ມີເດຍລາວແຂວງບໍ່ແກ້ວ ໂດຍ: ວໍລະສິດ ພິດສະຫາຍ. ວັນທີ 25 ສິງຫາ 2021 ນີ້, ສະຫາຍ ພົນໂທ ສຸວອນ ເລືອງບຸນມີ ກຳມະການສູນກາງພັກ ຮອງປະທານຄະນະປະຈຳສະພາແຫ່ງຊາດ ຮອງລັດຖະມົນຕີກະຊວງປ້ອງກັນປະເທດ ຫົວໜ້າກົມໃຫຍ່ເສນາທິການກອງທັບ ພ້ອມຄະນະ ໄດ້ລົງເຄື່ອນໄຫວເຮັດວຽກ ຢູ່ສະພາປະຊາຊົນເຂດເລືອກຕັ້ງທີ 5 ແລະ ພົບປະໂອ້ລົມພະນັກງານຫຼັກແຫຼ່ງຂອງ 2 ກຳລັງປກຊ-ປກສ ຢູ່ທີ່ແຂວງບໍ່ແກ້ວ, ເຂົ້າຮ່ວມຂອງ ສະຫາຍ ຈອມສີ ລັດຕະນະປັນ ຮອງເລຂາພັກແຂວງ ປະທານຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 5 ປະທານສະພາປະຊາຊົນແຂວງບໍ່ແກ້ວ ມີຄະນະພັກ-ຄະນະບັນຊາ ປກຊ-ປກສ ແຂວງ ຕະຫຼອດຮອດ ພະນັກງານຫຼັກແຫຼ່ງເຂົ້າຮ່ວມ.

ສະຫາຍ ພັນເອກ ບຸນມີ ພາມີໄຊ ຄະນະປະຈຳພັກແຂວງ ເລຂາຄະນະພັກ ຫົວໜ້າການເມືອງ ກອງບັນຊາການທະຫານແຂວງບໍ່ແກ້ວ ໄດ້ຂຶ້ນຜ່ານບົດລາຍງານຫຍໍ້ໂດຍສັງເຂບກ່ຽວກັບຜົນງານການເຄື່ອນໄຫວໃນໄລຍະຜ່ານມາ ເຊິ່ງໄດ້ຍົກໃຫ້ເຫັນຫຼາຍບັນຫາທີ່ພົ້ນເດັ່ນ ໃນການການຈັດຕັ້ງປະຕິບັດໜ້າທີ່ວຽກງານ ປ້ອງກັນຊາດ -ປ້ອງກັນຄວາມສະຫງົບ ຢູ່ພາຍໃນແຂວງເຫັນວ່າມີຄວາມສະຫງົບໂດຍພື້ນຖານຕະຫຼອດມາ. ໂອກາດນີ້, ສະຫາຍ ພົນໂທ ສຸວອນ ເລືອງບຸນມີ ໄດ້ຍົກໃຫ້ເຫັນສະພາບການຂອງໂລກ, ພາກພື້ນສາກົນ ແລະ ປະເທດເຮົາຂອງພວກເຮົາທີ່ຜັນແປໄປຢ່າງສັບສົນ ໂດຍສະເພາະບັນຫາການລະບາດຂອງພະຍາດໂຄວິດ-19 ທີ່ກຳລັງແຜ່ລະບາດເປັນວົງກວ້າງ ເວົ້າລວມ ເວົ້າສະເພາະແມ່ນແຂວງບໍ່ແກ້ວຂອງພວກເຮົາ ແມ່ນໃຫ້ເພີ່ມທະວີມາດຕະການໃນການປ້ອງກັນ ແລະ ແກ້ໄຂບັນຫາດັ່ງກ່າວ ຕິດຕາມປ້ອງກັນເວນຍາມຕາມຂອບເຂດຊາຍແດນ ແລະ ຂອບເຂດຮັບຜິດຊອບໃຫ້ເຄັ່ງຄັດ.

