ມີເດຍລາວແຂວງຫຼວງນ້ຳທາ ຂ່າວ: ສົມພອນ ຂຸນດາວົງ 020 55777741 ກາງເດືອນ ສິງຫາ 2021 ເຈົ້າໜ້າທີ່ກອງຕຳຫຼວດຈະລາຈອນ-ມອດໄຟ ປກສ ເມືອງສິງ ແຂວງຫຼວງນ້ຳທາ ໄດ້ອອກກວດກາປະຈຳປ້ອມ 4 ແຍກ ບ້ານນ້ຳແກ້ວຫຼວງ ຕາມເທດສະບານເມືອງສິງ ພົບເຫັນຜູ້ທີ່ລະເມີດກົດລະບຽບການສັນຈອນ ໂດຍການດັດແປງສະພາບເຕັກນິກລົດ ຈຳນວນ 8 ຄັນ. ຈາກນັ້ນ, ຈຶ່ງໄດ້ເຊີນເອົາຜູ້ປົກຄອງ ພ້ອມດ້ວຍລູກຫຼານຜູ້ທີ່ລະເມີດມາສຶກສາອົບຮົມ. ໂດຍການເຂົ້າຮ່ວມຂອງ ທ່ານ ພັນຕີ ສີວັນໄຊ ຈັນທະພິໄຊ ຫົວໜ້າກອງຕຳຫຼວດຈະລາຈອນ-ມອດໄຟ ປກສ ເມືອງສິງ, ມີອົງການຈັດຕັ້ງບ້ານ, ພ້ອມດ້ວຍພະນັກງານ ພາຍໃນກອງຕຳຫຼວດຈະລາຈອນເຂົ້າຮ່ວມ.

ທ່ານ ພັນຕີ ສີວັນໄຊ ຈັນທະພິໄຊ ຫົວໜ້າກອງຕຳຫຼວດຈະລາຈອນ-ມອດໄຟ ປກສ ເມືອງສິງ ໄດ້ໃຫ້ຮູ້ວ່າ: ການທີ່ເຊີນເອົາພໍ່ແມ່ ແລະ ຜູ້ປົກຄອງ ແລະ ຜູ້ທີ່ລະເມີດລະບຽບການສັນຈອນເຂົ້າມາຄັ້ງນີ້ ກໍ່ເພື່ອສຶກສາອົບຮົມ ແລະ ກ່າວເຕືອນນັກຂັບຂີ່ທີ່ປັບແຕ່ງ,ດັດແປງສະພາບເຕັກນິກລົດເປັນຕົ້ນແມ່ນ ລົດບໍ່ມີເອກະສານຈຳນວນ 2 ຄັນ, ດັດແປງປັບແຕ່ງສຽງທໍ່ໄອເສຍສຽງດັງເກີນຂອບເຂດ 8 ຄັນ, ໃສ່ລາງນ້ອຍ 3 ຄັນ, ລໍ້ນ້ອຍ-ຕີນນ້ອຍ 2 ຄັນ ແລະ ຍັງມີອຸປະກອນເສີມແຕ່ງລົດ ທີ່ບໍ່ໄດ້ມາດຖານຂອງໂຮງງານທີ່ກຳນົດໄວ້ເຊີ່ງເປັນການ ລະເມີດຕໍ່ລະບຽບການຈະລາຈອນທາງບົກ ແລະ ຄວາມບໍ່ເປັນລະບຽບຮຽບຮ້ອຍພາຍໃນສັງຄົມ, ມີປະເພດລົກຈັກ ລວມທັງໝົດ 8 ຄັນ, ມີຜູ້ລະເມີດ 8 ຄົນ, ອາຍຸລະຫວ່າງ 17-20 ປີ.

ຈາກນັ້ນ, ກໍ່ໄດ້ສ້າງບົດບັນທຶກ ແລະ ນຳເອົາອາໄລທີ່ຖືກຕ້ອງຕາມສະພາບເຕັກນິກຂອງໂຮງງານມາປ່ຽນໃສ່ລົດ ແລ້ວຈຶ່ງອະນຸຍາດນຳອອກໄປຊົມໃຊ້. ພ້ອມນັ້ນ ກໍ່ໄດ້ມອບໃຫ້ພໍ່ແມ່ຜູ້ປົກຄອງ ສືບຕໍ່ເອົາໃຈໃສ່ໃນການຕິດຕາມ, ສຶກສາອົບຮົມສັ່ງສອນ ແລະ ຄຸ້ມຄອງການຫຼີ້ນ ການທ່ຽວຂອງລູກຫຼານຕື່ມອີກ.

ພ້ອມດຽວກັນ, ທ່ານ ພັນຕີ ສີວັນໄຊ ຈັນທະພິໄຊ ຫົວໜ້າກອງຕຳຫຼວດຈະລາຈອນ-ມອດໄຟ ປກສ ເມືອງສິງ ຍັງໄດ້ຮຽກຮ້ອງເຖິງບັນດານັກຂັບຂີ່ ຫ້າມດັດແປງສະພາບເຕັກນິກລົດທຸກປະເພດ, ຫ້າມແຂ່ງລົດ, ຂັບຂີ່ລົດເປັນພືງ,ເປັນແພ ສ້າງຄວາມສັບສົນຢູ່ທ້ອງຖະໜົນຫຼວງ, ຫ້າມທ່ຽວເດິກດືນເກີນໂມງ ເວລາທີ່ທາງການໄດ້ກຳນົດໄວ້ ຖ້າຫາກຜູ້ໃດຝ່າຝືນ ທາງເຈົ້າໜ້າທີ່ພົບເຫັນຈະໄດ້ດຳເນີນຕາມລະບຽບກົດໝາຍ.