ມີເດຍລາວແຂວງໄຊສົມບູນ ຂ່າວ: ຈິນລະວອນ ວໍລະສົມບູນ
ກອງປະຊຸມ ເຊື່ອມຊຶມກົດລະບຽບພັກ ສະໄໝທີ XI ກ່ຽວກັບວຽກງານຕິດຕາມ-ກວດກາພັກ ຢູ່ແຂວງໄຊສົມບູນ ໄດ້ຈັດຂຶ້ນໃນຕອນເຊົ້າ ຂອງວັນທີ 26 ສິງຫາ 2021 ນີ້ ທີ່ຫ້ອງປະຊຸມພະແນກສຶກສາທິການ ແລະ ກິລາ ແຂວງ ໂດຍການເປັນປະທານຂອງ ສະຫາຍ ນາງ ເພັດສະໄໝ ໂພໄຊຍະວົງ, ຄະນະປະຈຳພັກແຂວງ, ປະທານຄະນະກວດກາພັກ, ອົງການກວດກາລັດ ແຂວງໄຊສົມບູນ, ມີບັນດາສະຫາຍ ປະທານກວດກາຄະນະພັກກອງບັນຊາການທະຫານ ແຂວງ, ກອງບັນຊາການປ້ອງກັນຄວາມສະຫງົບ ແຂວງ ພ້ອມດ້ວຍຜູ້ກວດກາຄະນະພັກຮາກຖານ ຕະຫຼອດຮອດຜູ້ກວດກາໜ່ວຍພັກ ຈາກພະແນກການ-ອົງການ ອ້ອມຂ້າງແຂວງ ເຂົ້າຮ່ວມ.

ໂອກາດດັ່ງກ່າວ ສະຫາຍ ນາງ ເພັດສະໄໝ ໂພໄຊຍະວົງ ໄດ້ເຜີຍແຜ່ບົດແນະນຳ ຂອງຄະນະກວດກາສູນກາງພັກ ສະບັບເລກທີ 194/ຄກສພ ວ່າດ້ວຍການຈັດຕັ້ງປະຕິບັດກົດລະບຽບ ຂອງພັກ ສະໄໝທີ XI ກ່ຽວກັບວຽກງານຕິດຕາມ, ກວດກາ ຂອງພັກ, ຄະນະກວດກາພັກ ແລະ ວິໄນຂອງພັກ ແຕ່ລະຂັ້ນ. ທັງນີ້ ກໍເພື່ອຈັດຕັ້ງເຊື່ອມຊຶມບົດແນະນຳ ຂອງຄະນະກວດກາສູນກາງພັກ ໃນການຈັດຕັ້ງປະຕິບັດກົດລະບຽບຂອງພັກ ສະໄໝທີ XI ກ່ຽວກັບວຽກງານຕິດຕາມ, ກວດກາຂອງພັກ, ຂໍ້ກຳນົດ ກ່ຽວກັບການຕິດຕາມ, ກວດກາ ການຈັດຕັັ້ງປະຕິບັດຜົນການກວດກາ ແນໃສ່ເຮັດໃຫ້ຜູ້ທີ່ເຮັດວຽກຕິດຕາມ, ກວດກາພັກ ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ ທັງສາມາດນຳໄປຈັດຕັ້ງຜັນຂະຫຍາຍ ເຂົ້າໃນການຈັດຕັ້ງປະຕິບັດວຽກງານຕົວຈິງ ໃຫ້ຖືກຕ້ອງສອດຄ່ອງກັບແນວທາງ, ມະຕິ, ຄຳສັ່ງ ແລະ ລະບຽບການຂອງພັກ ທີ່ວາງອອກ ຢ່າງຮອບດ້ານ.

ຂະນະດຽວກັນ ກໍເພື່ອເປັນການກະຕຸກຊຸກຍູ້ ຜູ້ທີ່ເຮັດວຽກງານກວດກາພັກ ຢູ່ບັນດາຄະນະພັກຮາກຖານ, ໜ່ວຍພັກພະແນກການ, ອົງການ-ກົມກອງ ອ້ອມຂ້າງແຂວງ ໃນການປະຕິບັດພາລະບົດບາດ, ສິດ ແລະ ໜ້າທີ່ຂອງຕົນ ກ່ຽວກັບວຽກງານຕິດຕາມ-ກວດກາ ໃຫ້ມີຜົນສຳເລັດ ແລະ ມີປະສິດທິພາບສູງຂຶ້ນກວ່າເກົ່າ. ກອງປະຊຸມ ຄັ້ງນີ້ ຜູ້ເຂົ້າຮ່ວມຍັງໄດ້ເຊື່ອມຊຶມຂໍ້ກຳນົດ ຂອງຄະນະກວດກາສູນກາງພັກ ສະບັບເລກທີ 05/ຄກສພ ວ່າດ້ວຍການຕິດຕາມ, ກວດກາ ການຈັດຕັ້ງປະຕິບັດຜົນການກວດກາ ແລະ ຮັບຟັງເນື້ອໃນເອກະສານທີ່ສຳຄັນອື່ນໆ ອີກຈຳນວນໜຶ່ງ.