ມີເດຍລາວແຂວງຄຳມ່ວນ ວັນທີ 17 ສິງຫາ 2021 ພະແນກ ຖວທ ແຂວງຄໍາມ່ວນ ໄດ້ຈັດພິທີປາຖະກະຖາ ວັນສ້າງຕັ້ງ ສື່ມວນຊົນ – ການພິມຈຳໜ່າຍ ແລະ ວັນສ້າງຕັ້ງແນວລາວສ້າງຊາດ ຄົບຮອບ 71 ປີ (13 ສິງຫາ 1950 – 13 ສິງຫາ 2021), ໂດຍມີທ່ານ ໄຊສົມບູນ ສຸວັນດາລາ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ມີບັນດາທ່ານໃນຄະນະພະແນກ, ຂະແໜງການ, ກອງວິຊາການ, ພະນັກງານວິຊາການຕະຫຼອດ ເຖິງວິຊາການຂ່າວຈາກພະແນກການອ້ອມຂ້າງແຂວງເຂົ້າຮ່ວມ.

ທ່ານ ໄຊສົມບູນ ສຸວັນດາລາ ຫົວໜ້າພະແນກ ຖວທ ແຂວງໄດ້ຂຶ້ນປະຖະກະຖາ ວັນສ້າງຕັ້ງ ສື່ມວນຊົນ ແລະ ການພິມຈຳໜ່າຍ ເຊິ່ງທ່ານໄດ້ຍົກໃຫ້ເຫັນເຖິງປະຫວັດຄວາມເປັນມາ, ຄວາມໝາຍຄວາມ ສຳຄັນ, ພາລະບົດບາດແຫ່ງການເຕີບໃຫຍ່ຂະຫຍາຍຕົວຂອງວຽກງານສື່ມວນຊົນ ໃນຖານະເປັນກະບອກສຽງ ຂອງອົງການຈັດຕັ້ງຂອງພັກ, ລັດ ແລະ ສັງຄົມໃນການໂຄສະນາ, ສຶກສາອົບຮົມແນວທາງຂອງພັກ, ລະບຽບ ກົດໝາຍຂອງລັດ, ປຸກລະດົມນ້ຳໃຈຮັກຊາດ, ສະໜອງຂໍ້ມູນຂ່າວສານທາງດ້ານການເມືອງ, ເສດຖະກິດ, ສັງຄົມ, ວິທະຍາສາດ, ເຕັກໂນໂລຊີ, ສາລະຄວາມຮູ້, ສາລະບັນເທິງ, ປະກອບສ່ວນ ຕ້ານປະກົດການຫຍໍ້ທໍ້ ໃນສັງຄົມ, ຖ້ອຍທຳນອງທີ່ບິດເບືອນຄວາມເປັນຈິງຂອງພວກຄົນບໍ່ດີ, ເປັນຂົວຕໍ່ລະຫວ່າງພັກກັບປະຊາຊົນ, ເປັນເວທີເສີມຂະຫຍາຍປະຊາທິປະໄຕປະຊາຊົນ ແລະ ສິດເປັນເຈົ້າຂອງປະຊາຊົນບັນດາເຜົ່າ.

