ມີເດຍລາວແຂວງສາລະວັນ ວັນທີ 17 ສິງຫາ 2021 ທີ່ສະໂມສອນແຂວງ, ແຂວງສາລະວັນ ຈັດພິທີໂຮມຊຸມນຸມມິດຕິງສະເຫຼີມສະຫຼອງ ວັນລັດຖະທໍາມະນູນ ແຫ່ງ ສປປ ລາວ ຄົບຮອບ 30 ປີ ( 15 ສິງຫາ 1991-15 ສິງຫາ 2021 ), ໂດຍເປັນກຽດເຂົ້າຮ່ວມຂອງ ທ່ານ ປອ ໂພໄຊ ໄຊຍະສອນ ກຳມະການສູນກາງພັກ ເລຂາພັກແຂວງ ເຈົ້າແຂວງໆສາລະວັນ, ທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານສະພາປະຊາຊົນແຂວງ, ມີອະດີດການນໍາຂອງແຂວງ, ພະນັກງານປະຕິວັດອາວຸໂສ, ບັນດາທ່ານຄະນະປະຈຳພັກແຂວງ, ກຳມະການພັກແຂວງ, ຫົວໜ້າພະແນກ-ຮອງຫົວໜ້າພະແນກການ ແລະຜູ້ຕາງໜ້າອົງການຈັດຕັ້ງອ້ອມຂ້າງແຂວງເຂົ້າຮ່ວມ.

ທ່ານ ປອ ໂພໄຊ ໄຊຍະສອນ ເຈົ້າແຂວງໆສາລະວັນ ໄດ້ກ່າວບົດປາໄສ ໃນພິທີໂຮມຊຸມນຸມສະເຫຼີມສະຫຼອງວັນລັດຖະທຳມະນູນ ແຫ່ງຊາດ ຄົບຮອບ 30 ປີ, ຊື່ງໄດ້ກ່າວໃນບາງຕອນວ່າ: ລັດຖະທຳມະນູນ ເປັນກົດໝາຍແມ່, ເປັນແມ່ແຫ່ງກົດໝາຍ ໄດ້ມາຈາກໝາກຜົນແຫ່ງການຕໍ່ສູ້ເປັນກົດໝາຍພື້ນຖານຂອງຊາດ ເປັນການຫັນແນວທາງປ່ຽນແປງ ໃໝ່ຮອບດ້ານທີ່ມີຫຼັກການຂອງພັກປະຊາຊົນປະຕິວັດລາວເປັນກົດໝາຍພື້ນຖານຂອງລະບອບປະຊາທິປະໄຕ ປະຊາຊົນ ເພື່ອສຶກສາອົບຮົມປະຊາຊົນລາວບັນດາເຜົ່າໃຫ້ຍົກສູງນໍ້າໃຈຮັກຊາດຮັກລະບອບໃໝ່ ເພີ່ມທະວີຄວາມສາມັກຄີທົ່ວປວງຊົນລາວທັງຊາດເຊີດຊູບົດບາດ ປົກປັກຮັກສາ ແລະ ສ້າງສາພັດທະນາປະເທດຊາດຕາມຈຸດໝາຍທິ່ພັກກຳນົດໄວ້.

ການປະກາດໃຊ້ລັດຖະທຳມະນູນເປັນເຫດການ ການເມືອງ ທີ່ສຳຄັນຂອງຊາດ ພ້ອມທັງເປັນຂີດໝາຍໃໝແຫ່ງການຫັນໄປສູ່ການຄຸ້ມຄອງລັດ ຄຸ້ມຄອງສັງຄົມດ້ວຍກົດໝາຍ ແລະ ສ້າງລັດແຫ່ງກົດໝາຍເທື່ອລະກ້າວ, ສ່ອງແສງໃຫ້ເຫັນລັກສະນະທາດແທ້ ແລະ ການເຕີບໃຫຍ່ຂະຫຍາຍຕົວຂອງລະບອບປະຊາທິປະໄຕປະຊາຊົນພາຍໃຕ້ການນຳພາທີ່ປີຊາສາມາດສະຫຼາດສ່ອງໃສຂອງພັກປະຊາຊົນປະຕິວັດລາວ ເປັນການຢັ້ງຢືນຕໍ່ໂລກໃຫ້ຮັບຮູ້ກ່ຽວກັບ ຄວາມເປັນເອກະລາດ ແລະ ຜືນແຜ່ນດິນອັນຄົບຖ້ວນຂອງ ສປປ ລາວ.

