ມີເດຍລາວແຂວງເຊກອງ ປັດຈຸບັນ ປະຊາຊົນຜູ້ທີ່ມີອາຍຸ 18 ປີຂຶ້ນໄປໃນທົ່ວແຂວງເຊກອງ ໄດ້ຮັບການສັກວັກຊິນປ້ອງກັນໂຄວິດ-19 ແລ້ວ 33.022 ຄົນ, ໃນນີ້ສັກຄົບ 2 ເຂັມແລ້ວ 26.317 ຄົນກວມເອົາ 20% ຂອງພົນລະເມືອງທັງໝົດທົ່ວແຂວງ ເຊິ່ງການສັກວັກຊິນ ເພື່ອສ້າງພູມຄຸມກັນໃຫ້ແກ່ຕົນເອງຕໍ່ພະຍາດ COVID-19.

ທ່ານ ນາງ ລໍາພັນ ໄຊຄໍາມີ ຮອງຫົວໜ້າພະແນກສາທາລະນະສຸກແຂວງ, ຕາງໜ້າກອງເລຂາຄະນະສະເພາະກິດ ເພື່ອປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ຂັ້ນແຂວງໄດ້ລາຍງານກ່ຽວກັບສະພາບການລະບາດ ແລະການສັກວັກຊິນປ້ອງກັນ COVID-19 ໃນວັນທີ 23 ສິງຫາ 2021 ວ່າ: ແຂວງເຊກອງໄດ້ຮັບວັກຊິນປ້ອງກັນໂຄວິດ-19 ຈາກລັດຖະບານ ກໍຄືຄະນະສະເພາະກິດຂັ້ນສູນກາງທັງໝົດ 5 ຄັ້ງລວມມີ 43.924 ໂດສ ເຊິ່ງປະກອບມີວັກຊິນຊີໂນຟາມ (Sinopharm) ຈໍານວນ 21.804 ໂດສ; ວັກຊິນຈອນສັນແອນຈອນສັນ (Johnson & Johnson) ຈໍານວນ 15.720 ໂດສ ແລະວັກຊິນ ແອັສຕຣາຊີເນກາ (AstraZeneca) ຈໍານວນ 6.400 ໂດສ ເຊິ່ງໄດ້ເລັ່ງສັກໃຫ້ປະຊາຊົນກຸ່ມເປົ້າໝາຍ, ທັງນີ້ ເພື່ອສ້າງພູມຄຸມກັນໃຫ້ແກ່ຕົນເອງຕໍ່ພະຍາດ COVID-19. ປັດຈຸບັນ ທົ່ວແຂວງເຊກອງ ກວດພົບຜູ້ຕິດເຊື້ອໂຄວິດ-19 ສະສົມທັງໝົດ 4 ກໍລະນີ, ໃນນັ້ນເມືອງກະລຶມ 3 ກໍລະນີ ແລະເມືອງລະມາມ 1 ກໍລະນີ ເຊິ່ງເປັນການຕິດເຊື້ອໃນຊຸມຊົນ, ປັດຈຸບັນແມ່ນໄດ້ເຂົ້ານອນປິ່ນປົວຢູ່ສູນປິ່ນປົວທີ່ຄະນະສະເພາະກິດຂັ້ນແຂວງກໍານົດໄວ້.

ໃນໂອກາດນີ້, ທ່ານ ນາງ ລໍາພັນ ໄຊຄໍາມີ ໄດ້ຮຽກຮ້ອງມາຍັງພໍແມ່ປະຊາຊົນ ແລະທຸກພາກສ່ວນໃນສັງຄົມ ຕ້ອງເປັນເຈົ້າການປະຕິບັດມາດຕະການຕ່າງໆທີ່ພັກ-ລັດຖະບານ ກໍຄືທ່ານເຈົ້າແຂວງເຊກອງ ແລະຄະນະສະເພາະກິດວາງອອກຢ່າງເຂັ້ມງວດເປັນຕົ້ນ: ເວລາອອກຈາກບ້ານຈາກເຮືອນໃຫ້ໃສ່ຜ້າອັດປາກ-ອັດດັງ, ຮັກສາໄລຍະຫ່າງ 1-2 ແມັດ, ບໍ່ໄປບ່ອນທີ່ມີຄົນຫຼາຍ (ສະຖານທີ່ແອອັດ), ລ້າງມືດ້ວຍນໍ້າສະອາດໃສ່ສະບູ ຫຼື ເຈວລ້າງມືທຸກໆຄັ້ງ ເພື່ອສະກັດກັ້ນການແຜ່ລະບາດຂອງພະຍາດດັ່ງກ່າວ ໃຫ້ຢຸດຕິລົງໂດຍໄວ.

(ຂ່າວ-ພາບ: ແກ້ວໄຊຍະວົງ)