ມີເດຍລາວແຂວງໄຊສົມບູນ ຂ່າວ: ສີລິພອນ ສົງຄຳ
ຫ້ອງວ່າການແຂວງໄຊສົມບູນ ໄດ້ຈັດພິທີ ເຊັນບົດບັນທຶກຮ່ວມມືຮອບດ້ານ ລະຫວ່າງອົງການຈັດຕັ້ງມະຫາຊົນຫ້ອງວ່າການແຂວງ ແລະ ອົງການຈັດຕັ້ງມະຫາຊົນບ້ານຜາສະຫງົບ ເມືອງອະນຸວົງ ແຂວງໄຊສົມບູນ ຂຶ້ນໃນຕອນບ່າຍຂອງວັນທີ 19 ສິງຫາ 2021ນີ້ ທີ່ຫ້ອງການບ້ານຜາສະຫງົບ. ໂດຍການເປັນປະທານຮ່ວມຂອງສະຫາຍ ສົມບູນ ສອນລິທິເດດ, ກຳມະການພັກແຂວງ, ຫົວໜ້າຫ້ອງວ່າການແຂວງ, ສະຫາຍ ຫວ່າຊົວຢ່າງ, ເລຂາພັກບ້ານ, ນາຍບ້ານ-ບ້ານຜາສະຫງົບ, ມີອຳນາດການປົກຄອງບ້ານ ພ້ອມດ້ວຍສະມາຊິກຊາວໜຸ່ມ ແລະ ສະຫະພັນແມ່ຍິງຈາກຫ້ອງວ່າການແຂວງ ແລະ ບ້ານຜາສະຫງົບ ເຂົ້າຮ່ວມ.

ໃນພິທີ ໄດ້ຮັບຟັງການຜ່ານແຜນ ແລະ ບົດບັນທຶກການຮ່ວມມືຮອບດ້ານລະຫວ່າງອົງການຈັດຕັ້ງມະຫາຊົນຫ້ອງວ່າການແຂວງ ແລະ ບ້ານຜາສະຫງົບ ເມືອງອະນຸວົງ ແຂວງໄຊສົມບູນ. ຈຸດປະສົງໃນການຈັດພິທີໃນຄັ້ງນີ້ກໍເພື່ອເປັນການຍົກສູງພາລະບົດບາດ, ຄຸນນະພາບຂອງວຽກງານຊາວໜຸ່ມ, ແມ່ຍິງໃຫ້ສູງຂຶ້ນ ພ້ອມທັງພັດທະນາວຽກງານໃຫ້ມີຄວາມເຂັ້ມແຂງທາງດ້ານການເມືອງ-ແນວຄິດ, ການຈັດຕັ້ງ ແລະ ແບບແຜນວິທີເຮັດວຽກຢ່າງຖືກຕ້ອງ. ພ້ອມດຽວກັນນີ້ ອົງການຈັດຕັ້ງມະຫາຊົນຫ້ອງວ່າການແຂວງ ແລະ ບ້ານຜາສະຫງົບ ໄດ້ຜັດປ່ຽນກັນຂຶ້ນຜ່ານບົດລາຍງານຫຍໍ້ຂອງຕົນໃນການຈັດຕັ້ງປະຕິບັດວຽກງານຂອງຕົນ. ຈາກນັ້ນ ໄດ້ມີພິທີເຊັນບົດບັນທຶກຮ່ວມກັນຢ່າງເປັນທາງການ ພ້ອມມອບເຄື່ອງອຸປະກອນການກິລາໃຫ້ແກ່ບ້ານຜາສະຫງົບອີກດ້ວຍ.

ໂອກາດດັ່ງກ່າວ ສະຫາຍ ສົມບູນ ສອນລິດທິເດດ ໄດ້ມີຄຳເຫັນໂອ້ລົມຕໍ່ບັນດາອົງການຈັດຕັ້ງມະຫາຊົນ ເພື່ອເປັນການເສີມຂະຫຍາຍກຳລັງແຮງ, ການສ້າງເງື່ອນໄຂ ຈັດຕັ້ງປະຕິບັດໜ້າທີ່ວຽກງານຕາມພາລະບົດບາດຂອງຕົນ, ໃຫ້ບັນດາສະມາຊິກ ມີສະຕິຕື່ນຕົວ, ເປັນເຈົ້າການໃນການພັດທະນາຕົນເອງຢ່າງຮອບດ້ານ ແລະ ເຂົ້້າຮ່ວມການຈັດຕັ້ງປະຕິບັດແນວທາງນະໂຍບາຍຂອງພັກ ເພື່ອເຮັດໃຫ້ສະມາຊິກອົງການຈັດຕັ້ງມະຫາຊົນຫ້ອງວ່າການແຂວງ ແລະ ບ້ານຜາສະຫງົບ ສາມາດກຳໄດ້ເນື້ອໃນລວມ, ມາດຖານ, ບາດກ້າວ ໃນການຈັດຕັ້ງປະຕິບັດເຂົ້າໃນວຽກງານຕົວຈິງໃຫ້ຫລາຍຂຶ້ນ, ແນໃສ່ສ້າງຄວາມເປັນເອກະພາບໃນການຊີ້ນຳ-ນຳພາ, ຕິດຕາມ, ກວດກາ, ແລກປ່ຽນບົດຮຽນເຊິ່ງກັນ ແລະ ກັນ ທາງດ້ານປະສົບການ, ຄວາມຮູ້, ແບບແຜນວິທີເຮັດວຽກ ພ້ອມທັງເປັນການສົ່ງເສີມບົດບາດການນຳພາ, ການເຄື່ອນໄຫວວຽກງານຂອງແຕ່ລະອົງການຈັດຕັ້ງ ໃຫ້ມີຄວາມເຂັ້ມແຂງ ແລະ ໜັກແໜ້ນ ເທື່ອລະກ້າວ.