ມີເດຍລາວແຂວງບໍ່ແກ້ວ ພາບ-ຂ່າວ: ວັນນະເດດ ວິໄລຄຸນ. ກອງປະຊຸມການຈັດຕັ້ງປະຕິບັດ ວຽກງານສາທາລະນະສຸກ ປະຈຳ 6 ເດືອນຕົ້ນປີ 2021 ແລະ ວາງທິດທາງແຜນການ 6 ເດືອນທ້າຍປີ 2021 ໄດ້ມີຂື້ນໃນວັນທີ 18 ສິງຫານີ້, ທີ່ຫ້ອງການສາທາລະນະສຸກເມືອງປາກທາ ໂດຍການເປັນປະທານຂອງ ດຣ ອາເປົາ ສີພາວັນ ກຳມະການພັກເມືອງ ຫົວໜ້າຫ້ອງການສາທາລະນະສຸກເມືອງ, ເປັນກຽດເຂົ້າຮ່ວມຂອງທ່ານ ນາງ ຈັນສຸກ ວັນນະວົງ ຮອງເຈົ້າເມືອງປາກທາ ຜູ້ຊີ້ນຳຂົງເຂດວຽກງານວັດທະນະທຳ-ສັງຄົມ, ມີບັນດາຄະນະກຳມະການຮັກສາສຸຂະພາບຂັ້ນເມືອງ, ອໍານວຍການໂຮງໝໍ, ພະນັກງານແພດ-ໝໍສາທາລະນະສຸກ, ໂຮງໝໍນ້ອຍ ແລະ ສຸກສາລາເຂົ້າຮ່ວມ.

ທ່ານ ສົມສະຫວັດ ທັດສະພອນ ຮອງຫົວໜ້າຫ້ອງການສາທາລະນະສຸກເມືອງ ໃຫ້ຮູ້ວ່າ: ເມືອງປາກທາມີໂຮງໝໍ 1 ແຫ່ງ, ມີ 15 ຕຽງ, ມີໂຮງໝໍນ້ອຍປະເພດ ກ 1 ແຫ່ງ ແລະ ປະເພດ ຂ 5 ແຫ່ງ, ມີ ຄະນະກໍາມະການຮັກສາສຸຂະພາບຂັ້ນບ້ານ 155 ຄົນ, ຍິງ 45 ຄົນ, ອາສາສະມັກສາທາລະນະສຸກຂັ້ນບ້ານ ມີ 46 ຄົນ, ຍິງ 14 ຄົນ ແລະ ຈຳນວນ ບ້ານສາທາລະນະສຸກແບບຢ່າງມີ 29 ບ້ານ ກວມ 85,29%, ຜ່ານມາໂດຍຖືເອົາການເຄື່ອນໄຫວວຽກງານວິຊາສະເພາະຕາມ 8 ແຜນງານເປັນຕົ້ນ: ແຜນງານອານາໄມ ແລະ ສົ່ງເສີມສຸຂະພາບ, ແຜນງານກັນພະຍາດ ແລະ ຄວບຄຸມພະຍາດຕິດຕໍ່, ແຜນງານບໍລິການສຸຂະພາບ, ແຜນງານປົກປ້ອງຜູ້ບໍລິໂພກອາຫານ, ຢາ ແລະ ອຸປະກອນການແພດ, ແຜນງານຄຸ້ມຄອງ, ພັດທະນາພະນັກງານ ແລະ ຄົ້ນຄວ້າວິທະຍາສາດສາທາລະນະສຸກການແຈກຢາຍພະນັກງານລັດຖະກອນຂົງເຂດສາທາລະນະສຸກ, ແຜນງານການເງິນສາທາລະນະສຸກແຜນງານ, ແຜນການ, ຂໍ້ມູນຂ່າວສານ ແລະ ການຮ່ວມມືສາກົນ, ແຜນງານບໍລິຫານຄຸ້ມຄອງ ແລະ ກວດກາ, ໃນນີ້ອັດຕາການຄຸມກຳເນີດແຕ່ລະສະຖານທີ່ບໍລິການ ທົ່ວເມືອງ ມີ 1,865 ເທົ່າກັບ 45,90%, ອັດຕາການຊົມໃຊ້ນ້ຳສະອາດ ແລະ ວິດຖ່າຍໃນທົ່ວເມືອງ 6 ເດືອນຕົ້ນປີ 2021 ປະຕິບັດໄດ້ 97,6%, ວຽກງານຄວບຄຸມໄຂ້ຍຸງ, ແມ່ກາຝາກ ແລະ ແມງໄມ້, 6 ເດືອນຕົ້ນປີ ປະຕິບັດໄດ້ 71,4%, ນອນຈາກນີ້ແລ້ວ ຍັງໄດ້ເຝົ້າລະວັງລາຍງານ 18 ພະຍາດ ສົ່ງປະຈຳອາທິດ, ເຝົ້າລະວັງລາຍງານໄຂ້ຍຸງລາຍປະຈຳວັນ ລວມທັງພະຍາດໂຄວິດ 19 ເຊິ່ງໄດ້ຈັດຕັ້ງຈຸດກວດກາວັດແທກອຸນຫະພູມ 2 ຈຸດ ແລະ ຍັງມີວຽກງານອື່ນອີກຈຳນວນໜື່ງ, ໂອກາດດັ່ງກ່າວຍັງໄດ້ຮັບຟັງການນຳສະເໜີ ການຈັດຕັ້ງປະຕິບັດວຽກງານ 5 ດີ 1 ພໍໃຈ ໃນໄລຍະ 6 ເດືອນຜ່ານມາ ແລະ ທິດທາງແຜນການ 6 ເດືອນຕໍ່ໜ້າ.

ຈາກນັ້ນຜູ້ເຂົ້າຮ່ວມກອງປະຊຸມກໍ່ໄດ້ປະກອບຄຳຄິດຄຳເຫັນແລກປ່ຽນບົດຮຽນເຊິ່ງກັນ ແລະ ກັນ ໃນການຈັດຕັ້ງປະຕິບັດໜ້າທີ່ວຽກງານຂອງຕົນເເອງທີ່ຜ່ານມາ, ເຊິ່ງໄດ້ຍົກໃຫ້ເຫັນດ້ານດີຜົນງານ, ດ້ານອ່ອນຂໍ້ຄົງຄ້າງ ແລະ ວິທີປັບປຸງແກ້ໄຂທີ່ຈະຕ້ອງໄດ້ສຸມໃສ່ໃນຕໍ່ໜ້າ ເພື່ອເຮັດໃຫ້ການຈັດຕັ້ງປະຕິບັດໜ້າທີວຽກງານໃຫ້ມີຜົນສຳເລັດຕາມລະດັບຄາດໝາຍ ແລະ ແຜນການທີວາງໄວ້.