ໃນວັນ 17 ສິງຫາ 2021 ທີ່ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ສປປ ລາວ) ໄດ້ເປີດພິທີເປີດຊຸດຝຶກອົບຮົມພະນັກງານນຳທ່ຽວ ພາສາຈີນ ປີ 2021 ໂດຍຈັດຮ່ວມກັບ ກະຊວງວັດທະນະທຳ ແລະ ທ່ຽວທ່ອງ (ສປ ຈີນ) ແບບທາງໄກ ໂດຍການເປັນປະທານຂອງທ່ານ ວັນສີ ກົວມົວ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຫ່ງ ສປປ ລາວ ພ້ອມດ້ວຍ ທ່ານ ຈາງ ຊູ້ ຮອງລັດຖະມົນຕີກະຊວງວັດທະນະທຳ ແລະ ທ່ອງທ່ຽວ ແຫ່ງ ສປ ຈີນ. ພ້ອມນີ້ມີ ທ່ານ ຊ່ຽງ ຟາງຊຽງ ທີ່ປຶກສາທູດການເມືອງ ປະຈຳສະຖານເອກອັກຄະລັດຖະທູດ ແຫ່ງ ສປ ຈີນ ປະຈຳ ສປປ ລາວ ແລະ ແຂກຜູ້ມີກຽດ ທັງຝ່າຍລາວ ແລະ ຝ່າຍຈີນ, ນັກວິທະຍາກອນ ແລະ ນັກສຳມະນາກອນ ເຂົ້າຮ່ວມ. ຊຸດຝຶກອົບຮົບດັ່ງກ່າວ ແມ່ນໄດ້ຈັດຂຶ້ນໃນວັນທີ 17 ສິງຫາ – 02 ກັນຍາ 2021.

ຈຸດປະສົງຂອງການຈັດຊຸດຝຶກອົບຮົມຄັ້ງນີ້ ແມ່ນເພື່ອສະເຫຼີມສະຫຼອງ ປີມິດຕະພາບ ລາວ-ຈີນ ປີ 2021, ເພື່ອສະເຫຼີມສະຫຼອງວັນສ້າງຕັ້ງພັກກອມມູນິດຈີນ ຄົບຮອບ 100 ປີ ພິເສດແມ່ນ ສະເຫຼີມສະຫຼອງວັນສ້າງຕັ້ງສາຍພົວພັນ ລາວ-ຈີນ ຄົບຮອບ 60 ປີ.

ການຈັດຊຸດຝຶກອົບຮົບພະນັກງານນຳທ່ຽວ ພາສາຈີນ ຄັ້ງນີ້ ແມ່ນເປັນກິດຈະກຳໜຶ່ງທີ່ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຫ່ງ ສປປ ລາວ ແລະ ກະຊວງວັດທະນະທຳ ແລະ ທ່ອງທ່ຽວ ແຫ່ງ ສປ ຈີນ ແມ່ນໄດ້ເຄີຍຈັດມາກ່ອນທີ່ແຂວງຫຼວງພະບາງ ໃນໄລຍະການເຄື່ອນໄຫວຂອງຄະນະຜູ້ແທນຂັ້ນສູງຂອງ ສປ ຈີນ ນຳໂດຍທ່ານ ຫວາງ ຢວງ ກຳມະການກົມການເມືອງພັກຄອມມູນິດຈີນ ພ້ອມດ້ວຍຄະນະ ເດິນທາງມາຢ້ຽມຢາມລັດຖະກິດທີ່ ສປປ ລາວ ໃນໄລຍະ ປີທ່ອງທ່ຽວ ລາວ-ຈີນ 2019 ຜ່ານມານັ້ນ.

