ມີເດຍລາວແຂວງຫຼວງພະບາງ ໂດຍ: ໄຊຍະສອນ ລັດຕະນະວົງ. ວັນທີ 18 ສິງຫາ 2012 ນີ້. ສະຫາຍ ພັນເອກ ວິລະໄຊ ສົມສັກ ຮອງຫົວໜ້າກົມໂຄສະນາອົບຮົມກົມໃຫ່ຍການເມືອງກອງທັບພ້ອມຄະນະໄດ້ລົງເຄື່ອນໄຫວ ແລະ ເຮັດວຽກຕິດຕາມກວດກາຊຸກຍູ້ວຽກງານໂຄສະນາ – ອົບຮົມຢູ່ຫ້ອງການເມືອງທະຫານແຂວງຫຼວງພະບາງ ໂດຍມີ ສະຫາຍ ພັນໂທ ສິງທອງ ອິນທະວອງ ຄະນະພັກກອງບັນຊາການ ຮອງຫົວໜ້າຫ້ອງການເມືອງທະຫານແຂວງ, ມີສະຫາຍ ພັນໂທ ທອງໄຊ ໄພຍະສິດ ຫົວໜ້າພະແນກໂຄສະນາອົບຮົມ ພ້ອມຄະນະເຂົ້າຮ່ວມ.

ການຈັດຕັ້ງເຄື່ອນໄຫວວຽກງານໂຄສະນາອົບຮົມໃນໄລຍະ 1 ປີ 2020 ໄດ້ຈັດຕັ້ງເຊື່ອມຊຶມມະຕິເອກະສານຂອງຂັ້ນເທິງ ແລະ ປາຖະກະຖາມູນເຊື້ອຂອງພັກ, ຂອງຊາດ, ຂອງກອງທັບໄດ້ທັງໝົດ 15 ຄັ້ງ, ມີຈໍານວນພົນເຂົ້າຮ່ວມຮັບຟັງທັງໝົດ 4000 ກວ່າສະຫາຍ, ຍິງ 654 ສະຫາຍ, ໄດ້ເປີດຂະບວນການແຂ່ງຂັນປະຈໍາປີພາຍໃຕ້ຄໍາຂັວນ ຮັກຊາດ ແລະ ພັດທະນາໄດ້ 33 ເທື່ອກົມກອງ, ໄດ້ງານຖາມຕອບຄວາມຮູ້ຮອບຕົວຢູ່ກອງບັນຊາການທະຫານແຂວງໃນໂອກາດວັນສໍາຄັນຕ່າງໆ ມີ 8 ກົມກອງອ້ອມຂ້າງເຂົ້າຮ່ວມ, ໄດ້ປະດັບປະດາສະຖານທີ່ຄ້າຍຄູໃນໂອກາດວັນສໍາຄັນຂອງພັກ, ຂອງຊາດ, ຂອງກອງທັບໄດ້ 15 ຄັ້ງ, ໃນໄລຍະທີ່ຜ່ານມາພະແນກໂຄສະນາອົບຮົມກອງບັນຊາການທະຫານແຂວງຫຼວງພະບາງ ກໍ່ໄດ້ເອົາໃຈໃສ່ໃນການກໍ່ສ້າງນັກຮົບ ແລະ ກົມກອງວັດທະນະທໍາຕາມທິດຊີ້ນໍາຂອງຂັ້ນເທິງມາຮອດໄລຍະນີ້ແມ່ນພວມຢູ່ໃນການດໍາເນີນ, ວຽກງານຂ່າວສານສື່ມວນຊົນໄດ້ລົງເຄື່ອນໄຫວເກັບກໍາຂ່າວຢູ່ສໍານັກງານອົງການ 5 ຫ້ອງ ແລະ ກົມກອງຕ່າງໆ ນໍາຄະນະພັກ – ຄະນະບັນຊາ 50 ຄັ້ງ, ຂຽນຂ່າວດັດແປງຂ່າວທີ່ບັນດາກົມກອງສົ່ງມາໄດ້ທັງໝົດ 384 ຂ່າວ, ອັດລາຍການອອກອາກາດທາງວິທະຍຸແຂວງ 96 ຄັ້ງ, ລາຍງານຂ່າວ, ສົ່ງຂ່າວໃຫ້ພາກສ່ວນກ່ຽວຂ້ອງໄດ້ 95 ຂ່າວ, ແຈກຍາຍໜັງສືພິມໄດ້ 3.840 ສະບັບ, ໄດ້ຕິດຕາມກວດກາສູນສົ່ງວິທະຍຸກອງທັບຢູ່ພູວ່າວໄດ້ 48 ຄັ້ງ, ວຽກງານຫໍມູນເຊື້ອໄດ້ນໍາພາໂຄສະນານໍາທ່ຽວໃຫ້ບັນດານັກຮຽນ – ນັກສຶກສາ ແລະ ພະນັກງານ -ນັກຮົບທົ່ວກອງບັນຊາການທະຫານແຂວງໄດ້ 8 ຄັ້ງ, ມີຈໍານວນພົນເຂົ້າຊົມທັງໝົດ 346 ຄົນ, ໄດ້ອະນາໄມບົວລະບັດພັດເຊັດວັດຖຸພັນຈັດແຈງບັນດາຮູບພາບໄດ້ 34 ຄັ້ງ, ວຽກງານສິນລະປະ – ວັນນະຄະດີ.

