ມີເດຍລາວແຂວງໄຊສົມບູນ ຂ່າວ: ນາງ ພາພອນ ນະວົງ ພິທີ ປະກາດການຈັດຕັ້ງຫົວໜ້າ ແລະ ຮອງຫົວໜ້າຂະແໜງ ພະແນກການເງິນ ແຂວງໄຊສົມບູນ ໄດ້ຈັດຂຶ້ນໃນວັນທີ 24 ສິງຫາ ນີ້ ທີ່ຫ້ອງປະຊຸມຂອງຕົນ. ໂດຍການເປັນປະທານຂອງ ທ່ານ ສຸກສະຫວາດ ວົງພູມເຫຼັກ ຮອງເຈົ້າແຂວງໄຊສົມບູນ, ຜູ້ຊີ້ນໍາວຽກງານເສດຖະກິດ, ມີທ່ານ ປ.ອ ທອງປະເສີດ ໄຊຍະລາດ ຫົວໜ້າພະແນກການເງິນ ແຂວງ ພ້ອມດ້ວຍຮອງຫົວໜ້າພະແນກ, ຫົວໜ້າ-ຮອງຫົວໜ້າຂະແໜງ ຕະຫລອດຮອດພະນັກງານພາຍໃນພະແນກ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.

ໃນພິທີ ທ່ານ ບຸນຖະໜອມ ສິດທິນໍລາດ ຮອງຫົວໜ້າຄະນະຈັດຕັ້ງ ແຂວງ ໄດ້ຂຶ້ນຜ່ານຂໍ້ຕົກລົງຂອງທ່ານເຈົ້າແຂວງ ວ່າດ້ວຍການແຕ່ງຕັ້ງພະນັກງານດຳລົງຕໍາແໜ່ງບໍລິຫານ ໃຫ້ພະແນກການເງິນແຂວງ ຈໍານວນ 5 ທ່ານ ຄື ທ່ານ ສະແຫວງ ໄວຍະກອນ ຮອງຫົວໜ້າຂະແໜງ ຂຶ້ນເປັນຫົວໜ້າຂະແໜງບັນຊີ-ກວດກາ, ທ່ານ ສະຫງວນພາບ ວົງເດືອນ ຮອງຫົວໜ້າຂະແໜງ ຂຶ້ນເປັນຫົວໜ້າຂະແໜງຄຸ້ມຄອງຊັບສິນຂອງລັດ, ທ່ານ ບຸນເຮັງ ຖາວອນ ຮອງຫົວໜ້າຂະແໜງ ຂຶ້ນເປັນຫົວໜ້າຂະແໜງງົບປະມານແຫ່ງລັດ, ທ່ານ ນາງ ສີດາວັນ ທະລາວົງ ຫົວໜ້າໜ່ວງງານ ຂຶ້້ນເປັນຮອງຫົວໜ້າຂະແໜງງົບປະມານແຫ່ງລັດ ແລະ ທ່ານ ຄໍາແສງ ດາລາແກ້ວ ຫົວໜ້າໜ່ວຍງານ ຂຶ້ນເປັນຮອງຫົວໜ້າຂະແໜງຄຸ້ມຄອງຊັບສິນຂອງລັດ. ຈາກນັ້ນ, ທ່ານ ຮອງເຈົ້າແຂວງ ໄດ້ຂຶ້ນຈັບມື ແລະ ມອບຂໍ້ຕົກລົງ ໃຫ້ຜູ້ທີ່ໄດ້ຮັບການແຕ່ງຕັ້ງ ຢ່າງເປັນທາງການ.

ໂອກາດດັ່ງກ່າວ ທ່ານ ສຸກສະຫວາດ ວົງພູມເຫຼັກ ໄດ້ມີຄໍາເຫັນໂອລົມຕໍ່ພິທີ ໂດຍສະເພາະ ແມ່ນຜູ້ທີ່ໄດ້ຮັບການແຕ່ງຕັ້ງ ຈົ່ງເອັາໃຈໃສ່ຝຶກຝົນຫລໍ່ຫຼອມຕົນເອງ ໃຫ້ມີຄຸນທາດການເມືອງໜັກແໜ້ນ, ມີທັກສະການເປັນຜູ້ນໍາ ພ້ອມທັງເຕົ້າໂຮມຄວາມສາມັກຄີເປັນປຶກແຜ່ນ, ສ້າງແຜນກົນໄກນໍາພາເປັນໝູ່ຄະນະ, ມີຄວາມຊື່ສັດ ແລະ ອົດທົນ ຕໍ່ຄວາມຫຍຸ້ງຍາກຕ່າງໆ ຕິດພັນກັບການຮຽນຮູ້ ແລະ ຄົ້ນຄ້ວາ ຊອກຫາວິທິທາງແກ້ໄຂ ໂດຍຖືເອົາການລົງກໍ່ສ້າງຮາກຖານການເມືອງ ເປັນການຮັບຟັງຫາງສຽງຈາກສັງຄົມ. ພ້ອມນັ້ນ ຕ້ອງເອົາໃຈໃສ່ຈັດຕັ້ງເຄື່ອນໄຫວວຽກງານຕາມພາລະບົດບາດ, ສິດ ແລະ ໜ້າທີ່ ເພື່ອເຮັດໃຫ້ວຽກງານຂອງຕົນໄດ້ຮັບການພັດທະນາຢ່າງຕໍ່ເນື່ອງ ທັງປະສົບຜົນສໍາເລັດ ແລະ ສົມກັບທີ່ຂັ້ນເທິງໃຫ້ຄວາມໄວ້ວາງໃຈ.