ມີເດຍລາວແຂວງຫຼວງພະບາງ ຂ່າວ: ສົມພອນ ສຸວັນທອນ; ພາບ: ໄຊຍະສອນ ລັດຕະນະວົງ. ຕອນເຊົ້າຂອງວັນທີ 20 ສິງຫາ 2021 ນີ້ ກອງປະຊຸມສະຫຼຸບວຽກງານການກວດກູ້ ແລະ ທໍາລາຍລະເບີດບໍ່ທັນແຕກໂຄງການກໍ່ສ້າງເສັ້ນທາງລົດໄຟລາວ – ຈີນ ໄດ້ຈັດຂຶ້ນຢູ່ທີ່ກອງບັນຊາການທະຫານແຂວງຫຼວງພະບາງ ໂດຍການເປັນປະທານຂອງ ສະຫາຍ ພົນເອກ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ,ມີສະຫາຍ ຄໍາຂັນ ຈັນທະວີສຸກ ກໍາມະການສູນກາງພັກ ເລຂາພັກແຂວງ ເຈົ້າແຂວງຫຼວງພະບາງ,ສະຫາຍ ວຽງສະຫວັນ ສີພັນດອນ ກໍາມະການສູນກາງພັກ ລັດຖະມົນຕີກະຊວງໂຍທາທິການ ແລະ ຂົນສົ່ງ, ຄະນະຊີ້ນໍາໂຄງການທາງລົດໄຟລາວ – ຈີນ ພ້ອມດ້ວຍປະທານບໍລິສັດກໍ່ສ້າງທາງລົດໄຟລາວ – ຈີນ, ຄະນະຊີ້ນໍາກວດກູ້ລະເບີດ, ຫົວໜ້າ -ຮອງກອງພົນ,ກອງບັນຊາການທະຫານແຂວງຫຼວງພະບາງ ແລະພະນັກງານ – ນັກຮົບເຂົ້າຮ່ວມ.

ສະຫາຍ ພັນເອກ ວຽງໄຊ ໄຊສະໝອນ ຫົວໜ້າກົມຊ່າງແຊງ, ກົມໃຫຍ່ເສນາທິການກອງທັບ ໄດ້ຜ່ານບົດສະຫຼຸບຜົນສໍາເລັດການກວດກູ້ ແລະ ທໍາລາຍລະເບີດບໍ່ທັນແຕກທີ່ຍັງຕົກຄ້າງໃນໂຄງການກໍ່ສ້າງເສັ້ນທາງລົດໄຟລາວ – ຈີນໄລຍະ 2011 – 2021 , ກະຊວງປ້ອງກັນປະເທດໄດ້ຮັບການມອບໝາຍວຽກງານກວດກູ້ ແລະ ທໍາລາຍລະເບີດທາງລົດໄຟລາວ – ຈີນຈາກລັດຖະບານລາວ ໄດ້ມອບໝາຍໃຫ້ກົມໃຫຍ່ເສນາທິການຈັດຕັ້ງ, ນໍາໃຊ້ກໍາລັງເຫຼົ່າຮົບຊ່າງແສງທັງ 326 ສະຫາຍ, ໄປປະຕິບັດໜ້າທີ່ຢູ່ໃນ 6 ຊວງສັນຍາ, ແຕ່ລະຊວງສັນຍາໄດ້ຈັດຕັ້ງສູນບັນຊາການ ແລະ 1 ກອງຮ້ອຍກວດກູ້ ແລະ ທໍາລາຍລະເບີດ, ພ້ອມກັນນີ້ຍັງໄດ້ຈັດຕັ້ງ 1 ໝວດເຄື່ອນໄຫວໄປກວດກູ້ລະເບີດຢູ້ໃຕ້ນໍ້າ.