ໄດ້ຝຶກຊ້ອມລາຍການສະແດງຮັບໃຊ້ 3 ຄັ້ງ, ເສບຮັບໃຊ້ໜ້າທີ່ການເມືອງໄດ້ 19 ຄັ້ງ, ແລະ ໄດ້ບົວລະບັດພັດເຊັດເຄື່ອງດົນຕີເຂົ້າຮ່ວມຂະບວນການຕ່າງໆ ຂອງຫ້ອງ, ຂອງພະແນກເປັນປົກກະຕິ ແລະ ທິດທາງແຜນການຄາດໝາຍສູ້ຊົນໃນປີ 2021 ເພື່ອໃຫ້ວຽກງານເດີນແມ່ນແລ່ນສະດວກ ແລະ ມີປະສິດທິຜົນສູງ. ຈາກນັ້ນຕາງໜ້າພະແນກອົບຮົມ ແລະ ພະແນກວັດທະນະທໍາກົມໂຄສະນາອົບຮົມກົມໃຫ່ຍການເມືອງກອງທັບກໍ່ໄດ້ຂື້ນແນະນໍາກ່ຽວກັບການຈັດຕັ້ງປະຕິບັດວຽກງານໂຄສະນາ – ອົບຮົມຢູ່ບັນດາກົມກອງໃຫ້ຟົດຟື້ນແຂງແຮງ ແລະ ເຄື່ອນໄຫວໃຫ້ຕ້ອງຕາມພາລະບົດບາດສິດ ແລະ ໜ້າທີ່ຂອງຜູ້ຮັບຜິດຊອບວຽກງານດັ່ງກ່າວ, ພ້ອມນີ້ຄະນະພັກ – ຄະນະບັນຊາກົມກອງກໍ່ຕ້ອງໄດ້ສ້າງເງື່ນໄຂອໍານວຍຄວາມສະດວກໃຫ້ກັບວຽກງານໂຄສະນາເປັນຕົ້ນການສ້າງນັກຮົບ ແລະ ກົມກອງວັດທະນະທໍາ, ວຽກງານໂຄສະນາ – ປາຖະກະຖາ, ວຽກງານຫໍມູນເຊື້ອ, ສິນລະປະວັນນະຄະດີ ແລະ ວຽກງານຂ່າວສານສື່ມວນຊົນຕ້ອງໄດ້ເຄື່ອນໄຫວໃຫ້ຟົດຟື້ນແຂງແຮງ ແລະ ມີການສະຫຼຸບຖອດຖອນບົດຮຽນລາຍງານໃຫ້ຂັ້ນເທິງເປັນປະຈໍາເດືອນ, ປະຈໍາໄຕມາດ, ປະຈໍາປີ ແລະ ບັນຫາທີ່ຍັງຄົງຄ້າງທີ່ຈະໄດ້ສືບຕໍ່ປັບປຸງແກ້ໄຂເພື່ອໃຫ້ວຽກງານໄດ້ຮັບຜົນດີ.

ໂອກາດດັ່ງກ່າວ ສະຫາຍ ພັນເອກ ວິລະໄຊ ສົມສັກ ຮອງຫົວໜ້າກົມໂຄສະນາ – ອົບຮົມກົມໃຫ່ຍການເມືອງກອງທັບ ກໍ່ໄດ້ມີຄໍາເຫັນແນະນໍາຊຸກຍູ້ໃຫ້ພະແນກໂຄສະນາ – ອົບຮົມຫ້ອງການເມືອງທະຫານແຂວງຫຼວງພະບາງ ຕ້ອງໄດ້ເອົາໃຈໃສ່ເຮັດວຽກຕ້ອງມີການສະຫຼຸບຖອດຖອນບົດຮຽນໃຫ້ຖືກຕ້ອງຕາມຂັ້ນຕອນ, ສືບຕໍ່ສຶກສາອົບຮົມວຽກງານການເມືອງນໍາພາ – ແນວຄິດໃຫ້ພະນັກງານ – ນັກຮົບຢ່າງເປັນປົກກະຕິ, ສືບຕໍ່ສ້າງນັກຮົບ ແລະ ກົມກອງວັດທະນະທໍາຕ້ອງໃຫ້ຖືກຕ້ອງຕາມເປົ້າໝາຍທີ່ໄດ້ກໍານົດທີ່ຈະສ້າງເປັນນັກຮົບ ແລະ ກົມກອງວັດທະນະທໍາ, ວຽກງານໂຄສະນາປາຖະກະຖາ,ຊຸກຍູ້ສົ່ງເສີມໃຫ້ພະນັກງານ – ນັກຮົບເຂົ້າຊົມຫໍມູນເຊື້ອ, ຫ້ອງສະມຸດ, ສົ່ງເສີມພະນັກງານ – ນັກຮົບຮຽນຮ້ອງເພັງ 4 ບົດຂອງກອງທັບ, ຮຽນຟ້ອນ, ຮຽນອ່ານ, ຮຽນຂຽນ, ສ້າງທຸກເງື່ອນໄຂເພື່ອໃຫ້ໂຄສະນາໄດ້ເປັນເຈົ້າການເຄື່ອນໄຫວວຽກງານຕາມຄວາມສາມາດ. ຈາກນັ້ນ ສະຫາຍ ຮອງຫົວໜ້າກົມໂຄສະນາອົບຮົມກົມໃຫ່ຍການເມືອງກອງທັບພ້ອມຄະນະຍັງໄດ້ເຂົ້າເບິ່ງຊົມຫໍມູນເຊື້ອຂອງກອງບັນຊາການທະຫານແຂວງຫຼວງພະບາງ ຕື່ມອີກ.