດ້ຈັດກອງປະຊຸມ ຄົບຄະນະບໍລິຫານງານພັກເມືອງ ເປີດກວ້າງ ຄັ້ງທີ 3 ສະໄໝທີ IX ໂດຍການເປັນປະທານຂອງ ສະຫາຍ ສົມຫວັງ ພອນຄໍາວົງສາ ກໍາມະການພັກແຂວງ ເລຂາພັກເມືອງນໍ້າບາກ,ໃຫ້ກຽດເຂົ້າຮ່ວມຂອງສະຫາຍ ຄໍາຂັນ ຈັນທະວີສຸກ ກໍາມະການສູນກາງພັກ ເລາຂພັກແຂວງ ,ມີບັນດາສະຫາຍການນຳຂອງແຂວງ ແລະ ຄະນະບໍລິຫານງານພັກເມືອງເຂົ້າຮ່ວມ.

ສະຫາຍ ສົມຫວັງ ພອນຄໍາວົງສາ ເລຂາພັກເມືອງ ກໍໄດ້ລາຍງານຜົນການຈັດຕັ້ງປະຕິບັດ ການຜັນຂະຫຍາຍ ເນື້ອໃນຈິດໃຈຂອງມະຕິ XI ເຂົ້າສູ່ໜ້າວຽກງານຕົວຈິງ ຕະຫຼອດໄລຍະ 6 ເດືອນຜ່ານມາ ເຊິ່ງສະແດງອອກເມືອງນ້ຳບາກ ໄດ້ຖືເອົາວຽກງານ ປກຊ-ປກສ ເປັນໜ້າທີ່ ແລະ ຄວາມຮັບຜິດ ຂອງທົ່ວປ່ວງຊົນ ອັນໄດ້ເຮັດທົ່ວເມືອງມີສະຖຽນລະພາບທາງດ້ານການເມືອງໜັກແໜ້ນສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ ເຮັດໃຫ້ເສດຖະກິດຂອງເມືອງມີການຂະຫຍາຍຕົວຢ່າງຕໍ່ເນື່ອງໃນລະດັບ 8,8% ລວມຍອດຜະລິດຕະພັນພາຍໃນບັນລຸໄດ້ 757.13 ຕື້ກີບ, ທຽບໃສ່ແຜນການປີປະຕິບັດໄດ້ 70,74%, ສະເລ່ຍຕໍ່ຫົວຄົນໄດ້ 9.531.336 ກີບຕໍ່ຄົນຕໍ່ປີ ເທົ່າກັບ 1.047 ໂດລາຕໍ່ຄົນຕໍ່ປີ.

ໃນນີ້; ດ້ານກະສິກໍາ ແລະ ປ່າໄມ້ 293,52 ຕື້ກີບ ກວມ 38,8% ຂອງ GO; ອຸດສາຫະກຳ ແລະ ຫັດຖະກຳ 350,75 ຕື້ກີບ ກວມ 46,3% ຂອງ GO ແລະ ດ້ານການບໍລິການ 112,85 ຕື້ກີບ ກວມ 14,9% ຂອງ GO.ສາມາດລຶບລ້າງຄອບຄົວທຸກຍາກໄດ້ 30 ຄອບຄົວ ທຽບໃສ່ແຜນປະຕິບັດໄດ້ 9,37%, ສ້າງຄອບຄົວພັດທະນາໄດ້ 45 ຄອບຄົວ ທຽບໃສ່ແຜນປະຕິບັດໄດ້ 45% ແລະລົງກວດກາປະເມີນການສ້າງບ້ານພັດທະນາໄດ້ 6 ບ້ານ.ເດັກໃນເກນອາຍຸໄດ້ເຂົ້າຮຽນກວມ 99,89%, ສັກຢາປ້ອງກັນພະຍາດໃຫ້ແມ່ ແລະ ເດັກບັນລຸ 95%, ສາມາດຄວບຄຸມ ແລະ ສະກັດກັ້ນການແຜ່ລະບາດຂອງພະຍາດໂຄວິດ 19 ໄດ້ເປັນຢ່າງດີ,ອັນພົ້ນເດັ່ນແມ່ນໄດ້ສັກຢາວັກສິນກັນພະຍາດໂຄວິດ 19 ໃຫ້ພະນັກງານ-ລັດຖະກອນ ແລະປະຊາຊົນບັນດາເຜົ່າ ໄດ້ຈຳນວນ 5.515 ຄົນ ກວມ 13,72 % ຂອງປະຊາກອນພາຍໃນເມືອງ (ອາຍຸ 18 ປີຂຶ້ນໄປ). ອັດຕາຊົມໃຊ້ວິດຖ່າຍບັນລຸໄດ້ 92% ຂອງຄອບຄົວທັງໝົດ ແລະປະກາດບ້ານຢຸດຕິການຖ່າຍຊະຊາຍໄດ້ 20 ບ້ານ.ປະຊາຊົນບັນດາເຜົ່າໄດ້ຮັບການປົກປັກຮັກສາວັດທະນະທໍາ ຮີດຄອງປະເພນີ້ອັນດີງານຂອງຊາດຂອງເມືອງໄດ້ເປັນຢ່າງດີ.

