ມີເດຍາວແຂວງໄຊສົມບູນ ຂ່າວ: ພາພອນ ນະວົງໄຊ
ໃນຕອນເຊົ້າຂອງວັນທີ 18 ສິງຫາ ນີ້ ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແຂວງໄຊສົມບູນ ໄດ້ຈັດກອງປະຊຸມ ສ້າງແຜນກໍານົດພະນັກງານນໍາພາ-ຄຸ້ມຄອງ ຂຶ້ນຢູ່ທີ່ຫ້ອງປະຊຸມຂອງພະແນກ ໂດຍການເປັນປະທານຮ່ວມ ຂອງທ່ານ ພອຍຄໍາ ຮຸ່ງບຸນຍວງ, ຮອງເລຂາພັກແຂວງ, ຜູ້ຊີ້ນໍາວຽກງານພັກ-ພະນັກງານ, ມີທ່ານ ຕົ່ງມົວ ຊົວໂກ້ ຮອງເຈົ້າແຂວງ, ຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແຂວງ ແລະ ທ່ານ ນາງ ຂັນທະລີ ພົນຢ້ຽມ, ຄະນະພັກກະຊວງ, ຮອງຫົວໜ້າກົມຈັດຕັ້ງພະນັກງານ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ມີຕາງໜ້າຈາກພາກສ່ວນທີ່ກ່ຽວຂ້ອງຂອງແຂວງ ພ້ອມດ້ວຍຮອງຫົວໜ້າພະແນກ, ຫົວໜ້າຂະແໜງ-ຮອງຂະແໜງ ຕະຫຼອດຮອດຫົວໜ້າຫ້ອງການຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ 5 ເມືອງ ແລະ ພະນັກງານ-ລັດຖະກອນ ພາຍໃນພະແນກ ເຂົ້າຮ່ວມ.

ໃນກອງປະຊຸມ ໄດ້ຮັບຟັງການຜ່ານມະຕິຂອງກົມການເມືອງສູນກາງພັກ ສະບັບເລກທີ 030, ເລກທີ 031 ແລະ ຄໍາແນະນໍາຂອງຄະນະຈັດຕັ້ງສູນກາງພັກ ກ່ຽວກັບການສ້າງແຜນກໍານົດພະນັກງານ ນໍາພາ-ຄຸ້ມຄອງ, ມາດຖານຂອງພະນັກງານນໍາພາ-ຄຸ້ມຄອງ, ການດໍາເນີນການທາບທາມແຜນກໍານົດພະນັກງານ ຮອບທີ 1, ຮອບທີ 2, ຮອບທີ 3 ແລະ ການປະເມີນຜົນ ຈາກຄະນະຈັດຕັ້ງແຂວງ. ໂອກາດນີ້, ທ່ານ ພອຍຄໍາ ຮຸ່ງບຸນຍວງ ໄດ້ມີຄໍາເຫັນໂອ້ລົມຕໍ່ກອງປະຊຸມ ຊຶ່ງທ່ານໄດ້ເນັ້ນໜັກໃຫ້ບັນດາສະມາຊິກພັກ-ພະນັກງານລັດຖະກອນ ພາຍໃນພະແນກ ຈົ່ງເອົາໃຈໃສ່ນໍາໃຊ້ສິດຂອງຕົນ ເຂົ້າໃນການຄົ້ນຄວ້າ, ທາບທາມ ແລະ ໃຫ້ຄະແນນ ໂດຍອີງຕາມມາດຖານ, ເງື່ອນໄຂ ທີ່ໄດ້ກໍານົດໄວ້ ເພື່ອກໍານົດເອົາເປົ້າໝາຍພະນັກງານ ນໍາພາ-ຄຸ້ມຄອງ ກໍຄືຫົວໜ້າ-ຮອງຫົວໜ້າພະແນກ, ຫົວໜ້າ-ຮອງຫົວໜ້າຂະແໜງ ຜູ້ທີ່ມີຄວາມຮູ້ຄວາມສາມາດ, ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ ເພື່ອສາມາດນໍາພາວຽກງານການເມືອງຂອງພັກ ໄດ້ຕາມຄວາມຮຽກຮ້ອງຕ້ອງການ ຂອງໜ້າທີ່ການເມືອງໃນແຕ່ລະໄລຍະ ພ້ອມທັງນໍາພາຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃຫ້ບັນລຸເປົ້າໝາຍ ທີ່ຂັ້ນເທິງໄດ້ວາງໄວ້. ຈາກນັ້ນ ກອງປະຊຸມ ໄດ້ດໍາເນີນການທາບທາມແຜນກໍານົດພະນັກງານ ນໍາພາ-ຄຸ້ມຄອງ ໄປ ຕາມແຕ່ລະຂັ້ນຕອນ.