ມີເດຍລາວແຂວງຄຳມ່ວນ ຂ່າວ: ກອງຄຳ ພິທີສະຫຼຸບພາກຮຽນທີ I ຂອງໂຮງຮຽນທິດສະດີການເມືອງ ແລະ ການປົກຄອງ ແຂວງຄຳມ່ວນ ຈັດຂຶ້ນໃນວັນທີ 27 ສິງຫາ 2021 ໂດຍເປັນກຽດເຂົ້າຮ່ວມຂອງທ່ານ ວົງເພັດ ຈິດປັນຍາ ຮອງເລຂາພັກແຂວງ ຜູ້ຊີ້ນຳຂົງເຂດ ວຽກງານພັກ-ພະນັກງານ, ໂດຍມີທ່ານ ແກ້ວວັນໄຊ ສຸກແສນທອງ ຜູ້ອຳນວຍການໂຮງຮຽນການເມືອງ ແລະ ການປົກຄອງ ແຂວງ, ມີບັນດາຜູ້ຕາງໜ້າຈາກພະແນກການອ້ອມຂ້າງ ຕະຫຼອດເຖິງ ພະນັກງານຄູ-ອາຈານ ແລະ ນັກສຶກສາເຂົ້າຮ່ວມ.

ທ່ານ ແກ້ວວັນໄຊ ສຸກແສນທອງ ໄດ້ຜ່ານບົດສະຫຼຸບການຈັດຕັ້ງປະຕິບັດ ການຮຽນ-ການສອນ ປະຈຳພາກຮຽນທີ I ໃນໄລຍະຜ່ານມາໂຮງຮຽນການເມືອງ ແລະ ການປົກຄອງແຂວງ ແມ່ນໄດ້ເອົາໃຈໃສ່ໃນການປັບປຸງວິທີການຮຽນ-ການສອນ ແລະ ສົ່ງຄວາມຮູ້ ໂດຍເລັ່ງໃສ່ການສິດສອນແບບຕັ້ງໜ້າ ຫັນເອົາການສຶກສາເປັນໃຈກາງໃນການຄົ້ນຄວ້າ, ຄູ-ອາຈານ ເປັນຜູ້ບັນລະຍາຍ ເນື້ອໃນທິດສະດີ ແລະ ສົມທຽບພຶດຕິກຳຕົວຈິງຢ່າງກົງໄປ-ກົງມາ ເຊິ່ງໄດ້ສຸມສະຕິປັນຍາ, ເຮື່ອແຮງ, ຫົວຄິດປະດິດສ້າງ ແລະ ເອົາໃຈໃສ່ຕໍ່ໜ້າທີ່ວິຊາສະເພາະຂອງຕົນ ເນັ້ນໜັກຄຸນນະພາບເປັນຕົ້ນຕໍ, ຈັດຕາຕະລາງຮຽນ ປະຈຳອາທິດ, ປະສານສົມທົບກັບພາກສ່ວນກ່ຽວຂ້ອງ ເພື່ອເຮັດໃຫ້ອາຈານໄດ້ຂຶ້ນຫ້ອງສອນເປັນປົກກະຕິ ແລະ ປະຕິບັດ ການຄຸ້ມຄອງນັກສຶກສາຕາມກົດລະບຽບຂອງໂຮງຮຽນ.

ຜ່ານການຄົ້ນຄວ້າ ສຶກສາຮໍ່າຮຽນຂອງນັກສຶກສາລະບົບທິດສະດີ ການເມືອງ ຊັ້ນກາງ ຮຸ່ນທີ XV ໃນພາກຮຽນທີ I ເຊິ່ງມີຊົ່ວໂມງການຮຽນ-ການສອນທັງໝົດ 448 ຊົ່ວໂມງ. ໃນນັ້ນ ບັນລະຍາຍ 260 ຊົ່ວໂມງ, ຄົ້ນຄວ້າ 86 ຊົວໂມງ, ແກ້ຂໍ້ຂ້ອງໃຈ 48 ຊົ່ວໂມງ, ສອບເສັງຂຽນ 40 ຊົ່ວໂມງ, ສອບເສັງປາກເປົ່າ 14 ຊົ່ວໂມງ, ປະກອບມີ 11 ວິຊາຮຽນ, 62 ບົດ ທຸກໆວິຊາທີ່ຮຽນຈົບມີການສອບເສັງຂຽນເປັນການ ປະເມີນຕໍ່ຄວາມຮັບຮູ້ໃນການຮຽນ ແລະ ມີການສອບເສັງປາກເປົ່າລະດັບ ສມປຊ ຈຳນວນ 02 ວິຊາຄື: ປັດຊະຍາມາກ-ເລນິນ ແລະ ເສດຖະສາດການເມືອງມາກ-ເລນິນ. ສາມາດຕີລາຄາ ແລະ ຈັດເກຼດຄະແນນໄດ້ຄື: ຄະແນນເກຼດ A = 72,46%, ຄະແນນ ເກຼດ B+ = 25,95% ແລະ ຄະແນນ ເກຼດ B = 1,31% ແລະ ຜົນການປະເມີນການຂຶ້ນຫ້ອງສອນ ຂອງຄູ-ອາຈານ ຈັດປະເພດໄດ້ຄື: ປະເພດດີຫຼາຍ = 85%, ປະເພດດີ = 95%.

ພ້ອມດຽວກັນນີ້ກໍ່ໄດ້ວາງທິດທາງ ແຜນການ ແລະ ຄາດໝາຍໃນການຈັດຕັ້ງປະຕິບັດພາກຮຽນທີ II ຄື: ສືບຕໍ່ຈັດຕັ້ງປະຕິບັດການຮຽນ-ການສອນ ພາກຮຽນທີ II ປະກອບມີ 11 ວິຊາ, 68 ບົດ, 31 ໜ່ວຍກິດ ແລະ 496 ຊົ່ວໂມງ, ມອບຄວາມຮັບຜິດຊອບ ໃຫ້ແຕ່ ລະຂະແໜງການຄົ້ນຄວ້າກຳແໜ້ນ ແລະ ຜັນຂະຫຍາຍ ເນື້ອໃນຈິດໃຈ ທີ່ເປັນແຜນການວຽກງານຈຸດສຸມ ເປັນແຜນງານ ໂຄງການລະອຽດ ພ້ອມທັງນຳພາຈັດຕັ້ງປະຕິບັດໃຫ້ໄດ້ຮັບຜົນສຳເລັດຕາມລະດັບຄາດໝາຍ.