ມີເດຍລາວແຂວງຄຳມ່ວນ ຂ່າວ: ກອງຄຳ ວັນທີ 23 ສິງຫາ 2021 ທີ່ສະໂມສອນໃຫຍ່ ຫຼັກ 4 ຂອງແຂວງຄຳມ່ວນ ໄດ້ຈັດພິທີປາຖະກະຖາ ສະເຫຼີມສະຫຼອງ ວັນສ້າງຕັ້ງ ລັດຖະທຳມະນູນ ຄົບຮອບ 30 ປີ (15 ສິງຫາ 1991 – 15 ສິງຫາ 2021) ໂດຍມີທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ, ມີບັນດາທ່ານການນຳຂອງແຂວງ, ຂອງເມືອງ, ຫົວໜ້າພະແນກການ, ກຳລັງ ປກຊ-ປກສ ຕະຫຼອດເຖິງ ພະນັກງານ-ວິຊາການຈາກຂະແໜງການອ້ອມຂ້າງແຂວງເຂົ້າຮ່ວມ.

ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ໄດ້ເປັນກຽດຂຶ້ນປາຖະກະຖາ ວັນສ້າງຕັ້ງລັດຖະທຳມະນູນ ຄົບຮອບ 30 ປີ ຊຶ່ງທ່ານໄດ້ເລົ່າຄືນປະຫວັດການກໍາເນີດ, ຄວາມໝາຍ ຄວາມສຳຄັນຂອງວັນລັດຖະທຳມະນູນແຫ່ງຊາດ ຊຶ່ງວັນລັດຖະທຳມະນູນຖືກຮັບຮອງ ແລະ ປະກາດໃຊ້ໃນວັນທີ 15 ສິງຫາ ປີ 1991 ເປັນກົດໝາຍພື້ນຖານຂອງຊາດ, ເປັນເຄື່ອງມືພື້ນຖານໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ແນໃສ່ເຮັດໃຫ້ປະເທດຊາດມີສະຖຽນລະພາບທາງດ້ານການເມືອງຢ່າງໝັ້ນທ່ຽງ, ສັງຄົມມີຄວາມສະຫງົບປອດໄພ ແລະ ເປັນລະບຽບຮຽບຮ້ອຍ ທັງເປັນພື້ນຖານໃຫ້ແກ່ການພັດທະນາກົດໝາຍຂອງປະເທດໃຫ້ເປັນລະບົບຄົບຊຸດ ແລະ ເຂັ້ມແຂງເທື່ອລະກ້າວ ຮັບປະກັນໃຫ້ແກ່ການປົກປັກຮັກສາ ແລະ ສ້າງສາປະເທດຊາດໄປຕາມຈຸດໝາຍສັງຄົມນິຍົມ.

ຈາກນັ້ນ ທ່ານ ວົງເພັດ ຈິດປັນຍາ ຮອງເລຂາພັກແຂວງ ກໍ່ໄດ້ຂຶ້ນຜ່ານ ກ່ຽວກັບ ບົດນຳ ແນວຄິດ ໄກສອນ ພົມວິຫານ ໃນການສ້າງລັດຖະທຳມະນູນແຫ່ງ ສປປ ລາວ ບົນພື້ນຖານການໝູນໃຊ້ຢ່າງປະດິດສ້າງບັນດາຫຼັກມູນທິດສະດີພື້ນຖານຂອງລັດທິມາກ-ເລນິນ ແລະ ບົດຮຽນຕໍ່ສູ້ປະຕິວັດ ຂອງຂະບວນການກອມມູນິດ ແລະ ກຳມະກອນສາກົນ ຊຶ່ງໄດ້ຮັບການທົດສອບ, ຊຸບຫຼໍ່ ແລະ ຢັ້ງຢືນຈາກພຶດຕິກຳຂອງການປະຕິວັດປະເທດເຮົາ. ແນວຄິດ ໄກສອນ ພົມວິຫານ ໃນການສ້າງລັດຖະທຳມະນູນ ແຫ່ງ ສປປ ລາວ ແມ່ນແນວຄິດພື້ນຖານໃນການສ້າງລັດແຫ່ງ ສປປ ລາວ ໃຫ້ເປັນລັດທີ່ປົກຄອງດ້ວຍກົດໝາຍທີ່ພັກເຮົາກຳອຳນາດ ແລະ ລັດກໍ່ຕ້ອງຫັນແນວທາງ, ແຜນນະໂຍບາຍຂອງພັກ ເປັນແຜນການ, ນະໂຍບາຍລະອຽດ, ເປັນມາດຕະການ ແລະ ກຳນົດໝາຍທີ່ມີລັກສະນະກົດໝາຍ ທັງເປັນຜູ້ຈັດຕັ້ງປະຕິບັດຢ່າງເຂັ້ມງວດ ກ່ອນອື່ນຕ້ອງຮັບຮູ້ວ່າປະເທດເຮົາຍັງບໍ່ທັນເປັນສັງຄົມນິຍົມ ແລະ ກໍ່ບໍ່ແມ່ນທຶນນິຍົມ, ພວກເຮົາຍັງຢູ່ໃນລະບອບປະຊາທິປະ ໄຕປະຊາຊົນ. ສະນັ້ນ ການສ້າງກົດໝາຍຕ້ອງສອດຄ່ອງກັບໜ້າທີ່ການເມືອງຂອງພັກ ແລະ ສະພາບຈຸດພິເສດຕົວຈິງຂອງການພັດທະນາປະເທດຊາດໃນໄລຍະໃໝ່.

