ມີເດຍລາວແຂວງຫຼວງພະບາງ ຂ່າວ: ສົມພອນ ສຸວັນທອນ; ພາບ: ໄຊຍະສອນ ລັດຕະນະວົງ. ຕອນບ່າຍຂອງວັນທີ 20 ສິງຫາ 2021 ນີ້ ທ່ານ ພົນເອກ ຈັນສະໝອນ ຈັນຍະລາດ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ ໄດ້ພົບປະໂອ້ລົມພະນັກງານຫຼັກແຫຼ່ງຢູ່ກອງບັນຊາການທະຫານແຂວງຫຼວງພະບາງ ໂດຍມີສະຫາຍ ພັນເອກ ແປ້ນຄໍາ ບຸດຈັນແພງ ກໍາມະການພັກແຂວງ ເລຂາຄະນະພັກ ຫົວໜ້າການເມືອງກອງບັນຊາການທະຫານແຂວງຫຼວງພະບາງ ພ້ອມດ້ວຍຄະນະພັກ – ຄະນະບັນຊາການ, ອົງການ 5 ຫ້ອງ ແລະພະນັກງານຫຼັກແຫຼ່ງກົມກອງອ້ອມຂ້າງ ເຂົ້າຮ່ວມຮັບຟັງ.

ການມາຢ້ຽມຢາມ ແລະພົບປະພະນັກງານນັກຮົບກອງບັນຊາການທະຫານແຂວງຄັ້ງນີ້ ສະຫາຍ ພັນເອກ ວິລ່ຽມ ວົງທິສານ ຮອງເລຂາຄະນະພັກ ຫົວໜ້າການທະຫານກອງບັນຊາການທະຫານແຂວງ ກໍໄດ້ລາຍງານສະພາບການຈັດຕັ້ງປະຕິບັດໜ້າທີ່ວຽກງານ 6 ເດືອນຕົ້ນປີ 2021 ປິ່ນອ້ອມ 4 ໜ້າທີ່ໃຫຍ່ 26 ແຜນງານທີ່ຄະນະພັກກະຊວງປ້ອງກັນປະເທດວາງ ພ້ອມທັງທິດທາງສູ້ຊົນ 6 ເດືອນທ້າຍປີ 2021 ໃຫ້ທ່ານຮອງນາຍົກລັດຖະມົນຕີ ຮັບຊາບ.

ຈາກນັ້ນໂອກາດນີ້ ທ່ານ ຈັນສະໝອນ ຈັນຍະລາດ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ ກໍໄດ້ມີຄໍາເຫັນໂອ້ລົມ ກ່ອນອື່ນທ່ານໄດ້ຊົມເຊີຍຜົນງານ ແລະ ໄຊຊະນະທີ່ຄະນະພັກ – ຄະນະບັນຊາ ແລະ ພະນັກງານ – ນັກຮົບກອງບັນຊາການທະຫານແຂວງ ໄດ້ພ້ອມກັນຍາດມາໄດ້ໃນໄລຍະຜ່ານມາ. ພ້ອມທັງຮຽກຮ້ອງໃຫ້ຄະນະພັກ – ຄະນະບັນຊາຍົກສູງຄວາມເປັນເອກະພາບບົນພື້ນຖານທັດສະນະຂອງພັກ, ຂອງຄະນະປ້ອງກັນຊາດ – ປ້ອງກັນຄວາມສະຫງົບສູນກາງ ຕໍ່ສະພາບການພັນແປ່ຂອງໂລກ ທີ່ພວມຜັນແປໄປຢ່າງສັບສົນ, ມີທັງສິງທີ່ເອື້ອອໍານວຍ, ທາທາຍທົດສອບ, ເຊິ່ງໄດ້ສົ່ງຜົນກະທົບທາງກົງ ແລະ ທາງອ້ອມ, ທັງສຽງເປັນ, ສຽງຕາຍ ຕໍ່ລະບອບການເມືອງໃໝ່ຂອງພວກເຮົາ, ໃນນັ້ນໃຫ້ເອົາໃຈໃສ່ປັບປຸງກໍ່ສ້າງກໍາລັງປະກອບອາວຸດ ໃຫ້ມີຄວາມໜັກແໜ້ນທາງດ້ານການເມືອງ, ເຂັ້ມແຂງດ້ານການຈັດຕັ້ງ, ສ້າງກອງທັບໃຫ້ມີລະບຽບແບບແຜນ ແລະ ກ້າວຂື້ນທັນສະໄໝ, ເອົາໃຈໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ V ຂອງອົງຄະນະພັກກະຊວງປ້ອງກັນປະເທດ ໃຫ້ເປັນແຜນງານ, ຂະບວນການ ແລະ ວຽກງານຕົວຈິງ ໂດຍສະເພາະແມ່ນຮັບປະກັນໃຫ້ມີຄວາມສະຖຽນລະພາບທາງດ້ານການເມືອງ, ມີຄວາມສະຫງົບ ແລະ ຄວາມເປັນລະບຽບຮຽບຮ້ອຍທາງສັງຄົມ

