ມີເດຍລາວແຂວງຜົ້ງສາລີ ສະພາປະຊາຊົນແຂວງຜົ້ງສາລີ (ນາງ ສຸກສົມພອນ ແກ້ວແສງພະຈັນ)
ວັນທີ 16 ສິງຫາ 2021 ທີ່ຫ້ອງປະຊຸມໃຫຍ່ສະພາປະຊາຊົນແຂວງ (ສພຂ) ໄດ້ຈັດກອງປະຊຸມສ້າງແຜນກໍານົດພະນັກງານນໍາພາ-ຄຸ້ມຄອງ (ຂັ້ນແຂວງຄຸ້ມຄອງ) ຂອງສະພາປະຊາຊົນແຂວງຜົ້ງສາລີ ແຕ່ປີ 2021-2025 ໂດຍການເປັນປະທານຂອງທ່ານ ທອງສີ ເສົາສຸລິພົມ ຮອງເລຂາພັກແຂວງ ປະທານສະພາປະຊາຊົນແຂວງ ມີຄະນະຮັບຜິດຊອບຂັ້ນແຂວງ, ພະນັກງານ-ລັດຖະກອນ ພາຍໃນສະພາປະຊາຊົນແຂວງເຂົ້າຮ່ວມ.

ກ່ອນດໍາເນີນການທາມທາບແຜນກໍານົດພະນັກງານນໍາພາ-ຄຸ້ມຄອງ ທ່ານ ທອງສີ ເສົາລິພົມ ໄດ້ກ່າວຕໍ່ກອງປະຊຸມເຊິ່ງກ່ອນອື່ນທ່ານກໍໄດ້ຍົກໃຫ້ເຫັນ ເຖິງຄວາມສໍາຄັນຂອງການສ້າງແຜນກຳນົດພະນັກງານນໍາພາ-ຄຸ້ມຄອງ ຂອງສະພາປະຊາຊົນແຂວງ ໂດຍສະເພາະ ການກໍານົດສ້າງແຜນແຕ່ ຮອງເລຂາທິການ, ຫົວໜ້າຂະແໜງ ແລະ ຮອງຫົວໜ້າ 10 ຂະແໜງ. ສ່ວນຕໍາແໜງປະທານ-ຮອງປະທານ ສພຂ, ປະທານ-ຮອງປະທານຄະນະກໍາມະການ, ເລຂາທິການສະພາປະຊາຊົນແຂວງ ແມ່ນໄປຜ່ານການເລືອກຕັ້ງເປັນສະມາຊິກສະພາປະຊາຊົນແຂວງ ແລະ ຄົ້ນຄວ້າພິຈານາ, ຮັບຮອງ ໃນກອງປະຊຸມຄັ້ງປະຖົມມະລືກຂອງສະໄໝນັ້ນໆ ທ່ານຍັງກ່າວຕື່ມອີກວ່າ: ການທາບທາມກໍານົດພະນັກງານພາຄຸ້ມຄອງ-ນໍາພາ ແມ່ນຕ້ອງເອົາໃຈໃສ່ຄົ້ນຄວ້າເລືອກຄົນທີ່ມີຄວາມຮູ້ຄວາມສາມາດ, ຄວາມຮັບຜິດຊອບ ແລະ ຄວາມກະຕືລືລົ້ນໃນການເຮັດວຽກ ຢ່າງເໝະສົມ,