ລັດຖະທຳມະນູນແຫ່ງ ສປປ ລາວ ໃນດ້ານທາດແທ້ແມ່ນການສ້າງສະຕິຊາດເອກະພາບ ອັນໜຶ່ງດຽວ ກັນ ພາຍໃຕ້ການນຳພາຂອງພັກຮັບຮູ້ ແລະ ປົກປ້ອງການດຳລົງຄົງຕົວ ທີ່ບໍ່ສາມາດຕັດ ແຍກອອກຈາກ ກັນໄດ້ຂອງປະຊາຊົນລາວບັນດາເຜົ່າ ຊຶ່ງເປັນພາຫະນະດ້ານ ນິຕິກຳທີ່ສຳຄັນ ເພື່ອສຶກສາອົບຮົມປະຊາຊົນຍົກສູງນໍ້າໃຈຮັກຊາດຮັກລະບອບປະຊາທິປະໄຕປະຊາຊົນ ເພີ່ມທະວີຄວາມສາມັກຄີປອງດອງທົ່ວປວງຊົນທັງຊາດເຊີດຊູບົດບາດ ແລະ ຄວາມສາມາດເປັນເຈົ້າ ປະເທດຊາດຂອງປະຊາຊົນລາວບັນດາເຜົ່າເພື່ອພ້ອມກັນສຸມທຸກກຳລັງແຮງ ແລະ ຄວາມສາມາດຂອງຕົນປະກອບສ່ວນເຂົ້າໃນພາລະກິດປົກປັກຮັກສາ ແລະສ້າງສາພັດທະນາປະເທດຊາດ ເຮັດໃຫ້ປະເທດຊາດມັ່ງຄັ່ງເຂັ້ມແຂງ ປະຊາຊົນຮັ່ງມີຜາສຸກ ສັງຄົມມີຄວາມສາມັກຄີປອງດອງ ມີປະຊາທິປະໄຕ ຍຸຕິທຳ ແລະ ສີວິໄລ. ລັດຖະທຳມະນູນ ແລະກົດໝາຍປຽບ ເໝືອນເຄື່ອງມືສຳຄັນ ທີ່ນຳໃຊ້ ເຂົ້າໃນການຄຸ້ມຄອງລັດ, ຄຸ້ມຄອງສັງຄົມໃຫ້ມີຄວາມຍຸຕິທຳ, ສະຫງົບ ແລະ ເປັນລະບຽບຮຽບຮ້ອຍ. ກົດໝາຍບໍ່ອາດມີຜົນສັກສິດໄດ້ ຖ້າຫາກທຸກຄົນໃນສັງຄົມຂາດສະຕິ ແລະ ລະເມີດລະບຽບກົດໝາຍ.

ສະນັ້ນໃນໂອກາດວັນລັດຖະທຳມະນູນ ວັນທີ 15 ສິງຫາ ຄົບຮອບ 30ປີ ຮຽກຮ້ອງ ໃຫ້ຄະນະພັກ, ອຳນາດການປົກຄອງ, ກຳລັງປະກອບອາວຸດ ແລະປະຊາຊົນບັນດາເຜົ່າຊາວແຂວງສາລະວັນ ຈົ່ງພ້ອມກັນເພີ່ມທະວີນໍ້າໃຈຮັກຊາດ, ຄວາມເປັນເຈົ້າຂອງປະເທດຊາດ ແລະຄວາມສາມັກຄີເປັນປຶກແຜ່ນພາຍໃນຊາດ ເພື່ອສ້າງຄວາມເຂັ້ມແຂງໃຫ້ແກ່ປະເທດຊາດ, ເຊື່ອມຊືມ ແລະ ກຳແໜ້ນກ່ຽວກັບລັດຖະທຳມະນູນ ແລະ ກົດໝາຍ ສ້າງເງື່ອນໄຂ ແລະ ຊຸກຍູ້ໃຫ້ທຸກພາກ ເປັນເຈົ້າການປະຕິບັດກົດໝາຍຢ່າງເຂັ້ມງວດ ຮູ້ນຳໃຊ້ກົດໝາຍເພື່ອປົກປ້ອງສິດຜົນປະໂຫຍດອັນຊອບທຳ ແລະ ປະຕິບັດພັນທະຂອງຕົນຢ່າງຖືກຕ້ອງ.

ຈາກນັ້ນໃນ ທ່ານ ຄໍາບຸ່ນ ດ້ວງປັນຍາ ອາດິດການນໍາຂັ້ນສູງຂອງແຂວງ, ກໍໄດ້ໃຫ້ກຽດປະຖະກະຖາ ວັນລັດຖະທໍາມະນູນແຫ່ງຊາດ, ຄົບຮອບ 30 ປີ, ເຊິ່ງທ່ານໄດ້ຍົກໃຫ້ເຫັນບາງບັນຫາທີ່ສໍາຄັນກ່ຽວກັບລັດຖະທໍາມະນູນແຫ່ງຊາດ, ເພື່ອໃຫ້ພະນັກງານການນໍາຫຼັກແຫຼ່ງ, ພະນັກງານສະມາຊິກພັກ ແລະ ພະນັກງານລັດຖະກອນທົ່ວແຂວງ, ໄດ້ຮັບຮູ້ເຂົ້າໃຈຢ່າງເລິກເຊິ່ງ ແລະ ພ້ອມກັນເສີມຂະຫຍາຍລັດຖະທໍາມະນູນແຫ່ງຊາດ ເຂົ້າໃນການປະຕິບັດໜ້າທີ່ການເມືອງຂອງພັກ, ການປົກປັກຮັກສາ ແລະ ສ້າງສາພັດທະນາປະເທດຊາດ.
ໃນພິທີ ຍັງໄດ້ມອບໃບຍ້ອງຍໍຂອງປະທານສະພາປະຊາຊົນແຂວງສາລະວັນ, ໃຫ້ກັບອາດິດການນໍາຂອງແຂວງ, ການນໍາຂອງເມືອງ ແລະ ພາກສ່ວນຕ່າງໆ ທີ່ມີຜົນງານໃນການຈັດຕັ້ງປະຕິບັດລັດຖະທໍາມະນູນ ແລະກົດໝາຍ ໃນໄລຍະ 30 ປີຜ່ານມາ ໃຫ້ກຽດມອບຂອງທ່ານ ສີເຮັ່ງ ຫອມສົມບັດ ຮອງເລຂາພັກແຂວງ ປະທານສະພາປະຊາຊົນແຂວງສາລະວັນ.