ຕະຫຼອດໄລຍະ 71 ປີຜ່ານມາ ເຫັນວ່າວຽກງານສື່ມວນຊົນແມ່ນມີການເຕີບໃຫຍ່ຂະຫຍາຍຕົວຢ່າງໜັກແໜ້ນ ສາມາດນຳໃຊ້ ເຕັກໂນໂລຊີເຂົ້າໃນການເກັບກຳຂໍ້ມູນ ລວມເຖິງມີສື່ໃໝ່ທີ່ເກີດຂຶ້ນ ເປັນຕົ້ນແມ່ນສື່ອອນລາຍ ທີ່ເປັນເງື່ອນໄຂ ເຮັດໃຫ້ການເຜີຍແຜ່ຂໍ້ມູນຂ່າວສານ ມີຄວາມສະດວກ, ກວ້າງຂວາງ ແລະ ລົງເຖິງພໍ່ແມ່ປະຊາຊົນ. ສະເພາະວຽກງານສື່ມວນຊົນພາຍໃນແຂວງຄໍາມ່ວນໃນໄລຍະຜ່ານມາໂດຍການຊີ້ນຳຂອງຄະນະພັກຂັ້ນເທິງ ໄດ້ເຄື່ອນໄຫວຈັດຕັ້ງປະຕິບັດໜ້າທີ່ວິຊາສະເພາະໄດ້ມີຄວາມຫ້າວຫັນ ແລະ ມີຄວາມສະດຸ້ງໄວ, ທາງດ້ານອຸປະກອນ ແລະ ບຸກຄະລາກອນໄດ້ຮັບການພັດທະນາຢ່າງຕໍ່ເນື່ອງ , ດ້ານວັດຖຸອຸປະກອນໃນການ ກະຈາຍພາບ-ສຽງ ກໍ່ໄດ້ຮັບການປັບປຸງໃຫ້ດີຂຶ້ນເປັນແຕ່ລະໄລຍະ ເຊັ່ນ: ສະຖານີໂທລະພາບຂອງແຂວງ ແມ່ນໄດ້ຫັນປ່ຽນຈາກລະບົບອະນາລ໋ອກ ມາເປັນລະບົບດີຈີຕອນ, ສະຖານີວິທະຍຸກໍ່ໄດ້ຮັບການຂະຫຍາຍ ລົງສູ່ຂັ້ນເມືອງ, ບ້ານທີ່ນຳໃຊ້ໂທລະໂຄ່ງກວມເອົາ 90% ຂອງຈຳນວນບ້ານໃນທົ່ວແຂວງ, ທາງດ້ານອຸປະກອບ ເພື່ອຮັບໃຊ້ເຂົ້າໃນວຽກງານສື່ໄດ້ຮັບການປັບປຸງ, ທາງດ້ານບຸກຄະລາກອນກໍ່ໄດ້ຮັບການຍົກລະດັບດີຂຶ້ນ ສາມາດເກັບກຳ ແລະ ເຜີຍແຜ່ຂໍ້ມູນຂ່າວສານ, ແນວທາງນະໂຍບາຍຂອງພັກ, ລະບຽບກົດໝາຍຂອງລັດ ໄດ້ຢ່າງຖືກຕ້ອງ, ຊັດເຈນ ແລະ ກວ້າງຂວາງ.

ໂອກາດດັ່ງກ່າວ ທ່ານ ແສງມະນີ ສີລາເພັດ ຮອງຫົວໜ້າ ພະແນກ ຖວທ ແຂວງ ຍັງໄດ້ເລົ່າຄືນເຖິງມູນເຊື້ອ, ການເຕີບໃຫຍ່ຂະຫຍາຍຕົວ ຂອງວັນສ້າງຕັ້ງແນວລາວ ສ້າງຊາດ ຄົບຮອບ 71 ປີ ທັງນີ້ກໍ່ເພື່ອເຮັດໃຫ້ພະນັກງານ-ລັດຖະກອນໃນຂົງເຂດ ຖວທ ໄດ້ຮັບຮູ້, ເຂົ້າໃຈ ເຖິງຄວາມໝາຍ, ຄວາມສຳຄັນ ຂອງສອງວັນປະຫວັດສາດດັ່ງກ່າວ ເພື່ອພ້ອມກັນເຊື່ອມຊຶມ ກຳແໜ້ນ ເຖິງເນື້ອໃນຄວາມໝາຍ ພ້ອມພາກັນປະກອບສ່ວນຈັດຕັ້ງປະຕິບັດວຽກງານວິຊາສະເພາະຂອງຕົນເອງ ໃຫ້ມີຜົນງານດີເດັ່ນ ເພື່ອເປັນການປະກອບສ່ວນໃນການສ້າງສາພັດທະນາປະເທດຊາດ.