ມີເດຍລາວແຂວງວຽງຈັນ ພາບ-ຂ່າວ: ບຸນມາ ແກ້ວບຸດດາ ແລະ ຄຳຂຽນ ພົມມີໄຊ. ໃນວາລະດຳເນີນກອງປະຊຸມສຳມະນາວິທະຍາສາດ ແລະ ພຶດຕິກຳ ໃນຫົວຂໍ້ “ ຄົ້ນຫາຜົນງານ, ສຶບສານມູນເຊື້ອວິລະກຳ 40 ປີ ແຂວງວຽງຈັນ ”ທີ່ໄດ້ຈັດຂຶ້ນລະຫວ່າງວັນທີ25-27ສິງຫາ2021ຢູ່ທີ່ສະໂມສອນເຂຶ່ອນໄຟຟ້ານ້ຳງຶ່ມIໂດຍການເປັນປະທານຂອງທ່ານໝູນແກ້ວ ອໍລະບູນ, ອາດີດກຳມະການສູນກາງພັກ, ອາດີດເລຂາພັກແຂວງ, ອາດີດເຈົ້າແຂວງໆວຽງຈັນ,ມີບັນດາທ່ານອາດີດເລຂາພັກແຂວງ, ອາດີດເຈົ້າແຂວງໆວຽງຈັນ,ບັນດາຄະນະປະຈຳ,ກຳມະການພັກແຂວງ,ເລຂາພັກເມືອງ,ຫົວໜ້າພະແນກການ,ອົງການ,ກົມກອງ,ພ້ອມດ້ວຍພະນັກງານອາວຸໂສບຳນານ,ອາດີດການນຳຂອງແຂວງເຂົ້າຮ່ວມ.

ທ່ານ ຄຳເມິງ ພົງທະດີ ອາດີດກຳມະການສູນກາງພັກ,ອາດີດເລຂາພັກແຂວງ, ອາດີດເຈົ້າແຂວງວຽງຈັນ ໄດ້ລາຍງານໃນກອງປະຊຸມເທື່ອນີ້ວ່າ: ແຂວງກຳແພງນະຄອນຫລວງວຽງຈັນ ດ້ານພູມສັນຖານພູມີສາດແລ້ວ ເຫັນວ່າ ກວ້າງຂວາງຫລາຍ ສະນັ້ນ, ການທີ່ການນຳຂອງພັກ, ລັດທີ່ຈະລົງແຖດເຖິງທົ່ວເຖິງກໍ່ເຫັນວ່າໄດ້ຍາກ,ພ້ອມດຽວກັນນັ້ນພວກອິດທິກຳລັງຝືນການປະຕິວັດຍັງເສດເຫລືອຫລາຍພໍສົມຄວນ ໂດຍສະເພາະ ແມ່ນຢູ່ຕາມທ້ອງຖິ່ນທີ່ຫ່າງໄກ, ພວກມັນເຂົ້າມາແຊກແຊງເອົາກໍາລັງປະຊາຊົນບາງ
ບໍລິເວນ ທີ່ເປັນທີ່ໝັ້ນເກົ່າຂອງພວກເຮົາ (ລ້ອງແມດ, ເມືອງເຟືອງ, ວັງວຽງ ແລະ ກາສີ ເປັນຕົ້ນ)

ຢູ່ຕາມເສັ້ນທາງເລກທີ 13 ເໜືອ ແຕ່ ວັງວຽງ – ກາສີ ມັກເກີດມີເຫດການລັດຍິງລົດ, ຍິງຄົນຢ່າງຕໍ່ເນື່ອງ, ບຸກເຂົ້າບ້ານປະຊາຊົນ ຈູດບ້ານເຮືອນ, ປຸ້ນເອົາສັບສິນຂອງພໍ່ແມ່ປະຊາຊົນ, ສະພາບການເຄື່ອນໄຫວຂອງພວກສັດຕູ, ນອກຈາກການເຄື່ອນໄຫວເລື່ອນລອຍຢູ່ຕາມຮ່ອມຫ້ວຍພູຜາທີ່ເຂົ້າມາເຄື່ອນໄຫວລັດຍິງລົດຕາມເສັ້ນທາງ, ບ້ານເຮືອນປະຊາຊົນແລ້ວ, ຍັງມີຈຳນວນບໍ່ໜ້ອຍທີ່ເຈືອປົນຢູ່ນໍາໝູ່ປະຊາຊົນທີ່ປຸກປັ່ນປະຊາຊົນ ເພື່ອໃຫ້ມີແນວຄິດຫັນເຫໄປໃນທາງທີ່ບໍ່ຖືກຕ້ອງ, ບໍ່ເຫັນດີເຫັນພ້ອມກັບແນວທາງຂອງພັກ, ໃສ່ຮ້າຍປາຍສີແນວທາງ, ໂຕນໜີຈາກພໍ່ແມ່ ບ້ານເຮືອນ ແລະ ອື່ນໆ.