ພ້ອມດຽວກັນນັ້ນ, ການຝຶກອົບຮົມໃນຄັ້ງນີ້ ກໍເພື່ອສ້າງຄວາມພ້ອມ ແລະ ຄວາມຮຽກຮ້ອງຕ້ອງການຕົວຈິງເພື່ອກຽມແຜນຮອງຮັບນັກທ່ອງທ່ຽວຈີນ ທີ່ຈະເດິນທາງມາທ່ຽວລາວ ພາຍຫຼັງທີ່ການເປີດນຳໃຊ້ເສັ້ນທາງລົດໄຟ ລາວ-ຈີນ ລວມທັງ ແຜນການເປີດຖ້ຽວບິນເໝົາລຳ ແລະ ເພື່ອສືບຕໍ່ສົ່ງເສີມການເດິນທາງທ່ອງທ່ຽວຂອງສອງປະເທດໃຫ້ກັບມາຟົດຟື້ນຂຶ້ນອີກ ພາຍຫຼັງການລະບາດຂອງພະຍາດໂຄວິດ-19 ໝົດໄປ.

ການຝຶກອົບຮົມຄັ້ງນີ້ກໍແມ່ນກິດຈະກຳໜຶ່ງເພື່ອສົ່ງເສີມວຽກງານທ່ອງທ່ຽວ ແລະ ໄດ້ປະກອບສ່ວນເຂົ້າໃນວຽກງານໂຄສະນາປີມິດຕະພາບ ລາວ-ຈີນ 2021 ນີ້ ເພື່ອໃຫ້ປະຊາຊົນສອງຊາດ ລາວ-ຈີນ ໄດ້ຮັບຮູ້ຊຶ່ງກັນ ແລະ ກັນຢ່າງກວ້າງຂວາງຍິ່ງຂຶ້ນ. ທັງເປັນການຍົກລະດັບຄວາມຮູ້ໃຫ້ແກ່ພະນັກງານນຳທ່ອງທ່ຽວ, ຜູ້ປະກອບການທຸລະກິດການທ່ອງທ່ຽວ, ໂຮງແຮມ, ຮ້ານອາຫານ ຕະຫຼອດເຖິງນັກສຶກສາທີ່ຮຽນຈົບພາສາຈີນຂອງລາວ ລວມທັງການໂຄສະນາສະຖານທີ່ທ່ອງທ່ຽວຂອງລາວ ແລະ ຈີນອີກດ້ວຍ.

ໃນຕໍ່ໜ້ານີ້ ສອງປະເທດ ລາວ-ຈີນ ຍັງຈະໄດ້ຮ່ວມກັນສືບຕໍ່ຈັດຕັ້ງປະຕິບັດບັນດາກິດຈະກຳທີ່ກຳນົດໄວ້ຈົນເຖິງທ້າຍປີ 2021 ດ້ວຍຫຼາຍຮູບແບບກິດຈະກຳ ເຊັ່ນ: ການເປີດບໍລິການຖ້ຽວບິນເໝົາລຳ, ຈັດກອງປະຊຸມສຳມະນາສົ່ງເສີມການທ່ອງທ່ຽວ, ແລກປ່ຽນ ສິລະປະ-ວັດທະນະທຳ, ວາງສະແດງຮູບພາບດ ວາງສະແດງການທ່ອງທ່ຽວ ແລະ ອື່ນໆອີກ ຢູ່ບົນພື້ນຖານການຈັດຕັ້ງປະຕິບັດໄປຕາມເງື່ອນໄຂສະພາບຕົວຈິງ ໃນໄລຍະມີການລະບາດພະຍາດໂຄວິດ-19.

ໃນຕອນທ້າຍພິທີເປີດຊຸດຝຶກອົບຮົມ ທ່ານ ວັນສີ ກົວມົວ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຫ່ງ ສປປ ລາວ ຕາງໜ້າໃຫ້ລັດຖະບານລາວ ກໍຄື ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ຂໍສະແດງຄວາມຂອບໃຈມາຍັງລັດຖະບານ ແຫ່ງ ສປ ຈີນ ກໍຄື ກະຊວງວັດທະນະທຳ ແລະ ທ່ອງທ່ຽວ ແລະ ສະຖານເອກອັກຄະລັດຖະທູດ ແຫ່ງ ສປ ຈີນ ປະຈຳ ສປປ ລາວ ທີ່ໃຫ້ການສະໜັບສະໜູນ ແລະ ປະສານສົມທົບຢ່າງຮອບດ້ານ ເຮັດໃຫ້ການຈັດຊຸດຝຶກອົບຮົມຄັ້ງນີ້ ປະກົດຜົນເປັນຈິງ.

Medialaos MMD