ການເຄື່ອນໄຫວຊີ້ນໍາເມືອງນໍ້າບາກ ຂອງສະຫາຍ ຄໍາຂັນ ຈັນທະວີສຸກ ຄັ້ງນີ້ ຍັງມີຕາງໜ້າພະແນກການຂອງແຂວງ ກໍໄດ້ປະກອບຄວາມຄິດເຫັນ ລັກສະນະຊີ້ນໍາ ເພື່ອແລກປ່ຽນບົດຮຽນ ໃນການແກ້ໄຂຂໍ້ຄົງຄ້າງ ບາງບັນຫາຢູ່ພາຍໃນເມືອງຕຶ່ມອີກ.ເປັນຕົ້ນແມ່ນວຽກງານຂະແໜງຊັບພະຍາກອນທໍາມະຊາດ ແລະສິ່ງແວດລ້ອມ,ແຜນການລົງທຶນ,ກະສິກໍາ ແລະປ່າໄມ້ ແລະ ວຽກງານສາທາລະນະສຸກ.

ຈາກນັ້ນສະຫາຍ ຄໍາຂັນ ຈັນທະວີສຸກ ກໍໄດ້ມີທິດຊີ້ນໍາ ເຊິ່ງສະຫາຍໄດ້ກ່າວຊົມເຊີຍ ຄະນະບໍລິຫານງານພັກເມືອງນໍ້າບາກ ໃນການຜັນຂະຫຍາຍ ມະຕິ XI ຂອງສູນກາງພັກ ໄລຍະ 6 ເດືອນຜ່ານມາ,ພ້ອມທັງເນັ້ນບາງບັນຫາ ເພື່ອໃຫ້ຄະນະບໍລິຫານງານພັກເມືອງນໍ້າບາກ ໄດ້ເປັນທິດນໍາໃນການສືບຕໍ່ ຜັນຂະຫຍາຍມະຕິຂອງສູນກາງພັກເຂົ້າວຽກງານຕົວຈິງຂອງແຕ່ລະຂົງເຂດວຽກງານຢູ່ພາຍໃນເມືອງ ໃຫ້ມີຜົນສໍາເລັດຕາມຄາດໝາຍທີ່ວາງໄວ້.

ໂອກາດການມາຢ້ຽມຢາມ ແລະຊີ້ນໍາກອງປະຊຸມຄັ້ງນີ້ ສະຫາຍ ຄໍາຂັນ ຈັນທະວີສຸກ ກໍໄດ້ໄປຢ້ຽມຢາມ ສວນປູກໝາກກ້ຽງບ້ານໂພນໄຊ,ບ້ານປາກມອງ,ສວນໝາກເງາະ-ສົ້ມຂຽວ ທ່ານ ເພັງ ບ້ານນໍ້າງາຕຶ່ມອີກ.