ມີເດຍລາວແຂວງເຊອງ ຂ່າວ:ພຸດທະສອນ ວັນທີ 17 ສິງຫາ 2021 ບັນດາຄະນະສະເພາະກິດປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດອັກເສບປອດສາຍພັນໃໝ່ ( ໂຄວິດ -19 ) ຂັ້ນແຂວງເຊກອງ, ໄດ້ຮ່ວມກອງປະຊຸມທາງໄກ ຜ່ານວີດີໂອຄຼອນເຟິເຣັ້ນ(Video Conference) ເພື່ອລາຍງານ ແລະປຶກສາຫາລືກະກຽມຄວາມພ້ອມໃນການແກ້ໄຂ, ຄວບຄຸມການແຜ່ລະບາດຂອງພະຍາດໂຄວິດ-19, ໂດຍພາຍໃຕ້ການເປັນປະທານຂອງທ່ານ ສຈ.ປອ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ, ຫົວໜ້າຄະນະສະເພາະກິດ ເພື່ອປ້ອງກັນ, ຄວບຄຸມ ແລະແກ້ໄຂການແຜ່ລະບາດພະຍາດໂຄວິດ-19 ແລະມີບັນດາປະທານ ແລະຄະນະສະເພາະກິດຂັ້ນແຂວງໃນຂອບເຂດທົ່ວປະເທດເຂົ້າຮ່ວມ.

ທ່ານຮອງນາຍົກ, ປະທານກອງປະຊຸມ ໄດ້ຍົກໃຫ້ບັນຫາທີ່ຍັງຄົງຄ້າງຜ່ານມາ ຈະມີວິທີການຮັບມື ແລະແກ້ໄຂແນວໃດເປັນຕົ້ນ: ສະຕິຂຂອງສັງຄົມ, ສູນກັກບໍລິເວນບໍ່ໄດ້ມາດຖານ, ສະຖານທີ່ກັກບໍລິເວນບໍ່ທັນໄດ້ຮັບການຄຸ້ມຄອງຢ່າງເຂັ້ມງວດ, ມີແຮງງານລັກເຂົ້າປະເທດຜິດກົດໝາຍ; ນອກນີ້ ທ່ານໄດ້ໃຫ້ທິດຊີ້ນໍາຫຼາຍບັນຫາເພື່ອໃຫ້ບັນດາຂະແໜງການຂັ້ນສູງກາງ ແລະທ້ອງຖິ່ນໃຫ້ສືບຕໍ່ເພີ່ມທະວີການຊີ້ນໍາ-ນໍາພາໃຫ້ແທດເຖິງ ໂດຍສະເພາະກົນໄກການປະສານງານໃຫ້ມັນໂລ່ງລ່ຽນຢູ່ຂັ້ນສູນກາງ ແລະທ້ອງຖິ່ນໃນທົ່ວປະເທດ.
ສຳລັບຢູ່ແຂວງເຊກອງ ທ່ານ ຄຳສອນ ກອນເຍີ ຮອງເຈົ້າແຂວງເຊກອງ, ປະທານຄະນະສະເພາະກິດຂັ້ນແຂວງ ໄດ້ໃຫ້ທິດຊີ້ນໍາ ຕໍ່ບັນດາຄະນະສະເພາະກິດຂັ້ນແຂວງ ໂດຍເລັ່ງໃສ່ການແກ້ໄຂບັນຫາການແຜ່ລະບາດຂອງພະຍາດໂຄວິດ-19 ເປັນຕົ້ນ: ເອົາໃຈໃສ່ເວນຍາມສູນຈໍາກັດບໍລິເວນຢ່າງເຂັ້ມງວດ, ເລັ່ງເກັບຕົວຢ່າງ ແລະຈຳກັດບໍລິເວນຜູ້ທີ່ສຳພັດໃກ້ຊິດກັບຜູ້ຕິດເຊື້ອ ( ກຸ່ມສ່ຽງ ) ເພື່ອກວດຫາເຊື້ອ ໂດຍໄວ, ເອົາໃຈໃສ່ປິ່ນປົວຜູ້ທີ່ຕິດເຊື້ອ, ປັບປຸງຂອດການປະສານງານ, ການສ່ອງແສງລາຍງານ, ການຄຸ້ມຄອງລາຍຮັບ-ລາຍຈ່າຍ, ປັບປຸງສູນຈຳກັດລິເວນ-ໂຮງໝໍພາກສະໜາມ ເພື່ອຮອງຮັບແຮງງານທີ່ມາຈາກປະເທດເພື່ອນບ້ານ ແລະປຸກລະດົມປະຊາຊົນຜູ້ທີ່ມີອາຍຸ 18 ປີຂຶ້ນໄປໆຮັບການສັກວັກຊິນປ້ອງກັນພະຍາດໂຄວິດ-19 ຕາມຈຸດບໍລິການທີ່ຄະນະສະເພາະກໍານົດໄວ້.