ມີເດຍລາວແຂວງຫຼວງພະບາງ ຂ່າວ: ຈໍາປາ ພິທີປະກາດແຕ່ງຕັ້ງຮອງອໍານວຍການໂຮງຫມໍ ແຂວງຫລວງພະບາງ ຜູ້ໃໝ່ ຈຳນວນ 4 ທ່ານ ໄດ້ຈັດຂຶ້ນໃນວັນທີ 25 ສິງຫາ 2021 ນີ້ ຢູ່ຫ້ອງປະຊຸມໂຮງຫມໍແຂວງຫລວງພະບາງ ໂດຍການເຂົ້າຮ່ວມຂອງ ທ່ານ ສຸກັນ ບຸນຍົງ ຮອງເລຂາພັກແຂວງ ປະທານແນວລາວສ້າງຊາດ ແຂວງຫລວງພະບາງ.

ພິທີໄດ້ຜ່ານຂໍ້ຕົກລົງ ຂອງຄະນະຈັດຕັ້ງແຂວງ ວ່າດ້ວຍການແຕ່ງຕັ້ງຮອງອໍານວຍການໂຮງຫມໍ ແຂວງຫລວງພະບາງ ສະບັບເລກທີ 77/ຄຈຂ-ຫຼບ ລົງວັນທີ 8 ສິງຫາ 2021 ໂດຍເຫັນດີຕົກລົງແຕ່ງຕັ້ງ ຮອງອໍານວຍການໂຮງຫມໍ ແຂວງຫລວງພະບາງ ທັງຫມົດ 4 ທ່ານ, ຍິງ 2 ທ່ານ ຄື: ທ່ານ ດຣ ພູວະນາ ອານຸລັກຄໍາ, ທ່ານ ດຣ ນາງ ໄພລິນ ມະນີຜົນ, ທ່ານ ດຣ ນາງ ສຸພາພອນ ພະນາວັນ ແລະ ທ່ານ ດຣ ສູນທອນ ແກ້ວປະເສີດ ເປັນຮອງອຳນວຍການໂຮງໝໍ ແຂວງຫຼວງພະບາງ ຢ່າງເປັນທາງການ. ຈາກນັ້ນ ຮອງອໍານວຍການໂຮງຫມໍແຂວງຫລວງພະບາງ ຜູ້ໃຫມ່ ໄດ້ຂຶ້ນຮັບເອົາຂໍ້ຕົກລົງແຕ່ງຕັ້ງຂອງທ່ານເຈົ້າແຂວງ ໂດຍການໃຫ້ກຽດມອບຂອງ ທ່ານ ສຸກັນ ບຸນຍົງ ຮອງເລຂາພັກແຂວງ ປະທານແນວລາວສ້າງຊາດ ແຂວງຫລວງພະບາງ ໂດຍຊ່ອງໜ້າຜູ້ເຂົ້າຮ່ວມເປັນສັກຂີພະຍານ.

ໂອກາດນີ້ ທ່ານ ສຸກັນ ບຸນຍົງ ຮອງເລຂາພັກແຂວງ ປະທານແນວລາວສ້າງຊາດ ແຂວງຫລວງພະບາງ, ກໍໄດ້ມີຄຳເຫັນເນັ້ນໃຫ້ຮອງອໍານວຍການໂຮງໝໍ ຜູ້ໃໝ່ໃຫ້ສືບຕໍ່ຮັກສາມູນເຊື້ອ ເສີມຂະຫຍາຍດ້ານດີ, ແກ້ໄຂດ້ານອ່ອນ, ຕິດພັນກັບການປັບປຸງ ແລະ ສືບຕໍ່ຈັດຕັ້ງປະບັດວຽກງານບັນດາອົງການຈັດຕັ້ງ ພັກ-ລັດ ມອບຫມາຍ ໃຫ້ມີການຂະຫຍາຍຕົວ ແລະມີຄວາມເຂັ້ມແຂງ, ເພື່ອພັດທະນາໂຮງໝໍ ແຂວງຫລວງພະບາງ ໃຫ້ມີປະສິດທິພາບດີຂຶ້ນກວ່າເກົ່າ.