ມີເດຍລາວແຂວງຫຼວງພະບາງ ຂ່າວ: ບົວວອນ ດວງສະຫວັດ ທ່ານ ຄໍາຂັນ ຈັນທະວີສຸກ ເຈົ້າແຂວງໆຫຼວງພະບາງ ໄດ້ລົງຊີ້ນໍາຄະນະສະເພາະກິດຂັ້ນແຂວງ ໃນວັນທີ 24 ສິງຫາ 2021 ນີ້ທີ່ຫ້ອງປະຊຸມຂອງພະແນກສາທາລະນະສຸກ (ສູນປະຕິບັດງານຄະນະສະເພາະກິດ ຄວບຄຸມ ໂຄວິດ-19 ຂັ້ນແຂວງ) ມີບັນດາຄະນະສະເພາະກິດແຕ່ລະຂັ້ນເຂົ້າຮ່ວມ.

ກອງປະຊຸມໄດ້ຮັບຟັງການລາຍງານຫຍໍ້ ການສືບຕໍ່ຈັດຕັ້ງປະຕິບັດຄຳສັ່ງ ເລກທີ 15/ນຍ, ເລກທີ 01/ຈຂ.ຫຼບມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດ ຂອງພະຍາດ COVID-19. ປັດຈຸບັນສະພາບລວມການແຜ່ລະບາດຂອງພະຍາດໂຄວິດ-19 ໃນທົ່ວໂລກ, ປະເທດເພື່ອນບ້ານອ້ອມຂ້າງທີ່ພວມແຜ່ລະບາດເປັນວົງກວ້າງ ແລະຮ້າຍແຮງ ທີ່ມີຜູ້ຄົນເສຍຊີວິດເປັນຈໍານວນຫຼວງຫຼາຍ. ສໍາລັບການລະບາດພະຍາດໂຄວິດ-19 ພາຍໃນປະເທດລາວເຮົາແມ່ນກັບຄືນມາລະບາດ ເປັນຮອບ 2 ມາຮອດ ວັນທີ 23 ສິງຫາ 2021 ທົ່ວປະເທດມີຜູ້ຕິດເຊື້ອສະສົມ ທັງໝົດ12.621 ຄົນ, ຕິດເຊື້ອກໍລະນີໃໝ່ 152 ຄົນ, ຊຸມຊົນ 65 ຄົນ, ນຳເຂົ້າ 87 ຄົນ, ປີ່ນປົວຫາຍດີ 8.316 ຄົນ, ພວມປີ່ນປົວຢູ່ໂຮງໝໍສູນກາງ ແລະໂຮງໝໍແຂວງຕ່າງໆ 4.305 ຄົນ, ເສຍຊີວິດສະສົມ 11 ຄົນ.

ສະເພາະ ແຂວງຫຼວງພະບາງ ມາຮອດປັດຈຸບັນ ເຖິງຈະບໍ່ມີການກວດພົບເຊື້ອໃນຊຸມຊົນພາຍໃນແຂວງຫລາຍເດືອນຜ່ານມາ, ແຕ່ໃນເດືອນ ສິງຫາ 2021 ແມ່ນໄດ້ມີການກວດພົບເຊື້ອກໍລະນີນໍາເຂົ້າຈາກຕ່າງແຂວງ ແລະແຮງງານຕ່າງປະເທດ, ພາຍຫລັງມີການນໍາເຂົ້າມາຈໍາກັດບໍລິເວນຢູ່ສູນກັກກັນນະຄອນຫຼວງ, ສູນບັນດາເມືອງ ແລະ ການເດີນທາງເຂົ້າມາພາຍໃນແຂວງຖຶກຈໍາກັດພາຍໃນສູນໃນທົ່ວແຂວງ, ແລ້ວນໍາມາກວດຫາເຊື້ອແມ່ນມີການພົບເຊື້ອ ບັນຫານີ້ເຫັນວ່າມັນແມ່ນສິ່ງທ້າທາຍໃໝ່ສໍາລັບແຂວງຫຼວງພະບາງ, ເພາະວ່າບັນດາແຂວງອ້ອມຂ້າງພວມມີການແຜ່ເຊື້ອໃນຊຸມຊົນຫລາຍ. ປັດຈຸບັນທົ່ວແຂວງຫຼວງພະບາງມີຜູ້ຕິດເຊື້ອສະສົມ ທັງໝົດ 23 ຄົນ, ຍິງ 13 ຄົນ, ຕິດເຊື້ອໃນຊຸມຊົນ 13 ຄົນ, ກໍລະນີນໍາເຂົ້າ 10 ຄົນ, ປີ່ນປົວຫາຍດີ 13 ຄົນ, ກຳລັງປີ່ນປົວຢູໂຮງໝໍແຂວງ 10 ຄົນ, ມີແຮງງານຈຳກັດຢູ່ສູນຈຳກັດບໍລີເວນ 365 ຄົນ, ເບີ່ງແລ້ວທ່າອ່ຽງແຮງງານນຳເຂົ້າຈາກຕ່າງປະເທດ ແລະ ບັນດາຕ່າງແຂວງແມ່ນນັບມື້ນັບຫຼາຍຂຶ້ນ, ບັນດາສູນຮອງຮັບເພື່ອຈຳກັດບໍລິເວນອາດຈະບໍ່ພຽງພໍ.

