ມີເດຍລາວແຂວງບໍ່ແກ້ວ
ຕອນແລງ ວັນທີ 19 ສິງຫາ 2021ນີ້ ຢູ່ທີ່ຫ້ອງປະຊຸມ ຫ້ອງວ່າການເມືອງປາກທາ ໄດ້ຈັດພິທີ ເປີດຊອງປະມູນ ການກໍ່ສ້າງ ໂຮງຮຽນປະຖົມສົມບູນຫຼັງໃໝ່ ບ້ານຫ້ວຍແອ່ນ ເມືອງປາກທາ ແຂວງບໍ່ແກ້ວ ຂອງບ້ານເປົ້າໝາຍໂຄງການລາວ/030 ຫຼື ລຸກຊຳບວກ ເຂົ້າຮ່ວມມີທ່ານ ຄຳໃສ່ ບົວປິນ ຮອງເຈົ້າເມືອງປາກທາ ທ່ານ ສີສຸກ ຄຸນວິທອງ ຮອງຫົວໜ້າພະແນກແຜນການ ແລະ ການລົງທຶນ ແຂວງບໍ່ແກ້ວ ມີບັນດາຄະນະຮັບຜິດຊອບການປະມູນຂັ້ນເມືອງ ຕາງໜ້າຜູ້ປະສານງານໂຄງການ ແລະ ບໍລິສັດເຂົ້າຮ່ວມ.

ທ່ານ ສີສຸກ ຄຸນວິທອງ ຮອງຫົວໜ້າພະແນກແຜນການ ແລະ ການລົງທຶນ ແຂວງບໍ່ແກ້ວ ໄດ້ກ່າວວ່າ: ການຈັດພິທີ ເປີດຊອງປະມູນການກໍ່ສ້າງໂຮງຮຽນປະຖົມຫຼັງໃໝ່ບ້ານຫ້ວຍແອ່ນຄັ້ງນີ້: ມີບໍລິສັດເຂົ່າຮ່ວມການປະມູນທັງໝົດ 4 ບໍລິສັດ ເຊິງປະກອບມີ ບໍລິສັດແສງແກ້ວ ກໍ່ສ້າງສ້ອມແປງເຄຫາສະຖານຂົວທາງ ແລະ ຊົນລະປະທານ ຈຳກັດ ແຂວງຜົ້ງສາລີ, ບໍລິສັດ ໄຊສົມບູນ ກໍ່ສ້າງເຄຫາສະຖານ ຈຳກັດ ແຂວງຫຼວງນ້ຳທາ, ບໍລິສັດ ໄຊຄຸນສັບ ກໍ່ສ້າງສ້ອມແປງເຄຫາສະຖານ ແລະ ຊົນລະປະທານຈຳກັດ ແຂວງຊຽງຂວາງ. ບໍລິສັດ ໄຊສົມບັດ ກໍ່ສ້າງສ້ອມແປງເຄຫາສະຖານ ແລະ ຊົນລະປະທານ ຈຳກັດ ແຂວງອຸດົມໄຊ ເຊິງບັນດາ ບໍລິສັດ ທີ່ໄດ້ເຂົ້າຮ່ວມການປະມູນຄັ້ງນີ້ ຕ້ອງໄດ້ປະຕິບັດຕາມ ມາດຖານເງື່ອນໄຂ ແລະ ປະກອບເອກະສານໃຫ້ຖືກຕ້ອງຄົບຖ້ວນເປັນຕົ້ນແມ່ນ ໃບທະບຽນວິສາຫະກິດ, ໃບອານຸຍາດດຳເນີນທຸລະກິດ, ໃບເສຍອາກອນ, ເງີນຄ້ຳປະກັນການປະມູນ 2%, ແລະ ລາຄ່າປະມູນໂຄງການ ຜ່ານການເປີດຊອງປະມູນ ທາງຄະນະກຳມະການຮັບຜິດຊອບການປະມູນຂັ້ນເມືອງແມ່ນຍັງຈະໄດ້ຄົ້ນຄ້ວາໃຫ້ຖືກຕ້ອງຕາມຄວາມເໝາະສົມບົນພື້ນຖານເງື່ອນໄຂທີ່ໄດ້ວາງໄວ້ໃຫ້ມີຄວາມໂປ່ງໃສ່ ແລະ ສອດຄ່ອງກັບຕົວຈິງ.

ທັງນີ້ກໍ່ເພື່ອເປັນການປະຕິບັດຕາມລະບຽບຫຫຼັກການຂອງການປະມູນໃຫ້ຖືກຕ້ອງ ແລະ ເຂັ້ມງວດ ຕ່າງຝ່າຍຕ່າງມີຜົນໄດ້ຮັບສະເໝີພາບກັນ ແລະ ຄວາມຍຸຕິທຳເທົ່າທຽມກັນ ຮັບປະກັນໃຫ້ການກໍ່ສ້າງໂຮງຮຽປະຖົມຫຼັງໃໝ່ ນີ້ໃຫ້ຖືກຕ້ອງຕາມແຜນການອອກແບບໄວ້ ແລະ ໄດ້ຮັບການຊ່ວຍເຫຼືອຢ່າງຖືກຕ້ອງ.
ພາບ-ຂ່າວ: ພອນສະຫວັນ ມະນີສີ.