ດ້ວຍການສືບຕໍ່ຫັນລົງກໍ່ສ້າງຮາກຖານການເມືອງ ເພື່ອກໍາແໜ້ນສະພາບກຸ່ມຄົນບໍ່ຫວຫວັງດີ ແລະ ມີມາດຕະການແກ້ໄຂຢ່າງສຽບຂາດ, ໂດຍເອົາແນວຄິດການເມືອງເປັນກົກ, ປະຕິບັດຕາມ 4 ເນື້ອໃນ 4 ຄາດໝາຍ, ເອົາເສດຖະກິດເປັນໃຈກາງ, ການທະຫານເປັນພື້ນຖານສໍາຄັນກ່ວາໝູ່ ແລະ ເອົາວຽກງານພັກ, ວຽກງານພະນັກງານເປັນບັນຫາຕັດສິນຊີ້ຂາດ, ເອົາໃຈໃສ່ປັບປຸງກໍ່ສ້າງກໍາລັງດ້ວຍການເຊື່ອມຊຶມກໍາແໜ້ນດ້ານກົດໝາຍນາຍທະຫານ, ກົດໝາຍວ່າດ້ວຍການປ້ອງກນຊາດ, ປະຕິບັດ 3 ໜ້າທີ່ 4 ການພົວພັນ ແລະ ປະຕິບັດ 7 ລະບອບ 18 ວຽກໃຫ້ເປັນປົກກະຕິ, ເອົາໃຈໃສ່ແກ້ໄຂຂອດກົນໄກລະບຽບການນະໂຍບາຍຕ່າງໆ ຕໍ່ນາຍ ແລະ ພົນທະຫານໃຫ້ແທດເໝາະກັບສະພາບຄວາມເປັນຈິງ, ເອົາໃຈໃສ່ປົກປັກຮັກສາ ແລະ ຄຸ້ມຄອງພາຫະນະ, ອາວຸດຍຸດໂທປະກອນຂອງກອງທັບບໍ່ໃຫ້ຕົກເຫຍເສຍຫາຍ, ຕິດພັນການການຝຶກແອບຮໍ່າຮຽນການເມືອງ, ການທະຫານ, ພະລາທິການ, ເຕັກນິກໃຫ້ເປັນຂະບວນຟົດຟື້ນຕໍ່ເນື່ອງ, ໄປພ້ອມໆກັບການສຶກສາປ້ອງກັນຊາດທົ່ວປວງຊົນຮອບດ້ານ, ເອົາໃຈໃສ່ກໍ່ສ້າງພະນັກງານສືບຖອດ 3 ຮຸນ ແລະ ພະນັກງານຊົນເຜົ່າໃຫ້ມີຄຸນນະພາບ, ສືບຕໍ່ສ້າງກອງຮາກຖານເຂັ້ມແຂງ, ໜ່ວຍພັກຮູ້ນໍາພາຮອບດ້ານໃຫ້ເປັນປົກກະຕິ ເພື່ອຕີລາຄາມາດຖານຂອງພະນັກງານການນໍາພາໃນການກໍ່ສ້າງກໍາລັງ, ຍົກສູງນໍ້າໃຈເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ, ສືບຕໍ່ເຮັດວຽກງານພົວພັນການຕ່າງປະເທດ ຕາມແນວທາງຍຶດໝັ້ນ ແລະ ເປີດກ້ວາງແຕ່ມີການເລືອກເຟັ້ນການພົວຮ່ວມມືເພື່ອນມິດຍຸດທະສາດສັງຄົມນິຍົມ, ເອົາໃຈໃສ່ຍົກສູງຄວາມຮັບຜິດຊອບທາງດ້່ານການເມືອງ, ພ້ອມກັນນີ້ກໍ່ຕ້ອງສືບຕໍ່ຝຶກຝົນຫຼໍ່ຫຼອມຕົນເອງໃຫ້ມີຄຸນທາດການເມືອງ, ຄຸນສົມບັດ, ສິນທໍາປະຕິວັດ ແລະ ຄວາມຮູ້ຄວາມສາມາດ.

ເພີ່ມທະວີຄວາມສາມັກຄີພາຍໃນໃຫ້ເປັນປຶກແຜນແໜ້ນໜາ ແລະ ເອົາໃຈໃສ່ປະຕິບັດຫຼັກການລວມສູນປະຊາທິປະໄຕ, ເຮັດວຽກເປັນໝູ່ຄະນະ, ແບ່ງບຸກຄົນຮັບຜິດຊອບ, ເພື່ອປັບປຸງວິທີເຮັດວຽກໃຫ້ມີແບບແຜນທັນສະໄໝ.