ມີເດຍລາວແຂວງສາລະວັນ ໂດຍ ກິນດາວັນ ອ້ວນນາຄູ ເພື່ອເປັນການສືບຕໍ່ປະກອບສ່ວນເຂົ້າໃນວຽກງານປ້ອງກັນ, ຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ທີ່ກໍາລັງແຜ່ລະບາດຢູ່ທົ່ວໂລກ, ທົ່ວປະເທດລາວ ເວົ້າສະເພາະກໍຄືແຂວງສາລະວັນທີ່ກໍາລັງພົບກັບບັນຫາພະຍາດໂຄວິດ-19ໃນປະຈຸບັນ, ຍ້ອນເຫັນໄດ້ຄວາມສໍາຄັນແນວນັ້ນ ທາງບໍລິສັດ ພະລັງງານບໍລິສຸດ ຈໍາກັດ (ເຂື່ອນໄຟຟ້ານໍ້າຂອງ ແຂວງສາລະວັນ) ນໍາໂດຍ ທ່ານ ຄວນຕິພົງ ດວນຫວັນ ຮອງຜູ້ອໍານວຍການໂຄງການເຂື່ອນໄຟຟ້ານໍ້າຂອງສາລະວັນຕອນລຸ່ມ ໃນນາມຕາງໜ້າບໍລິສັດ ພ້ອມຄະນະ ໄດ້ມອບເງິນ ຈໍານວນ 85,878,000 ກີບ ໃຫ້ອົງການປົກຄອງແຂວງສາລະວັນ ໃຫ້ກຽດຮັບ ໂດຍ ທ່ານ ນາງ ບຸນທະວີ ດວງລາສີ ຮອງເລຂາພັກແຂວງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ

ໂອກາດດຽວກັນນີ້ ທ່ານ ນາງ ບຸນທະວີ ດວງລາສີ ກໍໄດ້ມອບໃບ ຂອບໃຈ ເພື່ອສະແດງເຖິງຄວາມຂອງໃຈຮູ້ບຸນຄຸນ ທີ່ທາງບໍລິສັດເຫັນໄດ້ຄວາມສໍາຄັນໃຫ້ການປະກອບສ່ວນໃນຄັ້ງນີ້ ຫວັງຢ່າງຍິ່ງວ່າຈະໄດ້ຮັບການຊ່ວຍເຫຼືອໃນອີກຄັ້ງຕໍ່ໄປ ແລະ ຈະນໍາໃຊ້ເງິນດັ່ງກ່າວໄປນໍາໃຊ້ເຄື່ອນໄຫວເຂົ້າໃນວຽກງານຕົວຈິງໃຫ້ເກີດປະໂຫຍດສູງສຸດ, ພິທີດັ່ງກ່າວໄດ້ຈັດຂຶ້ນໃນວັນທີ 19 ສິງຫາ 2021 ຢູ່ທີ່ຫ້ອງຮັບຮອງຫ້ອງວ່າການແຂວງ.