ມີເດຍລາວແຂວງໄຊສົມບູນ ຂ່າວ: ພາພອນ ນະວົງໄຊ
ພິທີມອບ-ຮັບເງິນ ລະຫ່ວາງ ກຸ່ມບໍລິສັດ ຮ່ວມມືເສດຖະກິດໂກເອກໂກ ກັບ ຄະນະບໍລິຫານງານສະຫະພັນແມ່ຍິງແຂວງໄຊສົມບູນ ໄດ້ຈັດຂຶ້ນໃນວັນທີ 27 ສິງຫາ ນີ້ ທີ່ສໍານັກງານບໍລິສັດ. ໂດຍການກ່າວມອບຂອງທ່ານ ຫງວຽນແອງແທ່ງ, ຜູ້ອໍານວຍການບໍລິສັດ ຫລອມໂລຫະ ແລະ ແຮ່ທາດ ທີ່ຂຶ້ນກັບກຸ່ມບໍລິສັດ ຮ່ວມມືເສດຖະກິດໂກເອກໂກ ແລະ ຕາງໜ້າກ່າວຮັບໂດຍທ່ານ ນາງ ເພັດສະໄໝ ໂພໄຊຍະວົງ ປະທານຄະນະກວດກາພັກ, ອົງການກວດກາລັດ ແຂວງໄຊສົມບູນ, ມີທ່ານ ນາງ ຄໍາສີ ສິດທິວໍລະດາ ປະທານສະຫະພັນແມ່ຍິງ ແຂວງ ພ້ອມດ້ວຍຮອງອໍານວຍການບໍລິສັດ, ຮອງປະທານສະຫະພັນແມ່ຍິງ ແລະ ເອື້ອຍນ້ອງແມ່ຍິງ ເຂົ້າຮ່ວມ ເປັນສັກຂິພິຍານ.

ຈໍານວນເງິນທີ່ບໍລິສັດມອບໃຫ້ຄະນະສະຫະພັນແມ່ຍິງແຂວງ ໃນຄັ້ງນີ້ ມີທັງໝົດ 30 ລ້ານກີບ ໂດຍຈຸດປະສົງ ແມ່ນເພື່ອຊຸກຍູ້ການກໍ່ສ້າງຫ້ອງຂາຍຜະລິດຕະພັນກະສິກຳ ແລະ ຫັດຖະກຳ ຂອງແມ່ຍິງແຂວງ. ໂອກາດດັ່ງກ່າວ ທ່ານ ນາງ ເພັດສະໄໝ ໂພໄຊຍະວົງ ໄດ້ສະແດງຄວາມຂອບໃຈຕໍ່ບໍລິສັດ ທີ່ຍາມໃດກໍ່ເຫັນໄດ້ຄວາມໝາຍສໍາຄັນ ແລະ ໃຫ້ຄວາມຊ່ວຍເຫຼືອ ແຂວງໄຊສົມບູນ ຕະຫຼອດມາ. ຊຶ່ງທ່ານໄດ້ໃຫ້ຄໍາໝັ້ນສັນຍາວ່າ ຈະນໍາເອົາເງິນຈໍານວນດັ່ງກ່າວໄປນໍາໃຊ້ເຂົ້າໃນການຈັດຕັ້ງປະຕິບັດວຽກງານຕົວຈິງ ກໍຄືການກໍ່ສ້າງຫ້ອງຂາຍຜະລິດຕະພັນຂອງເອື້ອຍນ້ອງແມ່ຍິງ ໃຫ້ປະກົດຜົນເປັນຈິງ ແລະ ເກີດປະໂຫຍດສູງສູດ. ນອກນັ້ນ ທ່ານ ນາງ ເພັດສະໄໝ ໂພໄຊຍະວົງ ພ້ອມດ້ວຍຄະນະສະຫະພັນແມ່ຍິງ ແຂວງ ຍັງໄດ້ມອບໃບກຽດຕິຄຸນ ໃນການປະກອບສ່ວນພັດທະນາແຂວງໄຊສົມບູນ ໃຫ້ບໍລິສັດ ນໍາອີກ.