ແທດເຖິງຕົວຈິງ ແລະ ທ່ານຍັງໄດ້ເໜັ້ນບາງບັນຫາຕໍ່ພະນັກງານ-ລັດຖະກອນ ສພຂ ວ່າ: ທຸກຄົນຕ້ອງມີຄຸນທາດການເມືອງໜັກແໜ້ນ ແມ່ນຕ້ອງຍືດໝັ້ນຕໍ່ອຸດົມການຂອງພັກ, ມີຄວາມຈົ່ງຮັກພັກດີຕໍ່ພັກ, ຕໍ່ປະເທດຊາດ ແລະ ລະບອບປະຊາທິປະໄຕ ປະຊາຊົນ, ຈໍາແນກມິດ-ສັດຕູຢ່າງຈະແຈ້ງ, ມີຄວາມຮັບຜິດຊອບສູງຕໍ່ຫນ້າທີ່ວຽກງານທີ່ໄດ້ຮັບມອບຫມາຍ, ເຄົາລົບ ແລະ ປະຕິບັດກົດລະບຽບຂອງພັກ, ລັດຖະທໍາມະນູນ, ກົດໝາຍຂອງລັດ ຢ່າງເຂັ້ມງວດ; ມີຄວາມສາມັກຄີ, ມີປະຫວັດຕົ້ນກໍາເນີດຈະແຈ້ງ ແລະ ການເຄື່ອນໄຫວດີ; ພ້ອມທັງມີຄຸນສົມບັດ, ສິນທໍາປະຕິວັດ ຕ້ອງມີ ຄວາມອົດທົນສູງ, ກ້າເສຍສະຫຼະ, ມີຄວາມເປັນແບບຢ່າງ, ມີຄວາມເດັດຂາດ, ໂປ່ງໃສ ແລະ ມີຄວາມເປັນມືອາຊີບ ຂອງແຕ່ຄົນ. ຈາກນັ້ນ, ທ່ານ ນາງ ວຽງວອນ ແກ້ວວິໄລ ຫົວໜ້າຂະແໜງຄຸ້ມຄອງ-ກໍ່ສ້າງພະນັກງານ ຂຶ້ນແນະນໍາກ່ຽວກັບຂັ້ນຕອນ, ວິທີການທາບທາມ ແລະ ໄດ້ດໍາເນີນການທາບທາມຕາມລະບຽບການ.

ກ່ອນໜ້ານັ້ນວັນທີ ວັນທີ 12 ສິງຫາ 2021 ທີ່ຜ່ານມາ ໂດຍການເປັນປະທານຂອງທ່ານ ຫຸມເພັງ ຈອມວິສານ ກໍາມະການພັກແຂວງ, ຮອງປະທານ ສພຂ; ໄດ້ຈັດຕັ້ງເຊື່ອມຊຶມນິຕິກໍາ ທີ່ກ່ຽວຂ້ອງໃນການກໍານົດພະນັກງານນໍາພາ-ຄຸ້ມຄອງ ເປັນຕົ້ນ: ມະຕິຕົກລົງຂອງຄະນະປະຈໍາພັກແຂວງ ສະບັບເລກທີ 706/ຄພຂ, ລົງວັນທີ 18 ມີນາ 2021 ວ່າດ້ວຍການແຕ່ງຕັ້ງຄະນະຮັບຜິດຊອບການສ້າງແຜນກໍານົດນໍາພາ-ຄຸ້ມຄອງ; ຂໍ້ຕົກລົງຂອງຄະນະປະຈໍາສະພາປະຊາຊົນແຂວງ ສະບັບເລກທີ 84 /ຄປຈຂ, ລົງວັນທີ 22 ກໍລະກົດ 2021 ວ່າດ້ວຍການແຕ່ງຕັ້ງຄະນະຮັບຜິດຊີ້ນໍາ ແລະ ຄະນະວິຊາການຊ່ວຍວຽກການສ້າງແຜນກໍານົດພະນັກງານນໍາພາ-ຄຸ້ມຄອງ ຂອງສະພາປະຊາຊົນແຂວງ ແຕ່ປີ 2021-2025; ບົດລາຍງານຫຍໍ້ ກ່ຽວກັບສະພາບກົງຈັກການຈັດຕັ້ງ ສພຂ; ຄໍາແນະນໍາ ຂອງຄະນະຈັດຕັ້ງສູນກາງພັກ ສະບັບເລກທີ 292/ ຄຈສພ, ວັນທີ 26 ເມສາ 2018 ກ່ຽວກັບວຽກງານສ້າງແຜນກໍານົດພະນັກງານນໍາພາ-ຄຸ້ມຄອງ; ມະຕິ ຂອງກົມການເມືອງ ສູນກາງພັກ ສະບັບເລກທີ 030/ກມສພ, ລົງວັນທີ 03 ມັງກອນ 2018 ວ່າດ້ວຍມາດຖານຂອງພະນັກງານນໍາພາ-ຄຸ້ມຄອງ.