ມີເດຍລາວແຂວງອັດຕະປື ຂ່າວ: ວັດທະນາ ຄະນະສະເພາະກິດ ເພື່ອປ້ອງກັນ,ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ 19 ຂັ້ນແຂວງອັດຕະປື ໄດ້ຮຽກຮ້ອງມາຍັງ ຜູ້ທີ່ມີອາຍຸແຕ່ 18 ປີຂື້ນໄປທົ່ວແຂວງອັດຕະປື ທີ່ບໍ່ທັນໄດ້ຮັບການສັກວັກຊິນປ້ອງກັນພະຍາດໂຄວິດ 19 ໃຫ້ຮີບຮ້ອນມາຮັບວັກຊິນໄດ້ຕາມສະຖານທີ່ບໍລິການທີ່ທາງຄະນະສະເພາະກິດໄດ້ກໍານົດໄວ້ຕາມໂມງລັດຖະການ ເພື່ອສ້າງພູມຄຸ້ມກັນໃຫ້ແກ່ຕົນເອງ ແລະ ສັງຄົມ ຈາກພະຍາດໂຄວິດ 19.

ທ່ານ ອິນປັນ ອິນທິລາດ ຫົວໜ້າພະແນກສາທາລະນະສຸກ ແຂວງອັດຕະປື ຮອງປະທານຄະນະສະເພາະກິດ ເພື່ອປ້ອງກັນ,ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ 19 ຂັ້ນແຂວງ ໄດ້ຖະແຫຼງຂ່າວໃນວັນທີ 23 ສິງຫາ2021 ນີ້,ເພື່ອຮຽກຮ້ອງມາຍັງພໍ່ແມ່ປະຊາຊົນ ແລະ ທຸກພາກສ່ວນໃນສັງຄົມ ໂດຍສະເພາະຜູ້ທີ່ມີອາຍຸຕັ້ງແຕ່ 18 ປີຂື້ນໄປທີ່ຍັງບໍ່ທັນໄດ້ຮັບການສັກວັກຊິນປ້ອງກັນພະຍາດໂຄວິດ 19 ໃຫ້ຕິດຕາມແຈ້ງການປະຊາສໍາພັນຂອງຄະນະສະເພາະກິດແຕ່ລະໄລຍະ ແລະ ເຂົ້າຮ່ວມການສັກໃຫ້ຄົບທຸກໆຄົນ,ເພາະການສັກວັກຊິນເປັນທາງດຽວທີ່ສາມາດຕັດວົງຈອນຂອງການແຜ່ເຊື້ອພະຍາດ,ວັກຊິນຍັງຊ່ວຍຫຼຸດຜ່ອນບໍ່ໃຫ້ມີການເຈັບທີ່ຮ້າຍແຮງ,ຊ່ວຍຫຼຸດຜ່ອນການເສຍຊີວິດຈາກພະຍາດດັ່ງກ່າວ,ຊ່ວຍປ້ອງກັນການຕິດເຊື້ອໄດ້ເຖິງ 85% ແລະ ຜູ້ທີໄດ້ຮັບການສັກວັກຊິນແລ້ວນັ້ນໂອກາດການແຜ່ເຊື້ອໃຫ້ຜູ້ອື່ນໄດ້ແຕ່ພຽງ 15% ເທົ່ານັ້ນ,​ສໍາລັບການສັກວັກຊິນມາຮອດປະຈຸບັນທົ່ວແຂວງອັດຕະປື ມີກຸ່ມເປົ້າໝາຍໄດ້ຮັບການສັກວັກຊິດປ້ອງກັນພະຍາດໂຄວິດ 19 ແລ້ວທັງໝົດ 39.369 ຄົນ,ກວມເອົາ 24,16% ຂອງປະຊາກອນທົ່ວແຂວງ.

ທ່ານ ອິນປັນ ອິນທິລາດ ຍັງໄດ້ຮຽກຮ້ອງມາຍັງທົ່ວສັງຄົມພາຍໃນແຂວງອັດຕະປື ເພີ່ມທະວີເອົາໃຈໃສ່ສືບຕໍ່ປະຕິບັດຕາມແຈ້ງການຂອງຄະນະສະເພາະກິດຂັ້ນແຂວງກໍານົດອອກຢ່າງເຄັ່ງຄັດ,ພ້ອມກັນຍົກສູງສະຕິຄວາມຮັບຜິດຊອບປະຕິບັດມາດຕະການປ້ອງກັນຕົນເອງຢ່າງເຂັ້ມງວດ,ເພື່ອຄວາມປອດໄພຂອງຕົນເອງ,ຄົນໃນຄອບຄົວ,ໜູ່ເພື່ອນ,ຄົນອ້ອມຂ້າງ ແລະ ທຸກຄົນໃນສັງຄົມ,ໃຫ້ເປັນເຈົ້າການປະຕິບັດການດໍາລົງຊີວິດປົກກະຕິແບບໃໝ່ ໂດຍການໝັ້ນລ້າງມືເລື້ອຍໆ,ລ້າງມືໃສ່ສະບູ ຫຼືເຈວທີ່ມີທາດເຫຼົ້າ,ຮັກສາໄລຍະຫ່າງ,ໃສ່ຜ່າປິດປາກ-ດັງທຸກຄັ້ງເມື່ອອອກຈາກເຮືອນ,ບໍ່ໄປສະຖານທີແອອັດ,ບໍ່ເດີນທາງໄປສະຖານທີ່ທີ່ມີການລະບາດຂອງພະຍາດໃນຊຸມຊົນ,ປະຕິບັດຫຼັກການອະນາໄມສາມສະອາດ,ຮັກສາສຸຂະພາບໃຫ້ແຂງແຮງ ແລະ ອື່ນໆ.