ນັບແຕ່ວັນທີ 16 ມັງກອນ 2011 – 20 ພຶດສະພາ 2021 ການກວດກູ້ ແລະ ທໍາລາຍລະເບີດບໍ່ທັນແຕກໃນໂຄງການກໍ່ສ້າງເສັ້ນທາງລົດໄຟລາວ – ຈີນ ມີສະຖານີ 13 ແຫ່ງ, ສູນສັງລວມເຕັກນິກ 1 ແຫ່ງ, ປາກອຸໂມງເຂົ້າ – ອອກ 127 ປາກ, ແຄ້ມກໍ່ສ້າງ 34 ແຫ່ງ, ໂຮງງານເບຕົງ 13 ແຫ່ງ, ສາງວັດສະດຸ 13 ແຫ່ງ, ສາງລະເບີດ 14 ແຫ່ງ, ບ່ອນຖົມບໍດິນ 113 ແຫ່ງ, ມີທາງຊອຍ 28,06 km, ລວມເນື້ອທີ່ຂອງການກວດກູ້ທັງໝົດ 3.330.49 ເຮັກຕາ, ເນື້ອທີ່ຖາງປາ ແລະ ອະນາໄມພື້ນທີ່ເພື່ອກວດກູ້ລະເບີດບໍ່ທັນແຕກມີ 2.490.59 ເຮັກຕາ, ກວດກູ້ລະເບີດບໍ່ທັນແຕກໄດ້ຈໍານວນ 487 ລູກ, ກວດກູ້ຊີ້ນສວນລະເບີດ ແລະ ໂລຫະຕ່າງໆໄດ້ທັງໝົດ 435.909 ຊິ້ນສວນ. ແຕ່ຍັງມີບາງຈຸດທີ່ຍັງຄ້າງຄາ ໂດຍສະເພາະແມ່ນເນຶ້ອທີ່ບ່ອນທີ່ບໍ່ໄດ້ກວດກູ້ຍ້ອນມີການກໍ່ສ້າງປະກອບມີ ທາງຊອຍຍາວ 4,14 km, ຂົວ 1 ແຫ່ງ, ປາກອຸໂມງ 31 ປາກ, ໂຮງໄມ້ 12 ແຫ່ງ, ແຄ້ມ 36 ແຫ່ງ, ສາງ 9 ແຫ່ງ, ຫ້ອງການ 1 ແຫ່ງ ແລະ ບ່ອນຖິ້ມບໍດິນ 14 ແຫ່ງລວມມີເນື້ອທີ່ 123,17 ເຮັກຕາ.

ໂອກາດດັ່ງກ່າວນີ້ ຕາງໜ້າບໍລິສັດກໍ່ສ້າງທາງລົດໄຟ ແລະ ຄະນະອານຸກໍາມະການຮັບຜິດຊອບ ກໍ່ໄດ້ພັດປ່ຽນກັນຂື້ນ ປະກອບຄໍາຄິດເຫັນໃສ່ບົດສະຫຼຸບດ້ວຍຄວາມຮັບຜິດຊອບສູງ ແລະ ເອກະພາບສຸມໃສ່ຈັດຕັ້ງປະຕິບັດບາງໜ້າວຽກທີ່ຍັງຄ້າງຄາ ໃຫ້ບັນລຸຕາມຈຸດປະສົງ ແລະ ຄາດໝາຍ.
ຈາກນັ້ນກອງປະຊຸມຍັງໄດ້ມີການປະດັບຫຼຽນກາແຮງງານຂອງລັດຖະບານໃຫ້ກົມກອງລວມໝູ່ 4 ກົມກອງ, ຫຼຽນໄຊພິລະອາດຫານຊັ້ນ III ຂອງກອງທັບໃຫ້ກົມກອງລວມໝູ່ 6 ກົມກອງ, ຫຼຽນໄຊພິລະອາດຫານຊັ້ນ III ໃຫ້ບຸກຄົນ 36 ສະຫາຍ ແລະມອບໃບຍ້ອງຍໍຂອງລັດຖະບານ, ກະຊວງປ້ອງກັນປະເທດ ແລະ ກົມໃຫຍ່ການເມືອງກອງທັບໃຫ້ກົມກອງລວມໝູ່ ແລະ ບຸກຄົນຕື່ມອີກຈໍານວນໜຶ່ງ . ໂດຍແມ່ນ ທ່ານ ພົນເອກ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ ແລະບັນດາລັດຖະມົນຕີ-ຮອງລັດຖະມົນຕີ,ຫົວໜ້າກົມຈາກກະຊວງປ້ອງກັນປະເທດ ພັດປ່ຽນກັນມອບຢ່າງສົມກຽດ.