ທ່ານ ນາງ ບັງອອນ ໄຊຍະສິດ ຮອງປະທານສະພາປະຊາຊົນແຂວງຄຳມ່ວນ ກໍ່ໄດ້ຂຶ້ນຜ່ານບົດຄວາມຊົມເຊີຍ ວັນສ້າງຕັ້ງລັດຖະທຳມະນູນ ຄົບຮອບ 30 ປີ ລັດຖະທຳມະນູນ ແຫ່ງ ສປປ ລາວ ໄດ້ຮັບຮູ້ຜົນງານອັນຍິ່ງໃຫຍ່ ທີ່ປະຊາຊົນເຮົາຍາດມາໄດ້ໃນພາລະກິດຕໍ່ສູ້ປົດປ່ອຍຊາດ, ປົກປັກຮັກສາ ແລະ ສ້າງສາປະເທດຊາດ ກໍ່ຄື ພາລະກິດປ່ຽນແປງໃໝ່ ແມ່ນໝາກຜົນລວມຍອດແຫ່ງສະຕິປັນຍາ ແລະ ການປະກອບຄວາມເຫັນຢ່າງກວ້າງຂວາງ ຂອງປະຊາຊົນລາວບັນດາເຜົ່າໃນທົ່ວປະເທດ ທີ່ສ່ອງແສງຢ່າງຈະ ແຈ້ງເຖິງຄວາມມຸ່ງມາດປາຖະໜາອັນສູງສົ່ງ ຍາວນານ ແລະ ຄວາມຕັດສິນໃຈອັນແຮງກ້າຂອງວົງຄະນະຍາດແຫ່ງຊາດລາວ ເພື່ອພ້ອມກັນສູ້ຊົນໃຫ້ບັນລຸຈຸດໝາຍສ້າງປະເທດລາວໃຫ້ເປັນປະເທດ ສັນຕິພາບ, ເອກະລາດ, ປະຊາທິປະໄຕ, ເອກະພາບ ແລະ ວັດທະນະຖາວອນ.

ຕະຫຼອດໄລຍະ 30 ປີ ທີ່ຜ່ານມາ, ທົ່ວພັກ, ທົ່ວລັດ, ທົ່ວກໍາລັງປະກອບອາວຸດ ແລະ ທົ່ວປວງຊົນລາວທັງຊາດໄດ້ຮ່ວມແຮງຮ່ວມໃຈກັນ, ສາມັກຄີກັນເປັນປຶກແຜ່ນແໜ້ນໜາພາຍໃນຊາດ ຢູ່ອ້ອມຂ້າງພັກ ແລະ ລັດເຮົາ, ພ້ອມກັນສູ້ຊົນບຸກບືນຜ່ານຜ່າອຸປະສັກຕ່າງໆ ຕັ້ງໜ້າເຂົ້າຮ່ວມປະຕິບັດ ແລະ ຜັນຂະຫຍາຍລັດຖະທໍາມະນູນ ແຫ່ງ ສປປ ລາວ, ປົກປັກຮັກສາ ແລະ ສ້າງສາປະເທດຊາດ, ເຮັດໃຫ້ປະເທດເຮົາ ມີສະຖຽນລະພາບທາງດ້ານການເມືອງຢ່າງໜັ້ນທ່ຽງ, ສັງຄົມມີຄວາມສະຫງົບ, ຄວາມປອດໄພ ແລະ ເປັນລະບຽບຮຽບຮ້ອຍໂດຍພື້ນຖານຕະຫຼອດມາ, ເສດຖະກິດ-ສັງຄົມ ໄດ້ຮັບການພັດທະນາຂະຫຍາຍຕົວຢ່າງຕໍ່ເນື່ອງ, ລະບົບແຫ່ງອໍານາດລັດປະຊາທິປະໄຕປະຊາຊົນ ໄດ້ຮັບການປັບປຸງໃຫ້ເຂັ້ມແຂງເປັນກ້າວໆ; ຖັນແຖວພະນັກງານ-ລັດຖະກອນ ໄດ້ຮັບການກໍ່ສ້າງຢ່າງເປັນລະບົບຕໍ່ເນື່ອງ; ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມດ້ວຍກົດໝາຍໄດ້ຮັບການຍົກສູງຂຶ້ນ; ສິດເປັນເຈົ້າ ແລະ ປະຊາທິປະໄຕ ຂອງປະຊາຊົນບັນດາເຜົ່າ ໄດ້ຮັບການເສີມຂະຫຍາຍ ແລະ ຄໍ້າປະກັນດ້ວຍລັດຖະທໍາມະນູນ ແລະ ກົດໝາຍ; ການພົວພັນຮ່ວມມືກັບພາກພຶ້ນ ແລະ ສາກົນ ໄດ້ຮັບການເປີດກວ້າງບົນພື້ນຖານລັດຖະທໍາມະນູນ, ກົດໝາຍ ແລະແນວທາງການຕ່າງປະເທດ ແຫ່ງ ສປປ ລາວເຮັດໃຫ້ບົດບາດອິດທິພົນຂອງພັກ, ລັດ ແລະ ປະເທດຊາດຂອງພວກເຮົາໄດ້ຮັບການເຊີດຊູສູງຂຶ້ນໃນເວທີສາກົນ ຢ່າງຕໍ່ເນື່ອງ.