ມີເດຍລາວແຂວງບໍ່ແກ້ວ ໂດຍ: ວໍລະສິດ ພິດສະຫາຍ. ໃນວັນທີ 17 ສິງຫາ 2021 ນີ້, ຄະນະພັກຮາກຖານຫ້ອງພະລາທິການ ທະຫານແຂວງບໍໍ່ແກ້ວ ໄດ້ຈັດພິທີເປີດຮຽນສະໜັບສະໜູນ, ກົດລະບຽບພັກ ແລະ ຮັບສະມາຊິກພັກໃໝ່ ໃຫ້ມະຫາຊົນຜູ້ກ້າວໜ້າ, ໂດຍພາຍໃຕ້ການເປັນປະທານເປີດຂອງ ສະຫາຍ ພັນໂທ ຄຳພັນ ແກ້ວວິໄລ ຄະນະພັກຮາກຖານ ຮອງຫົວໜ້າຫ້ອງພະລາທິການ ກອງບັນຊາການທະຫານແຂວງບໍ່ແກ້ວ, ມີຄະນະພັກຮາກຖານ, ອານຸກຳມະການ, ພະນັກງານສະມາຊິກພັກ ຕະຫຼອດ ບັນດາມະຫາຊົນຜູ້ກ້າວໜ້າເຂົ້າຮ່ວມ.

ໃນການຈັດຕັ້ງຮຽນສະໜັບສະໜູນ ແລະ ກົດລະບຽບພັກ ໃຫ້ມະຫາຊົນຜູ້ກ້າວໜ້າຄັ້ງນີ້ ໂດຍປະຕິບັດຕາມກົດລະບຽບຂອງພັກປະຊາຊົນ ປະຕິວັດລາວ ສະໄໝທີ X, ໝວດທີ I, ມາດຕາ 1-2 ວ່າດ້ວຍ ມາດຖານສະມາຊິກພັກ ແລະ ເງື່ອນໄຂຂະຫຍາຍເຂົ້າເປັນສະມາຊິກ ພັກປະຊາຊົນປະຕິວັດລາວ ແລະ ມະຕິຕົກລົງຂອງຄະນະພັກກອງບັນຊາການທະຫານແຂວງບໍ່ແກ້ວ ວ່າດ້ວຍ ການອະນຸມັດມະຫາຊົນຜູ້ກ້າວໜ້າເຂົ້າຮຽນສະໜັບສະໜູນ ແລະ ກົດລະບຽບພັກ ເພື່ອຂະຫຍາຍເຂົ້າພັກໃຫ້ຖືກຕ້ອງຈຳນວນທັງໝົດ 07 ສະຫາຍ ປະກອບມີ: ຮຽນສະໜັບສະໜູນ ຈຳນວນ 02 ສະຫາຍ ແລະ ກົດລະບຽບພັກ ຈຳນວນ 05 ສະຫາຍ, ຍິງ 1 ສະຫາຍ ເຊິ່ງເອກະສານທີ່ນໍາມາຮຽນໃນຄັ້ງນີ້ມີ ຈຳນວນ 11 ບົດຄື: ເອກະສານຮຽນຮູ້ກ່ຽວກັບພັກການເມືອງແມ່ນຫຍັງ ແລະ ເປັນຫຍັງຈຶ່ງມີພັກການເມືອງ, ພັກປະຊາຊົນປະຕິວັດລາວໄດ້ຮັບການສ້າງຕັ້ງຂຶ້ນຄືແນວໃດ, ແມ່ນພັກແນວໃດ, ຈັດຕັ້ງຕາມຫຼັກການອັນໃດ, ມີລະບົບສາຍໃຍການຈັດຕັ້ງຄືແນວໃດ, ປະກອບດ້ວຍບຸກຄົນຄືແນວໃດ, ມີວັດຖຸປະສົງ ແລະ ອຸດົມການຄືແນວໃດ, ມີທາດແທ້ແນວໃດ, ມາດຖານຂອງສະມາຊິກພັກ ແລະ ເງື່ອນໄຂຜູ້ທີ່ຈະເຂົ້າເປັນສະມາຊິກພັກປະຊາຊົນປະຕິວັດລາວມີແນວໃດ, ສະມາຊິກພັກມີໜ້າທີ່, ພັນທະ ແລະ ມີຜົນປະໂຫຍດຫຍັງ, ຂໍ້ຫ້າມສຳລັບສະມາຊິກ ພັກປະຊາຊົນປະຕິວັດລາວມີຫຍັງແດ່, ໃນການຮຽນຄັ້ງນີ້ເພື່ອແນໃສ່ເຮັດໃຫ້ມະຫາຊົນຜູ້ກ້າວໜ້າໄດ້ຮັບຮູ້, ເຊື່ອມຊຶມ, ກຳແໜ້ນຕໍ່ອຸດົມຄະຕິ ແລະ ຈຸດປະສົງຂອງພັກຢ່າງເລິກເຊິ່ງ ເພື່ອກ້າວເຂົ້າເປັນສະມາຊິກພັກທີ່ ດີມີຄຸນນະພາບ ແລະ ເປັນແບບຢ່າງທີ່ດີໃຫ້ມະຫາຊົນຜູ້ກ້າວໜ້າໃນຮຸ່ນຕໍ່ໆໄປ.

