ມີເດຍລາແຂວງເຊກອງ ຂ່າວ-ພາບ: ແດນວົງວິຈິດ
ທ່ານ ສົມເພັດ ເອີດລັດດາ ເລຂາພັກເມືອງເຈົ້າເມືອງໆທ່າແຕງແຂວງເຊກອງ ແລະ ທ່ານ ກໍລະກັນ ບຸດສະບາ ຫົວຫນ້າຫ້ອງການສາທາລະນະສຸກເມືອງ ຮອງປະທານຄະນະກຳມະການສະເພາະກິດຂັ້ນເມືອງພ້ອມຄະນະໄດ້ລົງຕິດຕາມການສັກວັກຊີນປ້ອງກັນພະຍາດໂຄວິດ-19ໃຫ້ແກ່ປະຊາຊົນຢູ່ຈຸດບໍລິການ ໂຮງໝໍນ້ອຍເຂດບ້ານປື,ບ້ານຈຸນລາ ແລະ ບ້ານ ໂທນນ້ອຍໃນວັນທີ 17 ສິງຫາ 2021 ນີ້.

ໃນໂອກາດທີ່ລົງເຄື່ອນໄຫວຕິດຕາມຊຸກຍູ້ການສັກວັກຊີນປ້ອງກັນພະຍາດ ໂຄວິດ-19 ຄັ້ງນີ້ເຈົ້າເມືອງໆທ່າແຕງ ພ້ອມຄະນະສະເພາະກິດຂອງຂັ້ນເມືອງໄດ້ຮັບຟັງການລາຍງານສະພາບການຈັດຕັ້ງປະຕິບັດວຽກງານການສັກຢາ ຈາກທ່ານ ນາງ ອໍ້ຄຳ ໄຊຍະວົງ ຜູ້ອຳນວຍການໂຮງໝໍນ້ອຍ ບ້ານ ໂທນ ເຊິ່ງທ່ານໄດ້ຍົກໃຫ້ເຫັນຂໍ້ສະດວກ ແລະ ຂໍ້ຍຸ້ງຍາກໃນ ການປະຕິບັດໜ້າທີ່ຂອງພະນັກງານແພດໝໍ ຢູ່ແຕ່ລະຈຸດບໍລິການສັກວັກຊີນ ໂດຍລວມພໍ່ແມ່ປະຊາຊົນ ທຸກຊັ້ນຄົນແມ່ນມີຄວາມຕື່ນຕົວມາຮັບການສັກວັກຊີນຢ່າງເປັນຂະບວນຟົດຟື້ນແຕ່ເຖິງຢ່າງໃດກໍ່ຕາມສະຖານທີ່ຮອງຮັບໃຫ້ແກ່ຜູ້ມາຮັບບໍລິການສັກວັກຊີນຍັງບໍ່ພຽງພໍແອອັດ.

ທ່ານ ກໍລະກັນ ບຸດສະບາ ຫົວໜ້າຫ້ອງການສາທາລະນະສຸກເມືອງໄດ້ໃຫ້ສຳພາດວ່າ: ປັດຈຸບັນປະຊາຊົນທົ່ວເມືອງທ່າແຕງໄດ້ຮັບການສັກວັກຊີນທັງໝົດ 75 % ຂອງກຸ່ມເປົ້າໝາຍອາຍຸ 18 -60 ປີຂຶ້ນໄປ.ໃນຂະນະທີ່ສັກວັກຊີນ ຊະນິດ ຊີໂນຟຣາມ ( sinofharm)ສຳເລັດແລ້ວ 4.650 ໂດສ, ຈອນສັນ ແອນ ຈອນສັນ( Jonsan & Jonsan ) 3.500 ໂດສ ແລະ ແອສຕາ ເຊນີກາ (Astazeneca) 3.000 ໂດສ ສໍາເລັດແລ້ວ 1.800 ໂດສ ແລະ ຍັງສືບຕໍ່ສັກອີກ 1.200 ໂດສ.

ໂອກາດນີ້, ທ່ານເຈົ້າເມືອງທ່າແຕງ ກໍໄດ້ສະແດງຄວາມຊົມເຊີຍພະນັກງານແພດໝໍ, ເຈົ້າໜ້າທີ່ທຸກຄົນທີ່ເຮັດໜ້າທີ່ ຂອງຕົນຢ່າງສຸດກົກສຸດປາຍ, ພ້ອມທັງຮຽກຮ້ອງໃຫ້ຮັກສາ ແລະ ປ້ອງກັນຕົນເອງໃຫ້ດີທີ່ສຸດ ເພື່ອບໍ່ໃຫ້ມີການຕິດເຊື້ອພະຍາດໂຄວິດ-19. ໃນຂະນະດຽວກັນທ່ານ ເຈົ້າເມືອງຍັງໄດ້ນໍາເອົານໍ້າດື່ມ ແລະ ໝີ່ໄວໆມອບໃຫ້ພະນັກງານທີ່ປະຕິບັດໜ້າທີ່ໃນຄັ້ງນີ້ ຕື່ມອີກ.