ມີເດຍລາວແຂວງສາລະວັນ ໂດຍ: ກິນດາວັນ ອ້ວນນາຄູ ໃນວັນທີ 19 ສິງຫາ 2021 ທີ່ຫ້ອງຮັບຮອງຫ້ອງວ່າການແຂວງສາລະວັນ ຄະນະພັກຮາກຖານພະແນກ ພະລັງງານ ແລະ ບໍ່ແຮ່ແຂວງສາລະວັນ ເຊິ່ງນໍາໂດຍ ທ່ານ ຈັດຕຸພົນ ນາຄະວິດ ຫົວໜ້າພະແນກພະລັງງານ ແລະ ບໍ່ແຮ່ແຂວງ ພ້ອມດ້ວຍຄະນະ ໄດ້ມອບເງິນຊ່ວຍເຫລືອໃຫ້ອົງການປົກຄອງແຂວງສາລະວັນ ມູນຄ່າ 7.000.000 ກີບ, ທັງນີ້ກໍເພື່ອເປັນການສືບຕໍ່ປະກອບສ່ວນ ເຂົ້າໃນວຽກງານ ປ້ອງກັນ, ສະກັດກັ້ນ ແລະ ຄວບຄຸມແກ້ໄຂການລະບາດຂອງເຊື້ອພະຍາດໂຄວິດ-19 ທີ່ກໍາລັງແຜ່ລະບາດໃນປະຈຸບັນ ໃຫ້ກຽດຮັບໂດຍ ທ່ານ ນາງ ບຸນທະວີ ດວງລາສີ ຮອງເລຂາພັກແຂວງ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.

ໂອກາດດຽວກັນນີ້ທ່ານ ຮອງເລຂາພັກແຂວງ ກໍ່ໄດ້ມອບໃບຂອບໃຈ ເພື່ອສະແດງເຖິງຄວາມຂອບໃຈ ແລະ ຮູ້ບຸນຄຸນ ທີ່ທາງ ຄະນະພັກຮາກຖານ ພະແນກພະລັງງານ ແລະ ບໍ່ແຮ່ແຂວງສາລະວັນ ໄດ້ເອົາໃຈໃສ່ໃນການຊຸກຍູ້ປຸກລະດົມໃຫ້ການປະກອບສວ່ນຊ່ວຍເຫຼືອແຂວງສາລະວັນໃນຄັ້ງນີ ພ້ອມທັງຈະນຳເອົາເງິນຈຳນວນດັ່ງກ່າວໄປໃຊ້ເຂົ້າໃນວຽກງານຕົວຈິງໃຫ້ເກີດປະໂຫຍດສູງສຸດ.