ໂດຍໄດ້ກຳນົດໄລຍະເວລາໃນການຮໍ່າຮຽນ ຈຳນວນ 03 ວັນຈຶ່ງສຳເລັດ. ພ້ອມດຽວກັນນັັ້ນຍັງໄດ້ຂື້ນຜ່ານມະຕິຕົກລົງຂອງຄະນະປະຈຳພັກກອງບັນຊາການທະຫານແຂວງບໍ່ແກ້ວ ສະບັບເລກທີ 221 ລົງວັນທີ 02 ສິງຫາ 2021 ວ່າດ້ວຍການອະນຸມັດຮັບເອົາມະຫາຊົນຜູ້ກ້າວໜ້າເຂົ້າເປັນສະມາຊິກພັກສຳຮອງ ຈຳນວນ 03 ສະຫາຍ ຍິງ 1 ສະຫາຍ ແລະ ສະມາຊິກພັກສົມບູນ ຈຳນວນ 05 ສະຫາຍ. ເປັນກຽດຂຶ້ນມອບມະຕິຕົກລົງໂດຍສະຫາຍ ພັນໂທ ຄຳພັນ ແກ້ວວິໄລ ຄະນະພັກຮາກຖານ ຮອງຫົວໜ້າຫ້ອງພະລາທິການ ກອງບັນຊາການທະຫານແຂວງບໍ່ແກ້ວ ຢ່າງສົມກຽດ.

ໂອກາດດັ່ງກ່າວນີ້ສະຫາຍກໍ່ໄດ້ໃຫ້ກຽດໂອລົມ, ເຊິ່ງກ່ອນອື່ນສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີພະນັກງານ-ສະມາຊິກພັກພາຍໃນໜ່ວຍຍາດມາໄດ້ຕະຫຼອດໄລຍະຜ່ານມາ ພ້ອມທັງຮຽກຮ້ອງໃຫ້ສະມາຊິກພັກໃໝ່ຍົກສູງນ້ຳໃຈຮັບຜິດຊອບຕໍ່ໜ້າທີການເມືອງຂອງຕົນ, ມີຄວາມສາມັກຄີພາຍໃນໃຫ້ໜັກແໜ້ນ, ປະຕິບັດຂໍ້ກຳນົດກົດລະບຽບຂອງພັກປະຊາຊົນປະຕິວັດລາວ, ຂອງກອງທັບ, ຂອງກົມກອງ ໃຫ້ເຂັ້ມງວດ, ຕັ້ງໜ້າອອກແຮງປັບປຸງກໍ່ສ້າງພັກໃຫ້ໜັກແໜ້ນເຂັ້ມແຂງ, ຝຶກຝົນຫຼໍ່ລ້ອມຕົນເອງ ເຂົ້າ ຮ່ວມການດຳເນີນຊີວິດ ແລະ ເສຍເງິນບຳລຸງພັກຢ່າງເປັນປົກກະຕິໂດຍປະຕິບັດຕາມອຸດົມການຂອງພັກປະຊາຊົນປະຕິວັດລາວວາງໃຫ້ໄດ້ຮັບຜົນສູງສຸດ.