ມີເດຍລາວແຂວງວຽງຈັນ ພາບ-ຂ່າວ: ໄຊປັນຍາ ໃນວັນທີ 17 ສິງຫາ 2021. ທີ່ຫ້ອງປະຊຸມຂອງໂຮງຮຽນ ມສ ໂພນໝີ ເມືອງວຽງຄຳ ແຂວງວຽງຈັນ ໄດ້ຈັດພິທີສະຫລຸບປະເມີນຜົນການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ຂອງກຳມະບານຮາກຖານ ໂຮງຮຽນ ມ ສ ໂພນໝີ ປະຈຳປີ 2020. ໂດຍການເປັນປະທານຂອງທ່ານ ນາງ ບົວດຳ ພິລາວົງ ປະທານກຳມະບານຮາກຖານ ໂຮງຮຽນ ມສ ໂພນໝີ, ເປັນກຽດເຂົ້າຮ່ວມຂອງທ່ານ ບົວລຳແພງ ວາງປະດິດ ຮອງປະທານຄະນະບໍລິຫານງານ ສະຫະພັນກຳມະບານແຂວງວຽງຈັນ, ມີທ່ານ ເຄນທອງ ບົວວັງ ເລຂາໜ່ວຍພັກ ອຳນວຍການໂຮງຮຽນ ມສ ໂພນໝີ ແລະ ບັນດາຄູອາຈານ, ສະມາຊິກກຳມະບານເຂົ້າຮ່ວມທັງໝົດ 74 ທ່ານ, ຍິງ 54 ທ່ານ.

ທ່ານ ນາງ ບົວດຳ ພິລາວົງ ໄດ້ຜ່ານບົດສະຫລຸບກ່ຽວກັບ ການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າຂອງກຳມະບານຮາກຖານ ໂຮງຮຽນ ມສ ໂພນໝີ ປະຈຳປີ 2020 ພ້ອມທັງວາງທິດທາງແຜນການປະຈຳປີ 2021, ກຳມະບານຮາກຖານໂຮງຮຽນ ມສ ໂພນໝີ ແມ່ນປະກອບມີຄະນະ 3 ທ່ານ, ຍິງ 2 ທ່ານ, ມີສະມາຊິກກຳມະບານທັງໝົດ 74 ທ່ານ, ຍິງ 60 ທ່ານ, ມີສະມາຊິກກອງທຶນຊ່ວຍເຫລືອເຊິ່ງກັນ ແລະ ກັນ ຈຳນວນ 130 ທ່ານ, ຍິງ 92 ທ່ານ.

ເພຶ່ອເຮັດໃຫ້ພະນັກງານຄູອາຈານ, ສະມາຊິກກຳມະບານ ສາມາດກຳໄດ້ເນື້ອໃນລວມ, ມາດຖານ, ບາດກ້າວໃນການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ, ແນໃສ່ສ້າງຄວາມເປັນເອກະພາບໃນການຊີ້ນຳ – ນຳພາ, ການຊຸກຍູ້, ຕິດຕາມ, ກວດກາ ແລະ ການປະເມີນຜົນການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ໂດຍຕິດພັນກັບຂະບວນການຮັກຊາດ ແລະ ພັດທະນາ, ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ, ຕິດພັນກັບການປະຕິບັດວຽກງານວິຊາສະເພາະການພັດທະນາອົງການຈັດຕັ້ງ ຖັນແຖວຂອງກຳມະບານໃຫ້ມີຄວາມໜັກແໜ້ນ ເຂັ້ມແຂງ ໂດຍອີງໃສ່ເນື້ອໃນຂໍ້ແຂ່ງຂັນ 5 ເປັນເຈົ້າ ຂອງສະຫະພັນກຳມະບານລາວວາງອອກດັ່ງນີ້: 1. ເປັນເຈົ້າການຝຶກຝົນຫລໍ່ຫລອມທາງດ້ານການເມືອງ – ແນວຄິດ ຕີລາຄາການຈັດຕັ້ງປະຕິບັດແມ່ນ 85,48%. 2. ເປັນເຈົ້າການປະຕິບັດກົດໝາຍ ແລະ ລະບຽບການຂອງລັດ ຕີລາຄາໄດ້ 85,01%. 3. ເປັນເຈົ້າການພັດທະນາຕົນເອງ ແລະ ການຈັດຕັ້ງ ຕີລາຄາໄດ້ 85,21%. 4. ເປັນເຈົ້າການປົກປ້ອງສິດ ແລະ ຜົນປະໂຫຍດອັນຊອບທຳ ຕີລາຄາໄດ້ 85,94%. 5. ເປັນເຈົ້າການປະຕິບັດໜ້າທີ່ວິຊາສະເພາະຢ່າງປະດິດສ້າງ ຕີລາຄາໄດ້ 85,38%.

ນອກຈາກນັ້ນວຽກງານສິດສອນຄູອາຈານທຸກໆສະຫາຍໄດ້ຕັ້ງໜ້າແຂ່ງຂັນເຊິ່ງກັນ ແລະ ກັນເພຶ່ອສົ່ງຄວາມຮູ້ໃຫ້ແກ່ນັກຮຽນໃນປີ 2020 – 2021 ສາມາດປະຕິບັດການຂື້ນຫ້ອງສິດສອນທັງໝົດໄດ້ 100%, ພ້ອມກັນນັ້ນຍັງໄດ້ມີການມອບໃບຢັ້ງຢືນການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າປະຈຳປີ 2020 ໃຫ້ກຳມະບານຮາກຖານ ໂຮງຮຽນ ມສ ໂພນໝີ ໃຫ້ກຽດມອບໂດຍທ່ານ ບົວລຳແພງ ວາງປະດິດ ແລະ ຮັບໂດຍທ່ານ ນາງ ບົວດຳ ພິລາວົງ. ກອງປະຊຸມຍັງໄດ້ຮັບຟັງການໂອ້ລົມຂອງທ່ານ ບົວລຳແພງ ວາງປະດິດ ແລະ ທ່ານ ເຄນທອງ ບົວວັງ ເພຶ່ອເປັນເຂັມຊີ້ທິດເຍືອງທາງໃນການຈັດຕັ້ງ ປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ໃຫ້ປະກົດຜົນເປັນຈິງໃນຕໍ່ໜ້າ.