ຈາກນັ້ນສະຫາຍຍັງໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຄະນະພັກ-ຄະນະບັນຊາຂອງ 2 ກຳລັງ ປ້ອງກັນຊາດ-ປ້ອງກັນຄວາມສະຫງົບແຂວງບໍ່ແກ້ວ ທີ່ສາມາດເຮັດຫຼ້ອນໜ້າທີ່ຫຼາຍດ້ານ ໃນໄລຍະຜ່ານມາ ໂດຍຍຶດໝັ້ນໃນສອງໜ້າທີ່ຍຸດທະສາດຄື: ປົກປັກຮັກສາ ແລະ ສ້າງສາພັດທະນາປະເທດຊາດພາຍໃຕ້ການຊີ້ນຳຢ່າງເດັດຂາດໂດຍກົງຮອບດ້ານຂອງພັກ ການເຄື່ອນໄຫວປັບປຸງກໍ່ສ້າງກຳລັງປະກອບອາວຸດທ້ອງຖິ່ນໃຫ້ມີຄວາມເຂັ້ມແຂງໜັກແໜ້ນ ກາຍເປັນກຳລັງທີ່ຈົ່ງຮັກພັກດີຕໍ່ປະເທດຊາດ ແລະ ຕໍ່ປະຊາຊົນລາວບັນດາເຜົ່າ, ພ້ອມດຽວກັນນີ້ ສະຫາຍຍັງໄດ້ ເນັ້ນໜັກໃຫ້ຄະນະພັກ-ຄະນະບັນຊາ 2 ກຳລັງແຕ່ລະຂັ້ນ ຈົ່ງຕັ້ງໜ້າປັບປຸງກໍ່ສ້າງກຳລັງໃຫ້ເຕີບໃຫຍ່ເຂັ້ມແຂງທາງດ້ານປະລິມານ ແລະ ຄຸນນະພາບຮັບປະກັນໃຫ້ແກ່ການປະຕິບັດໜ້າທີ່ໃນສະເພາະໜ້າ ແລະ ຍາວນານ,

ພ້ອມກັນເຊີດຊູມານະຈິດປະຕິວັດ ແລະ ຄວາມຮັບຜິດຊອບຕໍ່ໜ້າທີ່ການເມືອງຂອງຕົນໃນການຮັບໃຊ້ຊາດ, ຮັບໃຊ້ປະຊາຊົນເສີມຂະຫຍາຍມູນເຊື້ອທາດແທ້ຂອງກຳລັງປະກອບອາວຸດປະຕິວັດ, ປະຕິບັດຂໍ້ກຳນົດກົດລະບຽບຂອງພັກ ກົດໝາຍຂອງລັດຢ່າງຕັ້ງໜ້າ, ຍົກສູງຄວາມຮູ້ຄວາມສາມາດໃນການນຳພາ-ບັນຊາ ຕາມທິດຂອງຂັ້ນເທິງ ກາຍເປັນກຳລັງທີ່ມີແບບແຜນທັນສະໄໝ, ພ້ອມທັງ ສືບຕໍ່ຫັນເອົາກຳລັງລົງເຮັດໜ້າທີ່ກໍ່ສ້າງຮາກຖານການເມືອງຢູ່ແຕ່ລະຈຸດສຸມໃນຂອບເຂດຕົນເອງຮັບຜິດຊອບ, ສືບຕໍ່ວຽກງານສຶກສາອົບຮົມການເມືອງ-ນຳພາແນວຄິດຕິດພັນກັບ ການອົບຮົມ-ຫັດແອບຮໍ່າຮຽນ ດ້ານສິລະປະຍຸດ-ຍຸດທະວິທີສູ້ຮົບໃຫ້ມີຄວາມຄ່ອງແຄ້ວ, ສ້າງກຳລັງ ປກຊ-ປກສ ໃຫ້ກາຍເປັນວຽກຂອງທົ່ວປວງຊົນ ໂດຍຕິດພັນກັບ 4 ໜ້າທີໃຫຍ່ 26 ແຜນງານ ຂອງຄະນະພັກ ກະຊວງປ້ອງກັນປະເທດວາງອອກຢ່າວເຂັ້ມງວດ ນໍາພາເອົາກົມກອງກ້າວຂຶ້ນກາຍເປັນກົມກອງທີ່ມີລະບຽບແບບແຜນທັນສະໄໝຂຶ້ນໄປເລື້ອຍໆ.