ກອງປະຊຸມໄດ້ພ້ອມກັນປຶກສາຫາລືດ້ານງົບປະມານ ໃນການສ້າງແຜນສຳລອງເພື່ອກະກຽມສະຖານທີ່ຮອງຮັບບັນດາແຮງງານກັບຄືນພູມລຳເນົາທີ່ມີຈຳນວນເພີ່ມຂຶ້ນ, ເປັນຕົ້ນແມ່ນການກະກຽມຂຶ້ນແຜນການປຸກສ້າງໂຮງໝໍ ສຳລັບປີ່ນປົວແຍກປ່ຽວພະຍາດຕິດຕໍ່ຫຼັງໃໝ່ໃຫ້ໂຮງໝໍແຂວງ ຂະໜາດ 200 ຕຽງ, ໂຮງໝໍຊຸມຊົນເມືອງນໍ້າບາກ 20 ຕຽງ, ໂຮງໝໍຊຸມຊົນ ເມືອງນານ 20 ຕຽງ, ເພື່ອຮອງຮັບໃນອານາຄົດ, ຍົກລະດັບຫໍຄອຍສະໜາມບີນເກົ່າເປັນໂຮງໝໍພາກສະໜາມ 100 ຕຽງ, ເພື່ອຮັບຄົນເຈັບບໍ່ມີອາການສະແດງ, ປັບປຸງສູນນໍ້າບາກແຍກຜູ້ຈຳກັດບໍລິເວນອອກເປັນຕຶກກຸ່ມສ່ຽງຂຽວ, ກຸ່ມສີເຫລືອງ ແລະ ກຸ່ມສີແດງ ຕາມຫຼັກວິຊາການລະບາດ. ສະເໜີໃຫ້ແຕ່ລະເມືອງກະກຽມສູນຮອງຮັບພາຍຫລັງທີ່ຈຳກັດບໍລິເວນຢູ່ແຂວງ ແລະ ກວດບໍ່ພົບເຊື້ອແມ່ນຈະໄດ້ສົ່ງໃຫ້ສູນຈຳກັດບໍລິເວນແຕ່ລະເມືອງສຶບຕໍ່ຈໍາກັດບໍລິເວນ ແລະ ໃຫ້ແຕ່ລະເມືອງ, ນະຄອນສຶບຕໍ່ສັກຢາວັກຊີນປ້ອງກັນພະຍາດໂຄວິດ-19 ໃນກຸ່ມເປົ້າໝາຍໂດຍສະເພາະກຸ່ມນັກສຶກສາ, ນັກທຸລະກິດ, ຄົນຂັບລົດ, ແຮງງານເຄື່ອນຍ້າຍ, ຜູ້ທີ່ມີຄວາມຈໍາເປັນເດີນທາງໃຫ້ໄດ້ຫລາຍເທົ່າທີ່ຈະຫລາຍເພື່ອເພີ່ມອັດຕາປົກຄຸມໃນວົງກວ້າງ.

ຕອນທ້າຍ ທ່ານເຈົ້າແຂວງ ຍັງໄດ້ຊີ້ນຳໃຫ້ຄະນະສະເພາະກິດຂັ້ນຕ່າງໆ ຕ້ອງເພີ່ມທະວີຄວາມຮັບຜິດຊອບ, ວາງແຜນປຸກລະດົມທົ່ວສັງຄົມເພື່ອພ້ອມກັນຕ້ານການລະບາດພະຍາດໂຄວິດ-19 ເປັນໜ້າທີ່ຂອງທົ່ວສັງຄົມໂດຍສະເພາະບ້ານ ແລະ ຄອບຄົວ, ບຸກຄົນໃນການປ້ອງກັນຕົນເອງ, ໃຫ້ລາຍງານຄົນເຂົ້າ-ອອກບ້ານ, ຄອບຄົວ, ສໍາລັບຜູ້ມີພີ່ນ້ອງໄປເຮັດວຽກຢູ່ຕ່າງແຂວງ, ຕ່າງປະເທດ ຖ້າຫາກບໍ່ຈຳເປັນແມ່ນບໍ່ໃຫ້ເດີນທາງກັບບ້ານເພາະຈະສ່ຽງຕໍ່ການນຳເອົາເຊື້ອ ມາແຜ່ໃສ່ຊຸມຊົນພາຍໃນແຂວງ. ໃຫ້ແຕ່ລະສຳນັກງານ, ອົງການ, ພະແນກການວາງມາດຕະການປ້ອງກັນຕົນເອງ ໂດຍໃສ່ຜ້າອັດປາກ-ດັງ, ມີຈຸດກວດອຸນນະພູມ ແລະ ເຈວລ້າງມືໃຫ້ພະນັກງານຂອງຕົນໂດຍນຳໃຊ້ງົບປະມານຕົນເອງ, ການຈັດກອງປະຊຸມ ແລະກິດຈະກຳຕ່າງໆ ຕ້ອງປະຕິບັດຕາມມາດຕະການການດຳລົງຊີວິດປົກກະຕິແບບໃໝ່ຂອງລັດຖະບານ, ເພີ່ມທະວີການເກັບກຳບັນຊີຂອງປະຊາຊົນພາຍໃນຢ່າງເຂັ້ມງວດ. ຜູ້ທີ່ຈະເຂົ້າມາແມ່ນໃຫ້ຜ່ານການກັກຕົວຢ່າງເຂັ້ມງວດ ແລະລາຍງານວ່າແມ່ນແຮງງານໄປປະເທດເທດໃດເຂົ້າມາພ້ອມທັງກັກບໍລິເວນ ແລະ ແຈ້ງໃຫ້ພາກສ່ວນທີ່ກ່ຽວຂ້ອງໄປເກັບຕົວຢ່າງ.
ຂ່າວ: ບົວວອນ ດວງສະຫວັດ