ສັງລວມແລ້ວ ມີ 3 ເຫດຜົນໃຫຍ່ ຄື:
1).ການນຳພັກ-ລັດ ບໍ່ສາມາດຕິດແຖດຮາກຖານໄດ້ຢ່າງທົ່ວເຖິງ.
2). ເມື່ອການນຳພັກ-ລັດ ບໍ່ໄດ້ໃກ້ສິດຕິດແຖດສະພາບການດ້ານຕ່າງໆບໍ່ດີປານໃດ, ເພາະສັດຕູເຂົ້າຍຸແຍ່ແຊກແຊງໄດ້ງ່າຍ.
3). ທ້ອງຖິ່ນຮາກຖານທີ່ຫ່າງໄກເປັນບ່ອນຈັ້ງກຳລັງຂອງສັດຕູ.
ບົນແນວທາງທີ່ຖືກຕ້ອງຂອງພັກ ວິໃສທັດຂອງລັດທີ່ຄ່ອງແຄ້ວ ແລະ ສ່ອງໃສນັ້ນ, ສູນກາງພັກ-ລັດຖະບານໄດ້ເດັດດ່ຽວ ແລະ ເອົາໃຈໃສ່ຢ່າງຈິງຈັງໃນການປະຕິບັດມະຕິກົມການເມືອງສະບັບເລກທີ 51 ກຳນົດອອກ ແຕ່ເດືອນ ມິຖຸນາ 1980 ວ່າດ້ວຍ ການຫັນລົງກໍ່ສ້າງຮາກຖານໃຫ້ຫຼາຍກ່ວາເກົ່າ. ສະນັ້ນ, ກົມການເມືອງສູນກາງພັກໄດ້ອອກມະຕິເລກທີ 06/ກມສພ, ລົງວັນທີ 13ສິງຫາ 1981 ວ່າດ້ວຍ ການແຕ່ງຕັ້ງຄະນະພັກແຂວງວຽງຈັນຂຶ້ນທັງໝົດ 15ສະຫາຍ.ຜ່ານການປະຕິບັດໜ້າທີ່ວຽກດັ່ງກ່າວເຫັນໄດ້ວ່າມີທັງຂໍ້ສະດວກ ແລະ ຂໍ້ຫຍຸ້ງຍາກ ສາມາດສັງລວມບາງບັນຫາ ແຕ່ລະດ້ານເປັນຕົ້ນ ຂໍ້ສະດວກ ສູນກາງພັກ-ລັດຖະບານໄດ້ໃຫ້ການຊ່ວຍເຫຼືອຢ່າງຈົດຈໍ່ ແລະ ໃກ້ສິດ ເປັນພິເສດໃນການແຍກແຂວງກຳແພງນະຄອນຫຼວງວຽງຈັນນີ້,ກຳແພງນະຄອນຫຼວງວຽງຈັນ ໄດ້ໃຫ້ການຮ່ວມືຊ່ວຍເຫຼືອຕາມທ່າແຮງ ແລະ ຄວາມສາມາດໃນເວລານັ້ນ.ສູນກາງພັກ-ລັດຖະບານໄດ້ອຳນວຍຄວາມສະດວກຫຼາຍດ້ານ ເປັນຕົ້ນໄດ້ແຕ່ງຕັ້ງຄະນະຊີ້ນຳ, ຄະນະວິຊາການປະຕິບັດຕົວຈິງ ໃນການສ້າງພາລະບົດບາດ, ສິດໜ້າທີ່ຂອງຂັ້ນແຂວງ ແລະກຳແພງນະຄອນ ໃຫ້ສອດຄ່ອງເໝາະສົມ ຂອງແຕ່ລະພາກສ່ວນໄປພ້ອມໆກັນ.