ມີເດຍລາວແຂວງສາລະວັນ ຂ່າວ-ພາບ: ວິໄລວອນ ສິດທິໄຊ ວັນທີ 25 ສິງຫາ 2021, ທ່ານ ມະໄລວອນ ສີປະເສີດ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງສາລະວັນ, ທ່ານ ສົມຈິດ ພະບໍລະບູນ ຮອງຫົວໜ້າຫ້ອງການ ຖວທ ເມືອງເລົ່າງາມ ພ້ອມດ້ວຍຄະນະ ໄດ້ລົງເຄື່ອນໄຫວຊຸກຍູ້ຜູ້ປະກອບການ ຮ້ານດື່ມກາເຟ, ໂຮມສະເຕ (Homestay), ຜ້າແພຊົນເຜົ່າກະຕູ ທ້າວ ວຽງ ບ້ານຫ້ວຍຫູນໃຕ້ ເມືອງເລົ່າງາມ ແຂວງສາລະວັນ. ເຊິ່ງເປັນອີກຮ້ານໜຶ່ງ ທີ່ໄດ້ຮັບຄວາມນິຍົມສູງ ຈາກແຂກທັງພາຍໃນ ແລະ ຕ່າງປະເທດ, ເປັນຮ້ານ ທີ່ອ້ອມຮອບດ້ວຍປ່າກະເຟ, ມີການປະດັບປະດາ, ຕົບແຕ່ງຮ້ານເປັນເອກະລັກຕາມຮູບແບບວັດທະນະທຳ ຊົນເຜົ່າກະຕູ. ແຕ່ປັດຈຸບັນຍ້ອນສະພາບການລະບາດຂອງພະຍາດໂຄວິດ-19 ເຮັດການບໍລິການຫຼາຍກິດຈະກຳ ໄດ້ຢຸດລົງ ເນື່ອງຈາກຂາດນັກທ່ອງທ່ຽວເຂົ້າມາໃຊ້ບໍລິການ ແລະ ພຽງແຕ່ສືບຕໍ່ເປີດບາງກິດຈະກຳເທົ່ານັ້ນ.

ການລົງເຄື່ອນໄຫວໃນຄັ້ງນີ້, ຈຸດປະສົງ ແລະເປົ້າໝາຍ ຊຸກຍູ້ ແລະ ສົ່ງເສີມໃຫ້ບັນດາຫົວໜ່ວຍທຸລະກິດ ໄດ້ເຂົ້າເຖີງແຫຼ່ງທຶນ SME ເປັນການສະໜອງທຶນໃຫ້ກັບຜູ້ປະກອບການດ້ານການທ່ອງທ່ຽວ ທີ່ຕິດພັນກັບການຜະລິດກະສິກຳ, ຫັດຖະກຳ ເພື່ອນຳໃຊ້ທຶນດັ່ງກ່າວປັບປຸງກິດຈະການ, ຂອດບໍລິການຕ່າງໆຂອງຕົນ ໃຫ້ດີຂຶ້ນ ໂດຍແມ່ນການສົ່ງເສີມຈາກລັດຖະບານ. ຜູ້ປະກອບການດ້ານກິດຈະການດັ່ງກ່າວ ກໍ່ມີຄວາມຈຳເປັນ ແລະ ຕ້ອງການທຶນມາໝູນວຽນນຳໃຊ້ໃນການປັບປຸງກິດຈະການຂອງຕົນ ໃຫ້ມີຫຼາຍຮູບແບບ, ຫຼາຍສີສັນ ໂດຍສະເພາະແມ່ນຮອງຮັບນັກທ່ອງທ່ຽວທັງພາຍໃນ ແລະ ຕ່າງປະເທດ ເປັນຕົ້ນ: ເຄື່ອງຈັກຊົງກາເຟ, ເຄື່ອງຈັກຂົວຊາ ແລະການປະດັບປະດາສະຖານທີ່ໃຫ້ມີຄວາມເປັນເອກະລັກ, ສວຍງາມ. ກິດຈະການດັ່ງກ່າວ ນອກຈາກກິດຈະກຳບໍລິການ ໂຮມສະເຕ(HomeStay) ແລ້ວ ຍັງໄດ້ມີການບໍລິການກາເຟສົດ, ຕໍ່າແຜ່ນແພ, ຍ່າງປ່າ(ສວນກາເຟ) ແລະ ທັງເປັນຜູ້ແປຮູບກາເຟ ດ້ວຍຕົນເອງ ຕາມສູດດັງເດີມ ໄວ້ບໍລິການ.

ໂອກາດດຽວກັນນີ້, ທ່ານ ມະໄລວອນ ສີປະເສີດ ກໍ່ໄດ້ສະແດງຄວາມຢື້ຢາມຖາມຂ່າວ ແລະ ພ້ອມທັງໄດ້ຊີ້ແນະ, ໃຫ້ສ່ອງທາງໃນການຊ່ວຍເຫຼືອ ໂດຍສະເພາະຊຸກຍູ້, ຜັກດັນ ເພື່ອເຮັດໃຫ້ກິດຈະການໄດ້ສືບຕໍ່ດຳເນີນໄປ ແມ່ນຕ້ອງເຂົ້າເຖີງແຫຼ່ງທຶນ SME ເພື່ອຈະສ້າງເງື່ອນໄຂໃຫ້ຕົນເອງ ໄດ້ເສີມສ້າງ, ປັບປຸງຂອດການບໍລິການ ໃຫ້ມີຫຼາຍຮູບຫຼາຍສີສັນ ເພື່ອສ້າງຄວາມດຶງດູດສົນໃຈ ແລະ ຟື້ນຟູກິດຈະການຂອງຕົນ. ຈາກນັ້ນ, ທ່ານຍັງໄດ້ເນັ້ນໃຫ້ຜູ້ປະກອບການ ເອົາໃຈໃສ່ໃນການບໍລິການໃຫ້ມີຄຸນນະພາບ, ດູແລເບີ່ງແຍງລູກຄ້າ ເປັນຢ່າງດີ, ຮັກສາຄວາມເປັນເອກະລັກດັ້ງເດີມວັດທະນະທຳຊົນເຜົ່າ, ທ້ອງຖີ່ນ ເປັນຕົ້ນ: ວິຖີຊີວິດ, ຮີດຄອງປະເພນີ, ການນຸ່ງຖື ແລະ ການບໍລິການດ້ານຕ່າງໆໃຫ້ຕິດພັນກັບວັດທະນະທຳ ທີ່ງົດງາມຂອງທ້ອງຖີ່ນ ສ້າງເປັນສະຖານທີ່ວັດທະນະທຳ ຈູງໃຈນັກທ່ອງທ່ຽວ ໃຫ້ນັບມື້ນັບຫຼາຍຂຶ້ນ.