ມີເດຍລາວແຂວງຫຼວງພະບາງ ຂ່າວ: ຫຸມແພງ ສີດາໄລ ກອງປະຊຸມເຊື່ອມຊືມ ແລະ ຜັນຂະຫຍາຍມະຕິ XI ຂອງພັກໃຫ້ກັບກໍາລັງປ້ອງກັນຊາດ ປ້ອງກັນຄວາມສະຫງົບເມືອງນານ ແຂວງຫຼວງພະບາງ ໄດ້ຈັດຂຶ້ນວັນທີ 20/8/2021 ຜ່ານມານີ້ ຢູ່ທີ່ສະໂມສອນຂອງເມືອງ ໂດຍການເຜີຍແຜ່ຂອງສະຫາຍ ຄໍາເກັ່ງ ຈັນທະວີສຸກ ກໍາມະການພັກແຂວງ ເລຂາຄະນະບໍລິຫານງານພັກເມືອງ ເຈົ້າເມືອງ-ເມືອງນານ ມີບັນດາຄະນະພັກ, ມີກໍາລັງປ້ອງກັນຊາດ ປ້ອງກັນຄວາມສະຫງົບເມືອງ ສະມາຊິກພັກ ພະນັກງານຫຼັກແຫຼ່ງທັງສອງກອງບັນຊາການເຂົ້າຮ່ວມ.

ສະຫາຍ ຄໍາເກັ່ງ ຈັນທະວີສຸກ ກ່າວວ່າ: ເຜີຍແຜ່ເອກະສານວ່າດ້ວຍການຈັດຕັ້ງເຊື່ອມຊືມ ແລະ ຜັນຂະຫຍາຍເນື້ອໃນມະຕິ XI ຂອງພັກ ເພື່ອໃຫ້ບັນດາສະມາຊິກພັກພະນັກງານໄດ້ຮັບຮູ້ ແລະ ເຂົ້າໃຈຢ່າງເລີກເຊິ່ງຕໍ່ກັບບັນດາເນື້ອໃນສໍາຄັນຂອງມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກປະຊາຊົນປະຕິວັດລາວ,ເຊິ່ງກອງປະຊຸມໃຫຍ່ຜູ້ແທນທົ່ວປະເທດໃນຄັ້ງນີ້ ແມ່ນເຫດການ-ການເມືອງຄັ້ງທີ່ສໍາຄັນແຫ່ງປະຫວັດສາດ, ເປັນກອງປະຊຸມແຫ່ງການຍືດໝັ້ນ ແລະ ເສີມຂະຫຍາຍແນວທາງການປ່ຽນແປງໃໝ່ຮອບດ້ານ ມີຫຼັກການຂອງພັກໃຫ້ເຂົ້າສູ່ລວງເລີກ ສຶບຕໍ່ບູລະນະລະບອບປະຊາທິປະໄຕປະຊາຊົນໃຫ້ມີຄວາມສົມບູນ ແຂງແຮງ ເລີກເຊິ່ງຮອບດ້ານ ໃນການພັດທະນາເສດຖະກິດ-ສັງຄົມ ແນໃສ່ແກ້ໄຂຄວາມທຸກຍາກ ແລະ ນໍາພາປະເທດຊາດພົ້ນຈາກສະຖານະພາບດ້ອຍພັດທະນາ ທັງເປັນຂີດໝາຍແຫ່ງການເຕີບໃຫຍ່ຂະຫຍາຍຕົວຂອງພັກ ແມ່ນບັ້ນດໍາເນີນຊີວິດການເມືອງພາຍໃນພັກເພື່ອສ້າງການຫັນປ່ຽນຢ່າງຮອບດ້ານ ແລະ ເປັນລະບົບ ໂດຍຫັນປ່ຽນຈາກດ້ານການເມືອງແນວຄິດ ມາສູ່ການກະທໍາຕົວຈິງເພື່ອແກ້ໄຂຈຸດອ່ອນ ແລະ ບັນຫາຄົງຄ້າງ ແນໃສ່ຍົກສູງບົດບາດນໍາພາຂອງພັກ ເພີ້ມທະວີຄວາມສາມັກຄີເປັນປຶກແຜ່ຂອງປະຊາຊົນພາຍໃນຊາດ ເດັດດ່ຽວປົກປັກຮັກສາ ແລະ ສ້າງສາພັດທະນາປະເທດຊາດສູ່ຈຸດໝາຍສັງຄົມນິຍົມ ນອກນີ້ ສະຫາຍຍັງໄດ້ເຊື່ອມຊືມມະຕິ VIII ຂອງອົງຄະນະພັກແຂວງ ແລະ ທົບທວນຄືນກ່ຽວກັບຜົນສໍາເລັດຂອງມະຕິ VI ແລະ ການຈັດຕັ້ງຜັນຂະຫຍາຍມະຕິ VII ຂອງອົງຄະນະພັກເມືອງ ສ້າງໃຫ້ເມືອງນານໄດ້ຮັບການພັດທະນາເຂັ້ມແຂງ ຮອບດ້ານ,

ມີການຈັດຕັ້ງລະບົບການເມືອງປະຊາທິປະໄຕ ປະຊາຊົນຄົບຖ້ວນ ສຶບຕໍ່ບຸກທະລຸຍົກສູງຄວາມສາມາດນໍາພາ ແລະ ຄວາມເປັນແບບຢ່າງນໍາໜ້າສູ້ຊົນທົ່ວອົງຄະນະພັກ ເພີ້ມທະວີປະສິດທິພາບແຫ່ງການຄຸ້ມຄອງລັດດ້ວຍກົດໝາຍ, ຕັ້ງໜ້າສົ່ງເສີມທຸກພາກສ່ວນເສດຖະກິດເຂົ້າໃນການຂຸດຄົ້ນຄວາມອາດສາມາດບົ່ມຊ້ອນ ແລະ ທ່າແຮງໄດ້ປຽບຂອງທ່ອງຖິ່ນເຮັດໃຫ້ເມືອງໄດ້ຮັບການພັດທະນາຢ່າງຕໍ່ເນື່ອງ, ຍືນຍົງ ແລະ ມີພື້ນຖານອັນໜັກແໜ້ນ, ຊີວິດການເປັນຢູ່ຂອງປະຊາຊົນນັບມື້ນັບດີຂຶ້ນ, ສັງຄົມມີຄວາມສະຫງົບ, ຍຸຕິທໍາ ແລະ ສີວິໄລ ຊັບພະຍາກອນມະນຸດໄດ້ຮັບການພັດທະນາ ເສີມຂະຫຍາຍປະຊາຊົນໄດ້ຊົມໃຊ້ນໍ້າສະອາດ ແລະ ພະລັງງານຢ່າງໝັ້ນຄົງ, ເຂົ້າເຖິງການບໍລິການສາທາລະນະສຸກຢ່າງທົ່ວເຖິງ ເຮັດໃຫ້ປະຊາຊົນມີຊີວິດການເປັນຢູ່ດີຂຶ້ນເທື່ອລະກ້າວ.