ມີເດຍລາວແຂວງເຊກອງ ພາບ-ຂ່າວ: ດາວສະຫວັນ ໄຊລາສອນ ນັກຂ່າວເມືອງລະມາມ ເບີໂທ 02092524685
ໃນຄັ້ງວັນທີ 19-20 ສິງຫາ 2021 ນີ້, ທ່ານ ວົງເດືອນ ຈັນທະບຸດຊຽງ ເຈົ້າເມືອງໆລະມາມ, ແຂວງເຊກອງ, ທ່ານ ໄຊຍະຫວັດ ກ້ອນຄຳໝັ້ນ ຮອງເລຂາພັກເມືອງປະທານກວດກາພັກ-ລັດ ສະມາຊິກສະພາປະຊາຊົນແຂວງຊຸດທີ2 ພ້ອມຄະນະ ໄດ້ເຄື່ອນໄຫວລົງຕິດຕາມວຽກງານຕ້ານ ແລະສະກັດກັ້ນການແຜ່ລະບາດຂອງພະຍາດໂຄວິດ-19 ຢູ່ຂອບເຂດເມືອງລະມາມ.

ການລົງຕິດຕາມວຽກງານຂອງທ່ານເຈົ້າເມືອງລະມາມຄັ້ງນີ້ໄດ້ຮັບຟັງການລາຍງານຈາກທ່ານ ດຣ ສີທົນ ສາຍວິໄລສັກ ຫົວໜ້າຫ້ອງການສາທາລະນະສຸກເມືອງລະມາມ ແຂວງເຊກອງ ເຊິ່ງທ່ານກ່າວວ່າ: ໄລຍະຜ່ານມາໄດ້ເອົາໃຈໃສ່ຈັດຕັ້ງປະຕິບັດຕາມຄຳສັ່ງວ່າດ້ວຍມາດຕະການຕ່າງໆຂອງຂັ້ນເທິງຢ່າງເຄັ່ງຄັດ ແລະເຂັ້ມງວດໃນການເຝົ້າລະວັງ ແລະຕິດຕາມການແຜ່ລະບາດຂອງພະຍາດໂຄວິດ-19, ເຝົ້າລະວັງ,ຕິດຕາມການຜ່ານ ເຂົ້າ-ອອກຂອງກຸ່ມຄົນທີ່ເດີ່ນທາງຈາກເຂດສ່ຽງຕ່າງໂດຍສົມທົບກັບບັນດາຂະແໜ່ງການທີ່ກ່ຽວຂ້ອງ,ໄດ້ຕັ້ງຈຸດກວດກັ່ນກ່ອງຄົນເຂົ້າເມືອງມີ 2 ດ່ານຄື: ດ້ານເຊນ້ອຍ ໄປແຂວງອັດຕະປື ແລະ ດ່ານ ຕະນຶມ ໄປຫາເມືອງກະລຶມ ແຂວງ ເຊກອງ, ສຳລັບແຜນໃນຕໍ່ໜ້າ ແມ່ນຈະໄດ້ສືບຕໍ່ເຝົ້າລະວັງ, ຕິດຕາມການແຜ່ລະບາດຂອງພະຍາດໂຄວິດ-19 ຢ່າງຕໍ່ເນື່ອງ ສືບຕໍ່ຮັບລາຍງານປະຈຳວັນຈາກບ້ານ, ຈາກ ປກຊ-ປກສ,ຈາກ 7 ໂຮງໝໍນ້ອຍ, ໂຮງໝໍແຂວງ ແລະ ສືບຕໍ່ລົງສືບສວນ-ສອບສວນ ແລະ ເກັບຕົວຢ່າງ ຖ້າມີກໍລະນີສົງໄສ, ສືບຕໍ່ຈ່າຍອຸປະກອນການແພດ ໃຫ້ທິມງານທີ່ລົງປະຈຳຢູ່ສູນຈຳກັດບໍລິເວນ ແລະພະນັກງານປະຈຳຢູ່ຫ້ອງການສາທາລະນະສຸກເມືອງ, ສືບຕໍ່ຕິດຕາມອາການ ຂອງນັກສຶກສາທີ່ຢູ່ສູນຈຳກັດບໍລິເວນຕ່າງໆ ເປັນປົກກະຕິ.

ໂອກາດນີ້, ທ່ານເຈົ້າເມືອງລະມາມ ກໍໄດ້ສະແດງຄວາມຊົມເຊີຍພະນັກງານແພດໝໍ, ເຈົ້າໜ້າທີ່ທຸກຄົນທີ່ເຮັດໜ້າທີ່ ຂອງຕົນຢ່າງສຸດກົກສຸດປາຍ, ພ້ອມທັງຮຽກຮ້ອງໃຫ້ຮັກສາ ແລະ ປ້ອງກັນຕົນເອງໃຫ້ດີທີ່ສຸດ ເພື່ອບໍ່ໃຫ້ມີການຕິດເຊື້ອພະຍາດໂຄວິດ-19. ໃນຂະນະດຽວກັນທ່ານ ເຈົ້າເມືອງຍັງໄດ້ລົງເຄື່ອນໄຫວຕິດຕາມສູນຈຳກັດບໍລິເວນ ແລະຈຸດກັ່ນກ່ອງແຕ່ລະຈຸດ ພ້ອມນໍາເອົານໍ້າດື່ມ ແລະ ໝີ່ໄວໆມອບໃຫ້ພະນັກງານທີ່ປະຕິບັດໜ້າທີ່ໃນຄັ້ງນີ້ ຕື່ມອີກ.